خذني على قد عقلي ( قصه رووعه)

(( حسن ))

كنت معطي أخوي ظهري.. ولا درت له .. رغم أني عقيت عليه.. الأول والتالي..

حتىاني سمعت خطواته.. وهو يبتعد عني.. لاقلت ولا كلمة ولا حتى
درت وطالعته..
بالعكس..
نطرت إلين حتى غابت عني صوت خطواته..

حزتها

درت لوراي.. وشفت الممر فاضي..وأخوي.. قد راح..
قلت بصوت شبه مسموع وعيوني تتجول بهالممر :
ياليتك مارديت ياسالم..ياليت

ورحت صوب غرفت ولدي سالم..عقب ماشليت على ظهري حمول مالها موازين..
وبطلت باب غرفته.. ودشيت.. بخطوات خفيفه..

شفت
الغرفة مظلمة .. وهاديه ودافيه.. وسالم فوق هالشبرية.. متلحف..بغطى ابيض.. ولون ويهه شاحب..غايب عن الدنيا
وكل وايرات هالمستشفى.. ممتده بجسمه.. ونبضات قلبه.. باينه.. على هالجهاز..الصمت محتل زوايا هالغرفة..

مشيت واقتربت منه ..
ومديت إيدي .. وسحبت الكرسي اللي محطوط احذاه.. و لصقته بشبرية سالم.. ويلست..

طالعت عليه..بضعف..حسيت عمري.. مكسور الظهر..مالي قوة..

وبدون شعور

خليت ايدي تمسح على خده..
وبقيت أتأمل فيه.. سرحت.. بالماضي.. سرحت.. بشغلات..يمكن مالي حق اني اذكرها مادمت نهيتها بزماني.. لكن الدم عمره مايستوي ماي..

آآه.. آآه.. شو مخطط لنا يازمن شـــو..؟؟!!!!

وسندت راسي.. على الشبرية.. ومسكت.. ايد سالم..
وانطلقت بافكاري افكر..
باللي.. راح.. ومضى.. بأيام.. تمنيتها بشبابي تعووود..


**********************************************

(( العم علي ))


لما راحوا وتركوني.. اداري على محمد.. مشيت.. واقتربت من غرفته..
وسندت ظهري على اليدار..

ونزلت بجسمي المهدود.. شوي شوي للأرض.. ويلست..

وأخذت اردد الدعاء.. وان ربي يقومهم لنا بالسلامه..


بس كان الخوف متربع بقلبي.. الخوف.. من الطبيب..سهيل..
اللي خايف أنه يكون كشف الاسرار على ايده..
قد حان..


رغم التعب.. والارهاق.. بقيت أطالع بهالممر.. ومانع عيوني التعبانه.. انها تغفى ولو ثواني .. وأمرتها تراقب بهالممر..الطويل والبارد..

وتشوف إذا الطبيب سهيل بيي صوبي ولا لأ..؟!!



**********************************************

(( نورة ))


كنت ممددة على الكنب اللي بالصالة ..ابكي..بحرارة.. وعيني الوارمه كل مرة تطالع على شي....
التعب والارهاق..
كان مسيطر على جسمي..
بس الحزن كان اكبر من التعب اللي فيني..
موت محمد.. شي مو سهل.. ولا كنت متوقعته..
حرام..؟!!
وأشلون قسيت عليه..؟!!

عاملته.. بكل قسوة.. لدرجة.. أني كرهته في بعض الأحيان..؟!!

ومع يلست الحزين اللي كنت يالستها مع أسئلتي وأفكاري وضميري..!!

دش علي ابوي من باب الصالة..والتعب الفضيع مااااكل جسيمه حيييييل..

قمت من على الكنبه.. وركضت صوب أبوي.. اللي كان معطيني ظهره ويسكر الباب.. وبعده مابتعد عن الباب بس لف بجسمه..
كنت يايه صوبه مثل الرصاص.. وارتميت عليه.. اصيح.. واصيح.. منفجره من البكا..
العبرة كااانت.. خانقتني.. والوحده.. كسرت ضلوعي.. والخوف.. عليهم ذبحني..


حط ابوي ايده على راسي.. وأخذ يمسح على شعري.. وهو يقول :
بسم الله عليج يابنتي .. شنهو اللي مستوي فيج انتي بعد..؟!!
ليش تصيحي.. يا نظر عين ابوج.. هاه..؟!! خبريني..؟!!


قلت بجمل متضاربه بالبكا.. والتنهيد.. :
مــحمد.. يا يبه..؟!!
محمد.. ؟!!


ومارمت اكمل كلامي.. ورديت لنوبة البكا..

لما شافني ابوي على هذا الوضع..

باس على راسي.. وقال:
هدي اعصابج يا بنتي.. مافيهم إلا العافية أن شاء الله..

لما سمعت جملة أبوي.. قلت بخاطري .. وحليله.. بعده مصدوم..؟!! وأشلون ما ينصدم وهو يعز محمد اكثر من نفسه..؟!!
واهنيه..زدت ببكاي..وانا اغطي ويهي بصدره..وألصق عمري فيه زود

حاول ابوي يرفع راسي ويشوفني.. ولما عيز..
قال:
يابنتي.. رحميني الله يرحم والدينا ووالديج.. رفعي راسج.. وكلمي ابوج.. يالله ياعمري..؟!!

رفعت راسي.. شوي شوي.. ورفعت عيوني الوارمه.. واللي كنت احسهن نار.. وطالعت على عيونه.. ونزلت نظرتي للأرض.. وانا رافعه راسي له..
وبعدني اصيح..

رفع ابوي ايده.. ومسح الدموع المغطيه ويهي.. وقالي:
يابنتي.. ليش تصيحين..؟!!
عيال عمج.. مافيهم إلا العافيه.. والبكا هذا مايفيدهم.. بالعكس هم اللحين محتايين لدعواتج.. اكثر من قبل..
هدي اعصابج.. واشربي لج كاس عصير بارد يهديج..وروحي وصلي ركعتين لله..وأقرأي القرآن.. ودعيلهم..أنزين..؟!!

عفيه على بنتي.. يالله ياقلب ابوج.. روحي.. ورتاحي..

لما سمعت اللي قاله.. ماقدرت امنع دموعي انها تنهمر اكثر من قبل.. طالعت عليه والتنهيد يقطع كلامي :
واشلون مافيهم إلا العافيه.. ومحمد مااات..؟!! أي عافيه يالس ترمسني عنها..؟!!!
وغطيت ويهي بيديني.. ورجعت لنوبة البكا.. اللي ماتنتهي..

حط ابوي ايده على يديني يريد يخوزهم من على ويهي .. وهو يقول :
منو قالج مات..؟!!
محمد بخير يا بنتي.. عايش.. وله طولت العمر.. أن شاء الله..


لما سمعته يقول جذيه.. خوزت يديني من على ويهي.. وارتميت على الأرض اصيح واصارخ وأقول:
دخيلك يا يبه.. لا تستخف.. ماعندي إلا الله وانت..
دخيلك.. خلك معاي..
ماعندي بهالدنيا سواك..؟!!

أرجووووك..

ورحت.. امسك.. كندورته...واحبها..وارتمي على اريوله واحبهن..

يلس ابوي على الأرض.. وهو يـيـودني..ويحاول يهديني.. وأخذ يقول:
يابنتي.. لاتخافي.. مابهدج.. ابد.. استهدي بالله يابنتي..
اذكري الله.. اركدي وأنا ابوج..

وأخذ يحظني.. ويقرأ علي القرآن ويمسح على راسي.. إلين ماهديت.. وعقب ما ساد الصمت على المكان..
سمعت ابوي يقول بهدوء وبحنيه:
يابنتي.. لاتخافين.. محمد وسالم بخير.. وبكره بوديج عندهم تشوفيهم
بعيونج..

قلت وأنا مغطيه ويهي بيديني.. وهو لامني :
واشلون بخير.. ومحمد..راح..؟!!

وهو يمسح ايده على شعري :
قلتلج.. محمد بخير.. يابنتي..فهميني تعبت دخيلج.. افهمي..!!

رديت عليه وكنت احاول ما اصيح :
بس مو هذا اللي قلته لي حزت اتصلت..انت قلتلي محمد ماات..؟!!

سكت فتره وعقبها.. خوزني من على حظنه.. وقال وهو يطالع علي بنظره غريبه.. وصك ايده على جبهته:
أوووه يابنتي.. آآآسف آآآسف..
عذريني وانا ابوج.. خبرتج انه توفى.. ومارديت اخبرج.. ان السالفة كانت لخبطة ..


عقدت الحيابين.. والتنهيد يرفع بجسمي ويحط.. وقلت:
وأشلـــــــــون لخبطه..؟!!


سمعيني يابنتي.. السالفة طويله عريضة.. بس بقولج بختصار..علشان تهدي وترتاحي..
لماكان سالم ومحمد عندنا.. اهنيه..كان في حرامي يريد يـبوق سيارته.. ومع هالمضرابه.. الطويله والعريضة..
اللي استوت من بين عيال عمج وعمج.. انخش.. في السيارة ومارام يظهر.. ومحمد عقب أخذ سالم.. المستشفى..
وفي الدرب استوى لهم حادث.. الاسعاف يابت سالم وجثه محروجة.. حيل وهي جثة الحرامي..اللي كنا نعتقد انها جثة محمد..
أما محمد.. يابه ربيع الحرامي اللي كان يراقب له الدرب.. وربج سهل لمحمد.. انه يسير للمستشفى..
يعني اللي توفى الحرامي مو محمد..؟!!
فهمتي..؟!! ولا لأ......؟!!!!


صخيت في مكاني.. وكبرت ومقلت عيوني وبطلت فمي وقلت:
هــــاه..؟!!

وقف على حيله وأخذ يعدل كندورته وهو يقول :
إلين ماتستوعبي السالفة.. خبريني.. أنا اللحين بسير وبريح شوي .. تعباااااااان حييييل..


وقفت بسرعة ويودت ايده وأنا اقول :
أحلف..؟!!
يعــــني..؟!!
يعني.. محمد مافيه إلا العافية..أن شاء الله..؟!!أحلف..؟!! قووول والله..؟!!


طالع علي وهو يهز براسه :
هيه..والله.. ولا شو كنت أقووول من الصبح..؟!!
يالله سيري.. وصلي شكر لله.. وادعيلهم.. وخليني اسير غرفتي.. ارتاح..


ضغطت على ايده اكثر من قبل وقلت :
واللحين اشلونهم..؟!!


سكت في البداية.. وعقبها.. خوز ايده عن يديني وحاوط بيدينه راسي.. وقال:
سالم.. حالته زينه والحمدلله.. وأن شاء الله بيقوم وبيتعافى.. أما محمد.. كثري له بالدعاء..
لنه.. بالعناية المركزة..وربج بيرعاه.. أن شاء الله..


وباس راسي وقال:
واللحين.. توكلي على الله.. وسيري..
وخليني اسير الله يهديج..!!

وراح معطيني ظهره..متجه لغرفته..مشيت وراه.. وأول ماحط ايده على مقبض الباب يريد يدش..قلت بسرعه وبصوت مبحوح :
يـبــه.. ليش مايلست عندهم.. ونطرت حتى تطمن..؟!!
يعني لو كان علي .. يسدني تيلفون يطمني..؟!!


لا رد ولا شي.. صخ في مكانه.. وبدون مايدور ويطالعني..
وبطل باب غرفته ودش.. وصك الباب من وراه.. وسمعت صوت مفتاح غرفته.. يتبند..


قلت بصوت واطي :
خير وش بلاك..؟!! ليش ماترد علي..؟!!
بس يالله..
أنت حـــــــر

رحت.. صوب غرفتي..وصكيت الباب من وراي.. وفريت عمري على الشبرية.. وقلت بصوت عالي وأنا اتنفس.. من خاطري :
آآآآآآآآآآه
من الصبح وانا اصيح وابكي.. وحالتي حاله.. وماطلع في محمد شي..؟!!
استغفر الله ..استغفر الله
الحمدلله أنه بخير..
وأنا كنت أحلم أصلاً أنه يكووون عايش..؟!!
أحمدك يااااارب..
لاتفرق سالم عن محمد.. ولا تبكي عينا عليهم..ياربي
أحسن شي.. اللحين بسير بتوضأ.. وبصلي ركعتين شكر وحمد لله على سلامتهم..
وعقبها بقرأ القرآن وبدعي.. وآخر شي برقد..
علشان هالورم يخف إلين بكره..مايستوي سالم يشوف عيوني وارمه شرات البقر..


*****************************************
(( حسن ))

نشيت على صوت الطبيب اللي دش على سالم.. تلفتت.. اطالع في الغرفة..
احاول استوعب.. واشلون رقدت..؟!!

ابتسم الطبيب وقالي.. عقب ماشافني.. قمت من على الكرسي واتلفت:
قلتلك لو تسير البيت وترقد.. تراه مابيحس فيك.. لأني كنت معطيه البنج..
بس مابغيت غيرشورك.. الله يهديك



مسحت على ويهي وأنا اقول:
مابرتاح لو ظهرت عنهم.. ابي اتطمن..على عيالي..


وخوزت يديني واقتربت من سالم.. اللي لقيته مبطل عيونه.. ويطالع صوب أشعة الشمس.. اللي اخترقت الشباك..
كان ساكت.. بشكل يخوف وماتعودت عليه..


حطيت ايدي على راسه عقب ماحبيته :
حمد لله على سلامتك يالغالي..


ورفعت راسي.. أطالع عليه.. شفته على نفس الحالة.. وعينه ماخوزها من الشباك..
ياني الخوف .. طالعت على الطبيب وقلت:
ليش مايرد علي..؟!!
ولدي مستوي به شي..؟!!


سكت الطبيب وهو يطالع على سالم.. وعقبها قالي وهو يفحص كل مرة على شي:
أن شاء الله ما يكون فيه شي.. بس أكيد ارهاق.. ولا تنسى الظروف اللي مر فيها ولدك..
تراها مو سهله..

واقترب الطبيب من سالم وقاله:
ســالم..؟!!
ليش ساكت..؟!!
ماتريد تشوف أهلك.. اللي من أمس وهم وياك ماهدوك بروحك ولو شوي..؟!!


وبدون ما كنت اتوقع.. سمعت سالم يقول.. وهو بنفس الوضع.. عينه على الشباك.. :
مابقالي أهل..وخل هذا اللي هنيه يروح.. ما اريده يكون عندي..


لما سمعته.. قلت وانا احط ايدي على كتفه:
أفا.. يا ولدي.. ماتريد.. تشوف..ابوك..؟!!

دار ويهه.. من صوب الشباك .. وحط عينه المليانه دموع بعيني.. وطالعني بنظرة كره.. وحقد ..وقال وهو يصرخ.. ويريد يتحرك من على الشبرية .. بس الطبيب كان ييوده بصعوبة:
أقولك اظهر من اهنيه.. أنت مو أب..؟!!
أنت سفاح..؟!!
واشلون ذبحت أخوي..؟!!
أكرهك.. أكرهك..

وبدأ.. يخوز الوايرات من عليه.. والطبيب يحاول يهديه.. ولما ماقدر.. بدأ.. يصرخ وينادي على حد يساعده.. وسالم.. كان يطالعني ويبكي..
ويصرخ:
ارتحت..؟!!
والله.. والله ذبحتني بمحمد.. مليون مرة.. ياليتني كنت بمحله.. ولا كان اهو..
أكرهك.. على عدد.. كل ثانية.. بتشرق بليا أخوي..
ارتحت اللحين..
حرمتني من أخوي.. واستويت مثلك بلا أخك.. بس انت حرمت عمرك بعمرك من أخوك..
لكن أنا.. حرمتني منه غصب عني.. غصب..

وبدأت كلماته ترتفع.. وصرخاته.. تهز.. الغرفة بما فيها.. والطبيب كان يحاول يهديه.. وييوده.. مع عده من الممرضين.. اللي دشو الغرفة لما سمعوا الصراخ..

بس نظرة سالم لي كانت مثل طعنت الخنجر بوسط القلب.. طالعني وهو يخوز ابرة المغذي من ايده.. والدم.. غطى مكان الابرة..
وصرخ صرخة والدموع غطت ويهه:
مبـــروووك.. مااااات محمد..مبروووك.. تخلصت منه..
آآآه..
منك..
أكرهك.. والله ذبحتني بمحمد.. ياحسن.. لو كان على بالك.. انك.. ذبحت محمد بروحه.. أنت غلطان..
ذبحتني قبله..
اكرهك.. اظهر من هنيه.. روووح.. برع..


صرخ بويهي الطبيب وهو يحاول يسيطر على سالم:
ارجوك اظهر ماتشوف حالته ما تسمح..بوجودك..اطلع برع..


نزلت راسي للأرض.. وظهرت من غرفت سالم.. وماقدرت حتى افهمه بالموضوع..
مشيت.. بهالممر.. بدون أي احساس وشعور..إلين ما وصلت عند غرفة محمد..
لقيت..
علي.. يالس على الأرض.. وحالته سيئة وفضيعة بالمرة..
وأول ماشافني.. قام من على الأرض.. وقرب مني وقال:
خير يابو سالم..؟!! وش بلاك..؟!!
ســالم فيه شي..؟!!

هزيت راسي..لأ..

رد يسأل:
عيل شو بلاك..؟!! منقلب حالك فوق حدر..؟!!


طالعته..وعقب وجهت نظراتي صوب غرفة ولدي محمد.. أحاول اني ما اضعف :
سالم.. يته حالة عصبية.. يظن أن محمد..مات.. وأني أنا الذي ذبحته..


رد.. بهدوء:
ماعليه يابوسالم.. لاتنسى واشلون نحن كنا.. يوم كان في بالنا أن محمد.. قد ضاع من بين يدينا.. اعذره.. وهم بعد لا تنسى واشلون اهي علاقتهم..!!
صدقني ياحسن..أزمة وبتعدي.. أن شاء الله.. خل اعصابه ترتاح شوي.. وعقب بسير عنده وبفهمه..


تنهدت وطالعت على ويهه التعبان.. :
خير أن شاء الله.. وبتسوي خير فيني لو كلمته.. لأنه صج رافض بالمرة يكلمني أو حتى أنه يشوفني..


ابتسم.. ابتسامه.. تطفيها.. آلام.. باينه وظاهره في عيونه.. ولونه وكل مافيه:
خلاص.. عيل توكل علىالله.. وخل هالموضوع علي..


وجهت عيوني صوب باب غرفة محمد..وقلت:
واشلون ولدي اللحين..؟!!
وما حسيت إلا انه يمسك ايدي ويمشى وهو يقول :
اللحين بنعرف واشلونه..؟!!


مشينا.. واقتربنا.. من غرفته.. وشوي.. شوي.. بطلنا الباب..
ودشينا الغرفة..
اقتربنا..منه..
حسيت نفسي.. بكابوس.. ابيه ينتهي..
كنت أنا وعلي.. على يمين الشبرية.. ونطالع عليه.. بصمت..

وفجأة..


وبدون سابق انذار...


الجهاز اللي يقيس نبضات القلب.. طلع صوت.. مثل الطنين..
طالعت على علي وقلت:
اش هالصوت..؟!!


سكت علي.. اللي ماعرف اشلون يرد.. وفجأة..دش علينا مجموعة من الاطباء اللي طلعونا من الغرفة..
وبدون ما أحد منهم يرد علي.. ويطمني على اللي يالس يستوي..

طالعت من الشباك الصغير.. وظليت اراقب اللي يصير..
شفتهم..
يحطون شغلات غريبة.. على ولدي..
حزتها.. عرفت انهم.. يحاولون.. ينعشون ولدي.. وان الصوت اللي سمعته..
صوت.. توقف نبضات محمد..

بطلت الباب..رغم محاولات علي بمنعي.. ودشيت..
وانا اصرخ بعالي صوتي وابكي:
محمد.. ارجوك.. ارجوك.. لا تموت..
علشان ابوك.. لا تموت..
دخيلك..
دخيلك..
مافيني على ملامة سالم.. دخيلك..
لاتتركنا وتروح..


وأول ما يا واحد من الممرضين.. يريد يظهرني.. سمعت صوت الجهاز.. تغير..
طالعت عليه وعقب طالعت على الممرض... اللي قالي:
لاتخاف ياحج.. ولدك..رد للحياة..تطمن
والله يخليك.. خلنا نشوف شغلنا اللحين..

وظهرني برع.. وصك الباب.. بويهي.. طالعت علىعلي وقلت :
محمد لو استوى به شي.. هالدنيا بكبرها.. مالها مكان عندي..

اقترب مني.. علي.. ويلسني وياه.. على الأرض..
وحاول يهدي من اعصابي..وعقبها ظلينا ننطر الطبيب.. اللي أول ماظهر.. طمنا على محمد...وان حالته والحمدلله استقرت.. بس لازم نبعد عنه أي شي.. ممكن..
يكدره..

وعقب ثلاث ساعات بالتمام.. سمحلنا الطبيب أننا ندش عليه.. ونزوره..بس بسرعة..
دشينا.. واول ما دشينا..
ارتاح قلبي باللي شفته..
شفت محمد.. مبطل عينه.. شوي.. وجهاز الاكسجين محطوط عليه..

اقتربت منه.. وحبيت على راسه..وقلت وايدي محطوطه على شعره :
الحمد لله على سلامتك.. يانظر عين ابوك..
ارتاح.. وقوم بالسلامة.. وترى سالم بخير والحمد لله.. بس تطمن..ولاتحاتي..

هز.. براسه.. انزين.. وطالع على علي.. وشوي.. شوي..
غمض.. عينه.. ورقد..

يلسنا.. لفترة بسيطة.. مثل ماطلب منا الطبيب..وعقبها.. ظهرنا..
وتوجهنا.. رباعه.. صوب سالم..


وأول ما وصلنا.. هناك.. لقيت.. الطبيب واقف.. ينتظرنا.. عند باب الغرفة..
اقتربنا منه..
وعقب ما سلم عليه علي.. طالع علي وقال:
اسمحلي يا عم على اللي بقوله .. بس أنت ماتريد ولدك..؟!!
كنت بتخليه.. يصاب بحالة هستيرية فضيعة..
يعني يسد انه مصاب بنهيار.. لكن ...
شو تريدني.. اقول بالضبط..؟!!
غيرالله يسامحك..


مارمت اسكت..قلت ومحاول اتمالك اعصابي :
كل شي استوى جدامك.. فجأة.. صرخ.. وصار اللي صار..

طالعني الطبيب .. وقال:
المهم.. يا عم.. انت لاتدش حالياً..حتى يحين استوعابه لسالفة اخوه..
محمد..
وياليت حد غيرك يدش.. ويفهمه..بوضع اخوه الله يرحمه..
ولا بيــيب له طبيب نفسي..حتى يساعده.. على انه يمر من هالحالة..


طالعت على علي.. عقب على الطبيب.. وتكلم علي :
لا مايحتاي طبيب نفسي ولا شي.. أن شاءالله .. بس محمد بخير والحمد لله اهو اللحين في العناية المركزة..
وبدش.. وبفهمه.. بسوء التفاهم اللي صار..
إذا مسموح يعني..؟!!!!!!


مقل الطبيب عيونه وقال:
اللي في العناية المركزة.. اهو نفسه.. اللي تدورون عليه من الصبح..؟!!!!
يعني هذاك.. هو محمد..؟!!

قلنا له..هــــيه..

ابتسم.. وطالع على علي وقاله:
يا سبحان الله.. ربي كتبله عمر يديد.. والله..
المهم.. حمدلله على سلامته..



رد.. وقاله علي:
أنزين.. ممكن ادش عليه.. وافهمه..؟!!

طالع الطبيب صوبي وعقب صوب الباب وقال لعلي:
من حظك.. ان المهدئ اللي خذه.. زال مفعوله.. من ربع ساعة.. تفضل.. ودش بس حاول تفهمه.. بدون أي انفعال تسبب له..

واللحين برخصتكم..

طالعنا عليه وهو يروح.. ولما ابتعد عنا..
طالع علي علي وقال:
ايلس اهنيه.. وأنا بدش عنده.. وبفهمه..

وعطاني ظهره.. ودش.. الغرفة عند سالم..

ويلست على الكرسي.. ادعي أن ربي يسهل الأمور..


*********************************************

(( نورة ))

لما نشيت الصبح.. وبديت ازهب الريوق..
دش علي ابوي في المطبخ.. وشكله مو راقد.. طالعت عليه.. باستغراب وقلت :
يـــُــبه..؟!!
أنت.. مو راقد من أمس..؟!!!


كان واقف عند الباب..طالع علي.. وهزلي براسه.. لأ..


قلت له.. وانا مستغربه:
ليش..؟!!
إذا انت قلت لي.. انهم.. بيكونون بخير أن شاء الله.. عيل ليش ماتريح جسمك.. وانت تعرف واشلون بتتعب بالروحه واليايه..؟!!



تغيرت ملامحه.. وغير الموضوع وقال:
مابي ريوق.. بس ابي القهوة..يــبيها.. لغرفتي..


وراح..


وعيني متعلقه فيه.. استغربت وقلت وش بلاه..؟!! خذيت الدله.. والفنايين.. ورحت لغرفته..
ولما وصلت.. طقيت الباب.. ودشيت..
لقيت ابوي يالس على اليلسه العربية.. اللي في غرفته.. يلست احذاه.. وصبيت القهوة بالفنيان.. ولما مديت ايدي علشان اعطيه.. قلت:
قول بسم الله.. وخبرني يالغالي.. وش بلاك..؟!!
أنت مو عايبــني بالمرة..؟!!
وانتبه تقولي.. مافيني شي..!! لأني اعرفك زين.. ولا تنسى اني مثـلك..
طالعه عليك..افهمها وهي طايره


خذ ابوي الفنيان.. وبدأ يشرب وبسكوت.. من فنيان لفنيان.. وقلت بخاطري: ماعليه اللحين بيرمس.. بس القهوة قربت تخلص وهو ماقال أي كلمه.. بس ساكت.. وسرحان..

رديت أسأله.. ومع الحاحي عليه.. خبرني باللي صار منبينه.. وبين عمي حسن..كله.. وبالتفصيل الممل..

وقلت له بعد تفكير..:
اسمعني يــُــبه.. خذها نصيحة مني.. الواحد منا.. لازم يواجه خوفه ومشاكله حتى تنحل.. والعلاقة اللي تربطك بعمي ماهي علاقة يومين والسلام.. لأ..
علاقة.. ليوم الحساب.. أنت روح وتطمن.. ولك الحق بشوفتهم.. وصدقني.. بوجودك.. ويا عياله.. بتقنعه.. برضاه.. ولا غصب.... بردتك.. لحياته..
وأنت سويت اللي عليك وزود.. اعتذار واسف.. واكثر من جذيه..
ماعندك.. غير .. انك.. تعاند.. وتلح عليه.. ولا كأنه قال شي بالأمس.. بالعكس..
روح.. وابتسم.. وخذلهم شي.. وماعليك منه.. صدقني.. بيسامحك.. مافي قلب.. يرفض اخوه..
وبالذات لو كان أخوه الوحيد..
علشان جذيه.. تريق.. وريح شوي.. وروح لهم.. وانسى اللي استوى أمس..


طالعني وقال:
بس يا بنتـــ.....


قاطعته..:
لا بس.. ولا هم يحزنون... روح وتوكل.. على الله واللي بيصيربيصير.. بس انسى كل كلمة جارحة قالها.. أو بيقولها.. إلين ماترد علاقتكم.. شرات قبل..
ترى الصبر مفتاح الفرج.. يابو نورة..


ابتسم ابوي.. وعطاني الفنيان..وقام.. بسرعة وغير ملابسه.. كأنه ماصدق .. وقال :
شورج.. والهداية الله..

وظهر.. من غرفته.. بسرعة...وهو يبتسم..



*********************************************

(( العم علي ))

لما.. تركت ابو سالم بهالحالة.. دشيت وكلي أمل.. بأن سالم.. ممكن.. يسمع ويقتنع مني..

وأول ما دشيت.. لقيت سالم.. معطي ظهره صوب الباب.. ومنسدح على جنــبه الأيمن..


اقتربت منه.. ووقفت ورى ظهره وقلت وأنا اطالع صوب الشباك:
عندي لك مفاجئة..؟!!


لا لف.. ولا حتى قال شي.. حزتها.. مشيت.. ورحت صوب اليمين.. وغطيت على صوب الشباك.. وعدت كلامي:
عندي لك مفاجئة..؟!!!


رفع نظراته.. ورد ونزلها وبدون مايقول أي شي..
طالعت عليه وقلت:
يعني.. ماتريد تشوف محمد.. وماتريد تسلم عليه..يعني اروح..

ومشيت مبتعد عنه.. وسمعت صوته من وراي :
حرام اللي تسوه فيني..والله حرام..

وقفت.. في مكاني.. ودرت وطالعته.. شفته يطالعني بعيونه.. اللي مثل اليمـــر وكلها دموع..وهو رافع نص جسمه.. وساندها على المخده..

اقتربت منه وقلت:
حط عينك بعيني.. وخبرني.. أنا ممكن اقص عليك..؟!!


سكت ولا رد بأي حركة..

رديت وكملت.. اسمعني.. انا مايهمني باللي شفته.. تحت.. بس يهمني اللي بقوله..
اباك.. تصدقني..
ترى استوى لك أنت واخوك محمد حادث لما كان بيسعفك.. للمستشفى..
وصارت لخبطه بالجثث..
وعلى بالهم.. أن جثة واحد متوفى هي جثة محمد.. ولما رحنا وشفناه.. وكنت انت ورانا..
طلع مو هو.. والحمدلله.. ومحمد بخير اللحين والحمدلله طبعاً.. بس مايروم يـــزورك.. خف.. واستوي بخير.. وبخليك.. تزوره..
شو قلت..؟!!



طالعني بنظره غريبة وقال:
مو ياهل جدامك.. علشان تقص علي.. واسمعني زين..هذا اللي يسمي عمره.. اب.. خله يزول احسن له..

وبدون أي شعور.. مديت ايدي وعطيت سالم طراق.. اللي أول ما ضربته.. مقل عيونه علي وهو ساكت ومنصدم.. طالعت على وصرخت بويهه:
احترم عمرك.. ترى اللي يالس ترمس عنه قلب.. متقطع عليك انت واخوك.. اللي معقوق بالغرفة الثانية..
وياحسافة.. ياسالم.. ماهقيتك.. جذيه.. ماتحشم هالشيبات اللي بويهي يا حسافة..
إذا ماتريد تشوف محمد قول.. بس احترم عمرك.. ولا تطول لسانك على من كسر ظهره عليك..
ترى المرجله.. ماهي بطولت اللسان على من تعبوا علينا.. وضحوا بشبابهم لنا.. سمعت..ولا لأ..؟!!
حشم.. لجل يحشموك الناس.. حشم..

ولما درت معطيه ظهري.. كان سالم يبكي ويقول:
محمد مات.. وانت يالس تلومني..؟!!
أخوي كسرني والله كسرني.. ذبحني ابوي واشلون تريدني ارمس عنه.. خبرني..؟!!
قـووووووووول..؟!!

كنت اسمع كل كلمة منه.. وشريط ذكرياتي بولدي خالد.. ينعاد جدامي.. وبدون شعور.. ظهرت ..من عنده.. بسرعة وبغضب..واتجهت صوب غرفة الممرضين..
وطلبت كرسي متحرك.. وبالمضرابه يبته.. وحسن يتبعني.. من مكان لمكان.. ويسأل.. وبدون ما ارد عليه..


ولما يبت الكرسي.. دشيت غرفة سالم وحسن وراي.. وقلت بعصبيه لسالم :
ايلس على الكرسي.. وشوف إذا كان عمك علي يقص عليك ولا لأ..؟!!


قال وهو متردد ويصيح :
على وين..؟!!

صرخت بويهه:
ايلس على الكرسي.. بوديك لمحمد.. علشان تتأكد.. مو تبا تتأكد..؟!!
تعال..


كأنه ما صدق.. خوز الوايرات عنه.. ورحت وساندته على انه ييلس علىالكرسي.. وحسن كان في حالة عصبية ويصرخ:
لا.. تخليه يروح.. أي حركة ممكن تآذيه.. علي الله يهديك اسمعني..

طنشته.. وحركت الكرسي..
مسك..حسن ايدي وقالي:
قلت..لا.. يعني لا...

قاطعه سالم اللي قال:
لو هذا ابنك.. تراه هم بعد أخوي.. اطلع من السالفة لو سمحت..

تيبس في مكانه.. وسكت..
رديت.. حطيت ايدي على الكرسي وقلت لسالم:
بتدفع ثمن تكذيبك لي غالي...



وتوجهنا يميــــع.. لعند محمد..
وأول ما دشينا..


**********************************************


شفنا الغرفة فاضية.. قال حسن وهو يتلفت بالغرفة ويلمس الشبرية:
وينــــ... محمـــ...ــد..؟!!


سكت منصدم.. رفع سالم بنظراته لي وقال:
قلت لك.. لا تقص علي.. أنــ.......


قاطعته وأنا اصرخ..:
اسكت.. ولا كلمة.. وحركت الكرسي عقب ماقلت لحسن..تعال..

رحنا واستفسرنا عن محمد.. وخبرونا انهم نقلوه لغرفة ثانية لأن حالته ماتحتاي غرفة العناية المركزة..لأنها استـقرت..
اهني ارتحت.. وطالعت على سالم.. اللي كان الذهول واضح عليه..

واتجهنا.. لغرفة محمد.. وطقينا الباب ودشينا.. واول ما شاف سالم.. محمد..
بكى بكا.. فضيع..وكأن الروح ردتـله

طالعته وقلت:
صدقتني اللحين..؟!! عرفت أني ما اقص عليك..؟!!

تغيرت ملامحه من حزن لفرحه وطالعني :
رديت لي الروح .. عسى الله يطيب بخاطرك...

وحرك الكرسي بيدينه.. وقرب من محمد.. وأخذ يحظن ايده ويـبوسه وبطل محمد عيونه وأول ما شاف سالم ابتسم وقال بصعوبة وبتعب.. وويهه شاحب اصفر :
أشوفك.. انت تعافيت .. وانا مرضت.. يا سليم الئيم..

ضحك.. سالم.. اللي اندمج.. بكاه بضحكه.. وقاله:
تذكر الطلبية يالطفس..؟!!
منو تتوقع اكلها..؟!!

ضحك محمد.. اللي يحاول مايبين حالته:
محد بيستانس فيها غير دبتك.. نورة..


واختلط ضحك سالم بمحمد..رغم تعبهم الشديد.. وطالعت على حسن اللي خبى ويهه بالغتره.. يصيح..

لف محمد بعيونه صوبي وقالي بصوت مرهق وااايد.. :
شخبارك يالغالي..؟!! واشلون البيت بدوني..؟!!!


ابتسمت.. وانا الدموع.. تطيح من عيني :
مثل الجسد بلا روح..


طالع... بعيونه.. صوب ابوه وقال:
يابو سالم..؟!! بعدك زعلان مني..؟!!.. أنا آآآسف..


ابتعد سالم بالكرسي عن محمد.. واقترب من أبوه وقال وهو يصيح :
سامحني يــُبه.. على كل كلمة.. ما كان قصدي.. بس ما تخيلت الدنيا بلا أخوي.. سامحنـ......

قاطعه.. حسن.. اللي حظنه وهو يصيح.. ومحمد في مكانه.. يطالع عليهم ويمسح دموعه..


حزتها.. قلت بخاطري... ليش ما عندي مثل واحد من هالعيال..؟!! أول ما تقابلوا.. خذوا وضعهم بخفت دم.. وبصدر رحب..
ليش.. الزين يروح ويبقى الشين..؟!!بس الحمد لله على كل شي..وطالعت على حسن.. وكملت بخاطري..
انت محظوظ.. بس ما تقدر حظك والنعمة اللي ربي عطاك إياها..


نزلت براسي.. وكنت بظهر من الغرفة..
مسك ايدي حسن وقالي..
تسلم.. يا حسن وأن شاء الله اردها لك بالأفراح.. أطلب اللي تريده.. ومايردك.. إلا لسانك..

ابتسمت وقلت له:
بطلب ولا تستعيل..


وفجأة..

دش علينا..


**********************************************

أبو نورة.. يايب معاه اغراض..
وعقب ماسلم.. ورحب..

كانت عيون حسن متعلقه فيه.. وملامحه تغيرت.. وكأن الوضع مو عايبه..


وقال سالم ( ابو نورة ) وهو مطنش أخوه :
بنتي تسلم عليكم وتقول سلامتكم..وما تشوفون شر أن شاء الله.. وبتــيي في الزيارة الثانية أن كان لنا عمر..بإذن الله..

بس قولولي.. شو لم المتعوس.. وأشر على سالم..على خايب الرجا.. وأشرعلى محمد .. وضحك..

قال سالم مع محمد بنفس الوقت:
مو أخوان..؟!!


وطالعوا بعض.. وضحكوا على تصادف نفس الكلمة.. واشلون ظهرت..

طالعت على ( ابو نورة ) :
ماقلت لنا واشلون وصلت اهني..؟!!


ابتسم.. وقال:
اللي يسأل ما يتوه.. رحت غرفة سالم.. مالقيته.. رحت غرفة محمد مالقيته.. سألت خبروني انه انتقل اهني.. حزتها.. يــيتكم.. ركض..
واشرايكم فيني..؟!!

طالعه حسن وقال:
ماسخ..
لم هالقشور.. واظهر من اهني ولاتراويني ويهك.. مرة ثانية..


سكت اليــميع.. وتبادلنا النظرات.. وعقب قال محمد بطلوع الروح :
يــُبه.. دخيلك.. رفجة عرب.. بس خلاص.. أطوي الماضي.. مااااانباه...

طالعه حسن بعصبية وقال:
اسكت انت.. وخلك باللي فيك.. ولو سمحتوا.. لحد يدخل..
بيني وبين أخوي..



أنا هني.. ضحكت بالعمد.. وبالصوت العالي.. الكل طالعني.. عقب قالي حسن:
ما اظن في شي يضحك..؟!!

قلت وأنا ااشر.. مره صوبه ومره صوب أبو نورة ..:
وأشلون مالنا خص.. وأنت قلت بعظمة لسانك.. بيني وبين أخوي..؟!!
يعني تعترف انه أخوك.. صح..؟!!


ضحك.. محمد.. اللي فهم حركتي.. وضحكوا اليميع من عقبه إلا حسن.. اللي ظهر من الغرفة..

ظهرت وتبعته.. ويودت ايده وقلت :
وش بلاك يا حسن.. معصب..؟!!


طالعني .. وخوز ايدي من على ايده بعصبيه وقال:
انت ماتفهم.. ان بهالحركة بتفتح ابواب.. مصكوكه من زمن ..
انت ما تعرف اخوي.. أي جرح سببه في قلبي..؟!!
تراك.. تجهل باللي سواه.. يا ريال..
فكني الله يخليك.. تراني مفول حدي.. منه..
وانت يالس تسوي مني طنازه لعيالي ومحترمت كبر سني..

نزلت عيني للأرض وعقبها رفعتها وطالعت عليه وقلت له:
السموحة منك.. ومحشوم.. ولاحد يروم يسوي من رمستك طنازه..وحقك علي..بس..
صدقني جرحك.. لو طالعته بعين البساطة بيهون.. وإذا كبرته بعينك.. بيكبر وبيزيد جرحك وألمك..مهما كان هذا اخوك.. سمعتني يا حسن اخوك.. مو عدوك..الله يهديك..؟!!!

أشر صوب غرفة محمد بعصبية وقال:
اسمعني يا علي.. سالفة اخوي.. انت ماتعرفها.. دخيلك.. دخيلك.. ان كنت تعزني.. لا تدخل..ولا تدخل عيالي فيها.. هذول عيالي وانا حر..


قلتله بثقة:
اعرف انهم عيالك.. محد قالك شي.. عليك بالعافية.. بس اول شي.. هد اعصابك.. والسالفة بكبرها اعرفها.. من اخوك.. خبرني..عنها..

رفع حيابينه بغضب وقال:
هــاه..؟!! اشوفه رام يرمس.. عن سوادة ويهه..؟!!
خبرك.. واشلون تركني..؟!! واشلونــ..


قاطعته:
اعرف كل شي.. خبرني واعترف انه غلط.. والغلط راكبنه من راسه لساسه.. ترى من اعترف بذنبٍ فلا ذنبً عليه..
وربك.. خالق العباد.. يسامح خلقه.. فما بالك انت العبد الضعيف اللي مالك لا حول ولا قوة..!!
ليش ما تسامح..؟!! ليش ما تطوي صفحة الماضي الجارح..؟!!

صرخ بعصبية وضرب يدينه على فخذه:
أووووهوووو.. ياخي هذا ربي.. يسامح.. أنا لا.. مالي قدره على السماح..
ياخي أنا من البشر.. حد قالك عني ملاك..؟!!!!

اقتربت اكثر.. وقلت بهدوء :
لو كل واحد في الدنيا قال شراتـك.. عيل اختربت الدنيا يابو سالم..
حاول تسامح.. ولا اطلب منك تكون ملاك..
اسمعني وانا اخوك.. ترى الدنيا.. ما بتخلي أخوك دايمن لك.. والموت.. فراق لكل مخلوق..
ومثل منت شايف.. يا حسن.. تعلم من الدنيا ولو عقب هالعمر.. انت شايف اليوم كنت بتخسر.. عيالك الاثنين..
وبغلطة.. خسرت محمد.. وربك رحمك.. وطلعة غلطة.. وهو بعده حي..
تخيل لو الموت.. اقتحم عالمك.. بمن كان في الماضي.. اكيد له ايجابيات.. له.. مواقف حلوة..؟!!
يعني اخوك.. من يوم ربي ما خلقه ماله أي شي يشفعله..؟!!!

انزين انا بسألك بالله ترد علي صج..
واشلون علاقتك باخوك.. قبل هالعدواه.. دورله.. من هني وهناك.. نبش وشوف..؟!! يمكن تلاقي اللي يشفعله..؟!! ليش تسد باب قلبك.. بويه الشفاعه..؟!! ليش..؟!!

سكت ونزل عينه للأرض.. وتغيرت ملامحه..
وسكت..


حطيت ايدي على كتفه وقلت:
ليش سكت..؟!!

رفع عيونه بعيوني والدموع فيهن :
ليش تقلب مواجعي كانها صفحات للتصفح.. دخيلك..هذي حياتي ومابيك تدخل.. ياخي افهم..لا تضغط علي.. ياخي تعبااان تعبان..

ولما كان يريد يروح.. يودت ايده وقلت:

اسمعني .. خذها نصيحة من مجرب.. ولا من طبيب... اخوك لو ما يحبك.. ما وقف وياك في اشد حايتـك له

أنزين آخر سؤال بسألك اياه وأوعدك ما اسألك شي عقبه :
تخيل.. لو ياك خبر ان اخوك توفى .. وانت عاملته جذيه .. شو بيكون موقفك واحساسك..؟!!


صخ في مكانه.. وما رد.. عقب فتره.. طالعني وقال:
كيفه..


وانت وعدتني.. ما تسأل.. واللحين ممكن.. تنهي الموضوع..؟!!


انزين يا حسن بنهيه.. بس انت ماتريد اخوك.. هذا شي راجعلك.. بس ان كنت عادل وما تحب الظلم.. مايحقلك تمنع عيالك من صلة رحمهم..


سكت.. وعقبها.. نظرني بنظره.. واتجه لغرفة محمد.. تبعته.. ودشينا..
كان الضحك.. يدور في الغرفة.. ومحمد وسالم.. متجاهلين التعب..

كنت اراقب عيون حسن اللي كل ماسمحت له الفرصة.. سرق.. بنظره سريعة وبسيطة.. وطالع اخوه..

وعقب.. فترة معينه..
دش علينا الطبيب.. اللي نازع.. وغسل شراع سالم والموجودين.. وأمر الممرض ياخذ سالم لغرفته..
وأن أي حركة ممكن تسبب له أي شي.. مو متوقع..

ابتسم سالم.. وغمز لمحمد.. وراح بكرسيه.. مع هالممرض..


**********************************************

(( حسن ))

لما يالطبيب.. ونقل سالم لغرفته.. نطرت شوي عند محمد.. وعقبها.. توجهت صوب سالم ولدي.. وتطمنت عليه هو بعد..

ولما ارتحت شوي.. كنت بتوجهه البيت.. سألت علي إذا كان يريدني اوصله ولا لأ..؟!!
وفضل يـيلس في المستشفى.. سرت.. وطنشت وجود أخوي سالم..

وأول ما وصلت البيت لقيت حرمتي في المطبخ هي والعيال يتريقون..سلمت.. ويلست وتريقت بسكوت..لأني كنت يوعان..ومالي خاطر اقول شي..

أما ام سالم.. كانت يالسه تهذرب بهالأسئلة.. وكان بالي متكدر.. وصدري ضايج.. حطيت كسرت الخبز من ايدي على الصحن بعصبية.. وطالعت عليها :
يا حرمة.. ياي تعبان بتخليني اتريق مثل الناس..؟!! ولا اسير واهدلج البيت بكبره..؟!!

طالعت علي.. باستغراب :
لالا.. مايحتاي.. كل عليك بالعافيه..

وسكتت.. عقب ماتغير ويها.. لملامح الزعل.. وفجأة.. سمعت شي ضحكني رغم هالظروف كلها..

سمعت.. حارب يقول لايمان بصوت واطي:
أوووث.. ما تثوفين انتي أميه.. مث اللحين باتيث الثاي.. ماتثوفي الوتت مث مناثب..؟!! ماتثوفين يالأبده..؟!!
ابوي مأصب..؟!! لانث حلثتي الهليب من بيتنا..؟!!

قالتله بعصبية:
أنا اللي خلصت الحليب..؟!! ولا انت يا مكسر الأسنان..؟!!

ضحكت بصوت عالي.. ولما شافوني اضحك.. ضحك حارب.. وضحكت ايمان ونورة..

أما ام سالم.. قامت من على الريوق.. واتجهت غرفة النوم.. طالعت على العيال وقلت لهم :
انتوا تريقوا عليكم بالعافية.. وانت يا حارب بسك من ايمان.. خلها تشرب الشاي.. ترى الحليب واايد والخير من الله..

واللحين بسير اراضي امكم انزين..؟!! مابي حشره..


تركتهم.. وكل واحد يحارد الثاني.. ورحت لغرفتي.. ودشيت وصكيت الباب من وراي.. لقيت ام سالم يالسه على طرف الشبريه.. اقتربت منها ويلست احذاها.. شفتها تصيح..

قلت لها:
ياحرمة وش بلاج.. مستويه نكديه..؟!! ياي تعبان مهدود.. وانتي مادتلي بوزج شبرين..


صرخت وقامت من احذاي:
انت تغيرت ياحسن وما اعرف وش بلاك..؟!! البيت استوى جحيم ماينطاق.. وتالي الشي.. تقولي ماده بوزي شبرين وأني نكديه..؟!!

حتى عيالي وهم عيالي ما استويت اعرف عنهم شي.. وانت السبب..؟!!

بس ان شاء الله تكون ريحت قلبك.. وهم مو موجودين.. تركولك البيت بما فيه..؟!!


تغيرت ملامحي.. وزاد همي فوق هم.. وطالعت عليها.. وقلت:
سمعيني يا حرمة.. هذا الكلام كله ماله داعي.. وانا رديت البيت.. اريد ارتاح .. وانا آسف حقج علي.. ولو على عيالج.. بتلاقيهم بأقرب فرصة عندج.. وان شاء الله ما يصير خاطرج.. إلا طيب.. كله ولا زعلج.. انزين..؟!!


مسحت دموعها واقتربت مني :
لاتكون يالس تقص علي..؟!!


ابتسمت لها .. وخبصت بدون ما حس:
والله ما قص عليج.. بس خليهم يظهرون بالسلامة.. وبتشوفينهم اثنينهم.. في البيت عندج..


مقلت عيونها وصرخت بخوف:
يظهرون..؟!!
بالسلامة..؟!!

ليش..؟!! وين عيالي ياحسن..؟!! وش بلاهم..؟!!
أنا قلبي حاس في شي خاشه عني..!!!!

حطيت ايدي على راسي.. وغمضت اعيوني وانا اقول ابخاطري: اش هالبلشه..؟!! يعني مالقيت اخبص وازل بلساني إلا بهالحزه..؟!!
اللحين شنهو اللي بيسكتها..؟!!

ردت.. تسأل وهي تصيح:
عيالي.. يا حسن وينهم..؟!! يا حزني على عيالي وش بلاهم..؟!!

حاولت اهديها.. وفهمتها على السريع.. ان استوى لهم حادث.. وهم بالمستشفى.. وبيظهرون جريب.. طبعاً.. عقت علي كل شي.. وراحت تلبست عباتها.. وهي تصيح وتقول:
اللحين بتوديني لهم..ما يخصني من حد..

واشلون هان عليك قلبك تقص علي.. يعني كنت عندهم امس.. وتقول عند ربيعك..؟!!
هذي آخرة العشرة وياك..؟!!
تخبي علي وانا امهم.. بس ماعليه.. حسابك.. مو اللحين..


ومع هالكلام كله.. ظهرنا من الغرفة..
ورحنا صوب العيال .. وأكدنا لهم.. اننا رايحين مشوار ورادين على السريع..
ووصينا نورة لأنها الكبيرة تداري عليهم..

وظهرنا وتوجهنا للمستشفى.. ولما وصلنا..وديتها لغرفة سالم في البداية.. ولمادشت.. سوت مناحة.. ويالله يالله.. إلين ماخلاها سالم تهدي اعصابها..
وعقب ما يلست وريحت..
وملت عيونها منه..

وديتها لغرفة محمد.. ولما دشت عنده.. بكت.. وصاحت..خصوصاً انها ما شافته.. من مده..
وردت للنواح مرة ثانية.. سكتها محمد.. بكلمتين..
لما خوفها ان كثرة الازعاج.. بتزيد من حالته..

وحتى تطمنت عليه.. وارتاحت.. كانت عيوني كل مرة تدور على اخوي وعلي..

ويلسنا وياه..لفتره
ولما حان الوقت اننا نسير..قلت لأم سالم اننا لازم نسير علشان العيال اللي في البيت.. وعقب ما طاعت وسلمت على محمد.. ظهرت برع الغرفة.. وقبل لا الحقها.. اقتربت من محمد وقلت :
وين عمك سالم وعمك علي..؟!! ما شوفهم..؟!!

ابتسم وقال:
ظهروا قبل ما تيـون بشوي.. ساروا عند سالم..


وأول منتبهت لهالفرحة المرسومة بويه محمد.. مشيت..صوب الباب وقبل لظهر طالعت عليه وقلت:
في داعة الله..

وظهرت من عنده..

ومشيت ويا ام سالم.. حتى ظهرنا من المستشفى.. وعدى هاليوم على خير..



**********************************************

(( محمد ))

مرة الأيام.. وابوي وامي.. يزوروني من صوب.. وعمي سالم ويا عمي علي.. من صوب ثاني..

وفي بعض الأوقات.. كان ابوي وعمي سالم.. يلتقون عندي بالغرفة صدفة..
بس بداية خير أن شاء الله.. مادام.. ما يشتبكون بأي طرف من نقاش.. او زعل..

ونسيت اخبركم..
زارتني بعد نورة البنورة.. ونورة أختي.. وايمانوه الملسونه.. وحروب المشاغب..

وفي وقت غير الزيارة.. ألاقي سالم.. اخوي..ينحاش من غرفته.. ويتربع عندي.. على باله غرفتنا في بيت ابونا..

مرة الأيام..
وسمحوا لسالم.. انه يظهر من المستشفى عقب اسبوعين.. وانظم هو الحبيب.. بزيارته...لزيارة أهلي وكل مرة نكون فيها بروحنا
نتذكر كل مرة شي.. حتى انه خبرني بسالفة الحرامي السكران.. بس كل ما كان يوصل عند سالفة الرياييل اللي يحلف الحرامي انهم شالوني.. وان في واحد كان وراه بالكرسي الخلفي واحذاي..
كان سالم يضحك.. أما انا بالي.. وتفكيري يروح عند الغريب.. اللي غيابه.. يعصــبي بالمرة..وما ألاقيله تفسير

في خاطري.. قلت بنطر اظهر من المستشفى على خير.. وعقبها بيحلها الف حَلالْ..



وعقب مرور شهر بالتمام والكمال..وعقب ما خوزوا اليــبس عن ريلي..
ظهرت من المستشفى..

سوالنا ابوي لي أنا وسالم.. عزيمة عوووده.. وعزم فيها كل الأهل والمعارف.. أما أمي ما صدقت.. عزمت كل حرمة..
تعرفها..أو تعرف صاحبت صاحباتها..
وحظر عمي سالم وعمي علي.. واللي كان حظورهم مفاجأة لبوي.. اللي مارام يسوي أي شي..
الناس والأهل.. سلموا ورحبوا في عمي سالم.. وبردته..
خصوصاً انه غايب من سنين طويله..

الكل متمتعين بهالعزيمة
أخوي سالم.. كان كل مرة يظهر من الميلس ويروح الحوش.. ويتصل على نورة اونه.. يطمن.. عليها.. لانها بروحها..
أما أنا.. كان بالي يروح ويــي عند عمي علي اللي ملامحه ماتبشر بالخير..
كانت عيوني تراقبه.. بين حين وحين..

قطع علي التفكير صوت حارب أخوي.. اللي كان واقف احذاي :
مأمد.. لح إند ثالم لنه يليدك..

خوزت عيوني من على عمي علي اللي كان يالس ويا عمي سالم وطالعت عليه.. لقيته.. كاشخ..
لابس كندورة وقتره وعقال.. وكأنه معرس.. عيني عليه بارده..

ابتسمت.. وحبيت اطفر به.. رديت أقول :
حارب ما اسمعك ياخي ارفع صوتك..؟!!

المسكين رد.. ورفع صوته.. مرة ثانية.. طالعت عليه وأنا ماسك عمري من الضحك :
حارب.. وش بلاك ما ترفع صوتك.. ياخي شو تقول ..؟؟؟؟

رد..مرة ومرتين وثلاث.. يرفع صوته.. وبآخر مرة طالعت عليه :
أقول.. عطني بقفاك.. ما تعرف ترمس بصوت عالي..

فجأة..
عق القتره والعقال من على راسه وفرهن بالأرض.. وطالع علي وهو سوى حركة بيدينه كأن مكرفون وقال بصوت زلزل الميلس بكبره:
إيث فيك..؟؟؟
ما تـثـمــــــــــــــــــــــــأ..؟؟؟؟؟؟؟
أتولك.. ثـــــــــالم.. ثــــــــــــــــــــالم.. يلـــــيدك في الحوث..؟؟؟؟؟؟؟؟؟
ثـــــــــــــــالم يليدك..؟؟؟؟
يا طفث..

وسكت..

كنت منصدم.. الهدوء عم على الميلس ابكبره.. طالعت على المعازيم.. لقيت الكل يطالع فينا..

طالعت على حروب.. وكنت ممقل عيوني..
لما شافني على هالحالة.. ابتسم.. ونزل وأخذ القتره والعقال والقحفيه وحط عينه بعيني.. وقال :
أهثن.. ألثان تنذف أدنك مله ثانيه

وراح برع الميلس..وهو ميت من الضحك

طالعت صوب المعازيم.. لقيتهم يضحكون.. استأذنت.. وويهي قافط بالمرة.. ورحت الحوش عند سالم.. ولما شفته..قلت:
إذا طلع اللي عندك ما يستاهل القفطة اللي قفطني إياها أخوك حبه إلا ربع بسوي فيك.. جريمة..

ضحك.. وهو يحط جواله داخل مخباه:
صوته وصل لهني.. على ما اعتقد.. يمكن نورة سمعته..
وبدأ يضحك ويطنز..


طالعت عليه بنص عين :
بتقول وش عندك.. ولا اسير..؟!!
لا عادي.. روح.. مو مشكلة.. بس..
قبل لا تروح.. خذ ..

ومدلي ايده..

اقتربت منه .. وشفت اللي بيده ورقه.. مديت ايدي وخذتها وقبل لا ابطلها سألته:
شنو هالورقة..؟؟؟؟


طالع علي.. واشر صوب الباب وقال :
يا واحد.. عطاني اياها وقالي عطها.. محمد..وراح..
حاولت فيه يدش.. بس ما طاع..
قال مستعيل..
بس بطلها وقولي اللي فيها..

استغربت من كلامه.. رحت صوب الباب.. وبطلته.. وظهرت في الشارع اتلفت يمين ويسار.. قلت يمكن ألاقيه.. بس كان الشارع فاضي..

دشيت وصكيت الباب.. ورحت صوب سالم وقلت:
كيف شكله..؟!!

وبدأ يوصف:
وسط.. لا هو طويل ولا قصير.. حنطاوي.. بس.. ملامحه جميله..
جسمه معتدل..
لابس كندوره سوده.. ولابـــ...

قاطعته:
يعني ما كان مغطي ويهه

استخف بدمه:
ليش يستحي.؟؟؟؟
هههههههههههه
حطيت ايدي على راسي وقلتله:
يا ثجاااااالة دمك..
أقول.. اذلف وعطني بقفاك.. وخلني اشوف هالورقة..أحسن لي


أشر بيده وهو يمشي.. لصوب الميلس:
خلاص.. خلاص.. بروح.. بس اقول..؟!!


طالعت عليه:
خير شنو عندك بعد؟؟؟

كمل:
لا ترد الميلس أنت ويا ويهك..هههههههه

وراح..


طالعت على هالورقة وبطلتها.. لقيت مكتوب فيها:

بلا موعد بلا مرسال.. تلاقيني معك بالحال..


مقلت اعيوني.. معقوووووووول..؟!!!!!!

يعني الغريب ..؟؟؟

ويا في بالي على طول انه ما سأل عني.. طول هالمده.. طريت الورقة.. وفريتها.. وأنا أقول:
طز فيك.. لو تموت.. خل هالورقة تفيدك اللحين..


وتوجهت صوب الميلس.. ويلست.. مضى الوقت.. وياني حارب.. ووقف احذاي.. وقالي:
مأمد.. في واإد أتاني ورته وتالي أأتيك إياها .. تثمأني ولا ألفأ ثوتي..؟؟؟

طبعاً خفت يسويلي فضيحة شرات أول مرة.. جاوبته بسرعة:
لالالالا.. ياحبيبي.. هأ هأ.. شو على بالك كل مرة تسلم الجره..إذا أول مرة أبوي سكت.. هالمرة أنا وياك.. بيعقنا في الزبالة
أسمعك حبيبي أسمعك.. ما يحتاي..
بس أي ورقة ..؟؟؟؟ وينها.؟؟؟؟

ومد ايده وعطاني.. خذيتها.. وحطيتها بمخباي.. وظهرت.. للحوش..
وبطلتها..
لقيت مكتوب فيها :


بلا موعد بلا مرسال.. تلاقيني معك بالحال..

استغربت.. واشلون.. وصلت هالورقة..؟؟؟؟؟؟
رحت صوب الورقة الأولى اللي طريتها.. لقيتها موجودة..
يعني الغريب يا مرة ثانية..؟؟؟؟؟

بس هم بعد..
خلك ابغيظك.. وموت.. مُب ياي.. ولو تقلب الدنيا فوق حدر..

وطريتها.. وفريتها ويا الورقة الأولى..

واتجهت للميلس ويلست..كنت يالس وأنا قلبي عند الغريب.. كان واحشني.. بس كنت مقهور منه ومفول...
كانت عيوني تـدور على الرياييل لكني ما كنت استوعب ولا افهم اللي يقولونه...

مر الوقت.. وقمنا نحط العشا.. وياني ابوي وانا في المطبخ ويودني من ايدي وقال :
في واحد من ربعك.. واقف برع.. يريدك ضروري..
حاولت.. فيه يدش رفض..
أكيد ربيعك زعل.. لنك ما عزمته صح.؟؟؟؟ استح على ويهك..
وسر عنده.. وحاول فيه.. وإذا ما طاع ازقرني وأنا بتفاهم وياه...

علشان اسايرالوضع.. وافـقت.. وظهرت وتوجهت للحوش.. ولما وصلت عند الباب لقيت واحد لابس كندورة سوده.. وقتره حمره.. وعقال.. وكان جميل ما شاء الله..
استغربت قلت ما أحيد عندي واحد بهالوسامه..؟؟؟
رحبت فيه وسلمت..وعقب سألته :
أنا اعرفك....؟؟؟؟؟

وعقبها.. قال اللي فاجأني :
اسمعني يا محمد.. مو ضروري تعرفني ولا لأ..يــيتـك قبل وعطيت أخوك سالم ورقة ...... وصلتك..؟!!

من ذهولي.. هزيت راسي هيه..

قفطني وقال:
ليش طريتها عيل...؟؟؟؟


استغربت قلت بخاطري واشلون عرف.. إذا أنا طريتها ومحد كان عندي..حتى ؟؟؟

قاطع كلامي اللي بخاطري:
لا تستغرب.. لكني هم بعد يـــيتك.. مرة ثانيه وعطيت أخوك حارب ورقة ثانيه وصلتك..؟!!!

قلت ابخاطري.. حشى هذا يعرف القبيلة بكبرها..!!!!!
يالله ما علينا.. بس هذا وش أقوله اللحين..؟؟؟
خفت اقول لأ..؟!! يكشفني.. فضطريت أجاوبه بالصج.. قلت: هيه..

رد وقفطني :
وليش طريتها هي بعد...؟؟؟
سكت.. وما رمت أرد...

طالعني وقال:
المهم اسمع...


قاطعته بجرأة وبستغراب :
اسمحلي لني قاطعتك.. بس ممكن تخبرني.. وتقول أنت تعرف شنو اللي مكتوب بالورقة.. ولا لأ؟؟؟


لا ابصراحه ما اعرف..


ارتحت اهني وقلت ابخاطري.. زين والله..

كمل كلامه:
ما اعرف اللي مكتوب بالورقة بس اللي عطاني اياها اعرفه..


عقدت الحيابين وسألت :
منو هالشخص...؟؟؟؟


ابتسم وقالي باستهزاء:
ما يحتاي تنكر وتسوي عمرك ما تعرف.. لنه نفس الشخص اللي انت تعرفه..
المهم..
يقولك.. تراه اليوم يترياك.. لما تخلص العزيمة.. تعال ولا تتأخر..

عصبت اهنيه وقلتله:
هي أنت اسمعني عدل.. سر عنده.. وقول ما بايي..
انزين..؟؟؟
ولا امشي على كيفه...


اقترب مني وحط ويهه بويهي وقال وهو واثق من عمره:
أنت اللي اسمعني.. بقولك اللي هو ما قاله..
بتيي .. لنك لو ما يــــــيت.. ما بيحصلك طيب..
خلك خوش ريال وتعال..
وما يحتاي لتفويرت الدم مالتـك..لأن العصبية تقصر العمر..


ورد وقف وقفته الأولى.. بعيد عني شوي..وابتسم.. وهو يطالع علي..

حطيت عيني بعينه وقلت بسلوب حاد:
خل نصايحك لك..
وأعلى ما بخيلك اركبه أنت وياه.. ولاني بياي.. واللي ما تطوله بيدك.. طوله بريولك..
وإذا على بالك خرعتني أنت غلطان.. لنته ولا عشره من امثالك
يخرعوني..

وقول للغريب.. أن كان ريال لا يطرشلي صعاليك.. وإذا بخاطره كلمه يــي ويقولها بنفسه..
واللحين أقدر اقولك.. عطني بقفاك..


اقترب مني.. اكثر.. وببرودة اعصاب قالي :
جرب.. وشوف..


قاطعنا..
صوت ابوي من البعيد ينادي.. درت لوراي اطالع صوبه وهو كان ياي ناحيتي .. درت براسي..بسرعة.. وأنا أقول للريال :
لا تقول أيــ...........
وسكت..

تفاجئت.. لنه مو موجود..

تلفتت.. حولي مالقيت هالأدمي.. اختفى..
ظهرت للشارع أطالع.. اشوفه فاضي.. وين سار ما أدري..؟؟؟ وأشلون اختفى ما اعرف..؟؟

وفجأة
لقيت ايد انحطت على كتفي.. درت علشان اشوف منو هذا..؟؟؟

*********************************

يتبع
VVVVVV
VVVVV
VVVV
VVV
VV
V

لقيت ايد انحطت على كتفي.. درت علشان اشوف منو هذا..؟؟؟



**********************************************


(( الجـزء العشرون ))


لقيته ابوي يقول :
وين ربيعك..؟!!
أفا.. منقود عند العرب خليته يسير.. مافي بويهك ماي الحشيمة..
ليش ما زقرتنـي علشان اقنعه ..؟؟؟

ابوي كان يرمس.. وياي بس كنت صاخ..مستغرب على اللي يصير
يعني معقول اختفى وبدون ما أشوفه..؟؟؟؟

هزابوي كتفي..وهو يقول :
محمد وش بلاك..؟!! فيك شي..؟؟

رفعت ايدي وحطيته على راسي .. ودرت صوب ابوي :
كان .. كان.. اهني.. بس ما اعرف واشلون اختفى..؟؟

سكت ابوي.. وأخذ يطالع فيني باستغراب.. تلفت وهو يقول :
خلاص.. الكلام اللحين مايفيد.. والريال قد سار.. دش وانا ابوك عند الرياييل تراهم داخل يتريون..


مشيت ويا ابوي للميلس.. وكل الوقت وأنا افكر بالريال هذا اللي ما اعرف اشلون اختفى.. كأن الأرض.. انشقت نصين وابتلعته..


وعقب ما ساروا الناس.. وفضى البيت من المعازيم.. وتأكدت أن اهلي كلهم ارقود..
دشيت غرفتي وصكيت الباب من وراي.. ويلست فوق الشبرية.. افكر..
كنت متردد.. اسير ولا لأ..؟؟
والغريب أحسن مني بشنو يعني..؟؟؟

محد أحسن من حد.. ولا هو ولي علي.. علشان اسير له متى مابغاني..؟؟

لكن..؟؟

الأفضل لو اسير علشان افهم سالفة الريال هذا بو فزعه..
أوووهوووو ليش ما اقول الصج.. اني متوله ومتشره عليه..؟؟؟ بلا هالحجج.. كلها..

بسير وهناك.. بغسل شراعه زين..واللي يصير يصير

ظهرت من غرفتي شوي شوي.. وتوجهت لغرفة سالم.. وطقيت الباب.. وأول ما بطل الباب شوي.. طلع راسه وقال:
هــاه..؟؟ خير وش تبا..؟؟؟

قلت بصوت جريب من الهمس:
أوووص.. أنت وويهك.. بذمتـك.. في حد يقول.. هـاه..؟؟
ليش تنهق اللحين..؟؟
مرة ثانية قول آمر.. تدلل .. وإذا ضاق عليك الوقت قول نعم..
طالعني بنص عين :
نعامة جربانة ترفسك أن شاء الله أنت ويا فلسفتك.. اللي ماتظهرغير بانصاف الليالي ..

خلصني وقول وش تبا..؟؟
أريد ارقد...

قلت ابخاطري ماعليه..بتحمل فظاظته.. إلين ماخذ اللي أريده.. ابتسمت :
أخوي.. يا حبيبي.. فز من عند الباب وروح يـــيب لي سويتش سيارتك.. بسرعة..


ليش أن شاء الله..يا شيخ محمد على وين بتسير بهالحزة..؟؟ أنت مو صاحي والله.. شكلك.. مشتاق للمستشفى مرة ثانية صح..؟؟


عقدت حيابيني وقلت بطريقة استهزاء وانا ادفع الباب علشان أدش غرفته :
وش خص هذا.. بذاك..؟؟
يالله عاد لاتسوي عمرك فهيم.. بتعطيني ولا لأ..؟؟

ومديت ايدي..

طالعني من فوق لتحت.. وراح.. وياب سويتش سيارته من فوق الكمدينو.. وحطه بيدي وقال وهو يأشر بصبعه:
إذا زختـك وزارة الدفاع ما يخصني.. تصرف بعمرك.. قول أنك أنت اللي دشيت غرفتي وهفــيت السويتش..
ظهرني من السالفة..
أما ..

وراح صوب شبريته.. وفر عمره وتـلحف.. وكمل وهو مظهر راسه من تحت اللحاف:
أمــا..
إذا عدت السالفة..ومشت على خير..
خل المفتاح وياك..ولا تسويلي ازعاج يوم بترد ..سمعت..
واللحين فارج وأنت ابخير أن شاء الله..

وظهر ايده من تحت اللحاف وأشر صوب الباب:
وصك الباب عدل من وراك..

وغمض عينه..

ركضت صوبه.. ويلست عليه.. وبندت المكيف.. وشغلت المبه.. وهربت.. بس عقب ما خبصتله الغرفة..
وقلت :
تستاهل علشان مرة ثانية.. ما تـتأمر..


وظهرت ابسرعة.. قبل لا يلحق علي.. وركبت السيارة.. وانحشت.. صوب البحر..

وطول الدرب والافكار تعصف ابراسي.. على هالغريب اللي صج غريب..

ولما وصلت..
في البداية تيـبست في السيارة.. لأول مرة أحس أني غريب عن المكان..
ظهرت من سيارتي..
وتوجهت للبحر..
الله يا كم اشتــقت لك يا بحر.. وأنت يا هالرمل.. وفريت نعولي..
وخليت ريولي تغوص بين حباته..
هم بعد وحشتـني موووت..

وبديت.. اتنفس من كل قلبي.. وأنا مغمض عيوني.. ورحت اركض.. واركض.. وأنا اضحك..
حسيت بشوق شدني حيل.. وأنا ما كنت اعرف..


ولما حسيت بالتعب..
فريت عمري على هالرمل.. وطالعت على هالسما.. اللي قمره ونجومه.. يعاتبوني بهدوء..
خليت عيوني.. تنتقل من نجمة لنجمة.. أطالع .. وفجأة..

شفت راس الغريب..واقف من فوق

قمت ابسرعة.. وأنا انفض التراب عني بخوف وبغضب بنفس الوقت :
لا حول ولا قوة إلا بالله.. أنت ما تستح على ويهك.. شو تبا تموتـني..؟؟
ماتعرف اتحمحم..؟؟
كم مرة لازم أقولك..
كم مرة لازم أكرر.. أنت ويا ويهك.. ما تعرف أن التكرار يعلم الحمار..؟؟


ضحك الغريب اللي قال:

عيل ليش زعلان يوم تكرر حق عمرك هالكلام..؟؟
وأنت صاج.. التكرار..( وأشر علي )..يعلم الحمار..



عصبت.. وصرخت:
وهذا استقبالك لي عقب هالمدة..؟؟
مو غلطتك.. بس صج من قال.. على شينه قوات عينه.. رغم أنك أنت الغلطان والمقصر.. ياي تأشر علي وتقول حمار..؟؟
ماعليه..
بس تراني مايــيت علشان رفيجك..أو لني متخرع منه.. واللي يسوي عمره.. بوفزعه..
انزين..؟؟

طالع علي بعيونه.. ورفع أبة الجاكيت.. اللي هو لابسه.. وقال:
لاتزعل ولا تاخذ على خاطرك مني.. واعرف أنك زعلان.. بس صدقني أني ما نسيتك..


قلت بستهزاء وبينت أن كلامه مو عايبني :
أهـــا..؟؟
قلتلي..؟؟
ما نسيــتني..؟؟
أنزين وش بعد..؟؟
لا تقول أنك مارقدت الليل.. وكنت تفكر فيني..؟؟
وكنت تسمع أغاني أم كلثوم.. ومتوله علي..؟؟


حط يدينه في مخابي الجاكيت.. والتزم السكوت.. وأخذ يطالع على البحر..بعيونه.. الواسعة..والوشاح.. مغطي ويهه.. ومو ظاهر منه كالعادة..
غير عيونه..
ونزل بجسمه.. والتقط..بقفازه.. حصى صغيرة من الرمل..
وفرها في البحر..

حسيت الغضب اللي كان محتلني.. بدأ يزول.. بمراقبة الغريب..
رغم.. استهزائي.. فيه.. إلا انه.. ساكت.. ويطالع صوب البحر..
أخذت اتأمل بعيونه.. اللي ضو القمر ينعكس عليهم..
وفجأة..

دار بجسمه صوبي وقال :
تعرف يا محمد.. شو مشكلتــك..؟؟


وجهت بنظراتي لعيونه..عقب ما قطع تأملي سؤاله وقلت بكل هدوء :
شـو..؟


مشكلتك.. يا محمد أنك ما تثـق فيني.. أوثـق فيني لو تريد.. تكون رفيجي صج..؟؟
على الرغم.. أني ما أدور على الرباعه.. والصداقة..لا وياك.. ولا ويا غيرك..

حسيت بكلامه.. غرور.. فوق الحد.. رفعت حيابيني.. وحطيت يديني على خصري وقلت بكل عصبية.. وشططيت وغلى الدم بعروجي :
لـَـهْ..؟؟
يعني أنا اللي ميت فيك مره.. ترى طز فيك أنت واللي يفكر يرابع واحد مو ربيع أصلاً..
لو تعرف شو تعني الرباعه..؟؟ ما كنت رمست بغرور..
أنت غلطان يوم تفكر أنك ربيع..
لو كنت تعرف شو الرباعه.. ما كنت رمست بكل ثقة..!!
عيل وينك عني هالمده..؟؟ طحت بمشاكل وظروف.. وين كنت عني حزتها..؟؟
كنت بين الحياة والموت.. وأنت يالس اهني.. أو الله يعلم بأي دار.. واللحين يالس تقول رباعه..؟؟
تشب.. تشب..
ارمس بكلمات على قدك.. وترى الرباعه على اللي مثلك حرام.. صج حرام..


لا طالعني ولا شي.. مشى بخطوات هاديه.. وهو حاط يدينه بمخابيه.. وقال:
واثـق من عمري.. ولا بنطرك.. تخبرني واشلون ممكن تكون الرباعه...
يامحمد..


كنت ناوي أروح.. وارد عالبيت بس لما سمعت كلامه.. عاندت وقلت:
أسمعني زين.. شكل اللي ترابعهم.. كبروا راسك.. عالفاضي..
وعلى الشكل اللي طرشته لي.. باين عليه الجواب..
وأظن ردي يسدك.. يابو الشباب..


ضحك.. باستهزاء :
لا تتمصخر عليه.. لا عقب بيسوي فيك شي منت قده..


لا.. أحلف بس.. ما قلتلك.. مكبرين راسك على الفاضي.. وما صدقتني..؟؟
أقولك.. صج.. الطيور على اشكالها تـقع..
رفيجك.. مغرور وأنت تناسبه وااايد.. كأن ربي خلقكم لبعض..
ومرة ثانية لو عندك.. شي.. قوله ابنفسك..
ولا تطرش لي.. صعلوك من صعاليكك .. سمعت..؟؟؟

هز اكتوفه وكأنه مو مهتم :
ماعليه..
وصدقـني..لما اقولك.. أنت مو قده.. صج صج.. أنت مو قده..


ارتسمت تعبيرات العصبية على ويهي.. وكنت ماسك عمري بالغصب علشان ما انفجر عليه.. بس كنت اظهر عكس هذا وقلت بهدوء :
ليش مو قده..؟؟ من يكون علشان ما أكون قده..؟؟
وعلى فكرة.. رفيجك هذا ما يستحي على ويهه ليش..؟؟
يعني ما يسد أنه ماحشم أخوي ولا ابوي هم بعد يسيـر بدون ما اشوفه..؟؟ حشى اختفى تقول يــــــــني..
وياي اللحين تقول أنه أحسن مني..؟؟


لالا..يا محمد.. ماقلـــتلك.. انه احسن منك.. قلت انت مو قده.. ومثل ما قلت بنفسك.. يـــني..
وحد يتضارب ويا الينــانوه..؟؟

سكت.. وقمت من على الرمل.. ووقفت احذاه :
مو غشيم جدامك.. علشان تقص علي بكلمتين.. بس اللي اريد اعرفه.. هذاك منو بالضبط..؟؟ واشلون اختفى..؟؟


مشى.. وبدون ما يلتفت لناحيتي :
لو قلت ما قلت ما بتصدقني .. اشقايل تباني اقنعك.. بشغلة..
أنت ماتريد تفهمها..؟؟

لكن برد عليك.. هذا لا تسأل عنه.. ولا عن أي شي.. يخصه.. وابختصار..
عندك شي غيره..؟؟


صرخت من وراه بعصبيه:
عيل ليش طرشته وخليتـني آيــي..؟؟ كان أحسن لو ما يــيت..


دار وراه وحط عينه بعيني :
اللي يسمعك.. ما يقول أنك طريت الورقة بالمرتين.. ولو ما يا الريال وقالك.. أني انطرك هني ما كنت يــيت..
يعني فكرة أنك ماتيــي
كانت في بالك..

سكت وكنت اقول بخاطري.. حشى خبره اني طريت الورق بالمرتين بس.. وأشلون عرف وأشلون..؟؟ أدفع عمري كله واعرف واشلون..؟؟


خير يا محمد أشوفك ساكت.. ماترمس تقولي شي..؟؟
عيل ليش يــيت لو ماكنت تريد تــيي.. محد جبرك.. ولا تسوي عمرك هادي.. وأنت بتاكل عمرك من الداخل..
ولا اجبرك.. تيلــس .. تريد تروح..؟؟ تفضل.. المكان بكبره.. ما بيودك..
وخوز يدينه من مخابيه.. وأشر صوب السيارة..
والدرب اللي يــيت منه.. أكوه جدامك.. لو كنت مضيعه..

ودار معطني ظهره.. ومشى..


مارمت اتحمل استـفزازه.. يــيت صوبه ووقفت ابويهه.. وأول ما رفعت ايدي علشان اطقه
ظهر ايده من مخباه ويود ايدي بقوة وقال:
لو طقيت.. بدفعك الثمن غالي.. لكن.. بـثبتــلك أني أحسن منك..


وبطل ايدي وفرها.. ومشى.. وهو يقول :

بأكدلك.. اني ما نسيتـك.. وما كنت مطنشك.. علشان ترتاح..
لكن إذا ما صدقت..؟؟ هالشي راجعلك..؟؟
لكن أحب أني اخبرك واثبتلك.. بأن اخبارك عندي أول باول....واعرف كل شي.. من أول مشكلة بدت عندك.... حتى آخر مشكلة اللي هو الحادث اللي استوى لك أنت واخوك..


يسد ولا اقول بعد..؟؟


استهزأت..عليه.. وأنا محاول انرفزه وأخليه يتعصب :
هذا الكل يعرفه.. حاول مرة أخرى..


طالع علي بعيونه وبكل ثقة :
مو مضطر اني اثبتلك.. بس بثبتلك على مزاجي..
مو كان في شخص ثالث وياكم في السيارة..؟؟
وتوفى..؟؟


ضحكت عليه ويلست على الرمل :
وهم بعد.. هذا أحيد عيال حارتنا يعرفوه..ومو صعب عليك.. أنك تسأل وتتخبر.. حد من حارتنا.. أو يمكن ياك خبر من حد بالغلط كان يرمس عني.. وعقب تأكدت انه انا هالشخص..


كمل مشيته وهو يقول:

وهم عيال حارتـك.. يعرفون.. أن في شخصين كانوا لابسين اسود بأسود يــو وساعدوك.. وانقذوا حياتك..؟؟
ولا يمكن يعرفون..ان سبب الحادث هو محاولتك لأنقاذ اخوك سالم.. لنه مصاب بنزيف..؟؟
ولا يمكن يعرفون أنك.. كنت ميود ايد ابوك.. وكنت بتكسرها.. وما بطلت إيده.. إلا عقب طلوع الروح..؟؟
ولا يمكن يعرفون ان ابوك اهو سبب هالنزيف لما يود حجره أو طوب بالأصح والأدق.. وكان يريد يفره عليك..عقب مادرت له ظهرك بس سالم.. ركض.. وانقذ حياتك.. واهو انصاب؟؟

ولا..؟؟


واقـترب مني وقال:
أكمل ولا يسدك لاهني..؟؟


صخيت.. لأن صج.. محد يعرف نص اللي قاله .. وقفت وكلي استغراب.. وحتى عصبيتي تحولت لخوف.. وانكار :
أنت منو يالغريب..؟؟

طالعني بعيونه.. اللي تحمل اسرار أضعاف أضعاف البحر :
أنــا الغريب..

وتجاوزني.. وكمل مشيه على الرمل.. رحت امشي وراه .. وكنت أسأله:
انت من الانس ولا اليــن..؟؟
واشلون تعرف كل هذا..؟؟
إذا اصلاً ما كنت أنت موجود..؟؟
يالغريب بديت أخاف منك..؟؟


وبدون مايدور صوبي..ويتلفت :
لا تخاف مني.. لأني مو مصدر خوفك اللحين..
خاف من اللي ياي وأنت غافل عنه..

استغربت.. من كلامه.. شنهو اللي ياي بعد..؟؟
ركضت.. ووقفت ابويهه :
عن شو تتكلم بالضبط..يالغريب..؟؟

رفع بيدينه الوشاح أكثر عن قبل :
اتكلم عن عمك علي.. اللي غفلت عنه هاليومين .. سر.. عنده..
وتطمن عليه..
واللي اقصده.. بتشوفه.. ابنفسك..
لكن.. مو زيارة والسلام.. رد شرات قبل وبــيت عنده.. لنه محتايلك واايد.. ومايروم يحرجك... ويطلب منك تهد أهلك.. وتيلس وياه..

درت بجسمي.. صوب البحر.. وتنفست من قلبي .. وقلت :
بس احسك تقصد شي ثاني..؟؟ أنت تعرف شي عن عمي علي وما تريد تقوله...؟؟


مشى مبتعد عني.. خطوتين.. وعقبها وقف نفس وقفتي :
هذا الشي لازم أنت تكشفه ابنفسك.. لأني ماروم اساعدك.. أكثر من جذيه..
ومثل ما قلتلك..
تابع شوري وما بتندم..


تعرف يالغريب شو مشكلتك..؟؟


ضحك وقالي:
اشوفـك قلبت الموازين وصرت تسألني..
لا ما أعرف قول..؟؟

مشكلتك.. أنك تقول وتورطني.. وعقبها تقول مابندم.. أنت ما تعرف أني من يوم ما شفت ويهك.. أقصد اللي باين منه وما شفت الخير..؟؟


لا يا محمد غلطان.. بتشوف الخير وتأكد.. ان عقب ما بتكشف المتخبي.. بتشكرني.. على كل اللي اسويه وياك..

واللحين روح وريح.. وارتاح.. وبكره سير عند ابوك.. واستأذن منه انك بتيلس كم يوم عند عمك علي.. واقنعه.. بس انتبه تخبر.. ابوك.. بسر عمك علي..انتبه..!!

لا تخاف.. مستحيل افضح سره عند منو كان.. ومهما كانت الظروف.. بس.. أنت يالغريب.. انت.. منو..؟؟
لا تقول الغريب..
وأريدك تخبرني.. واشلون تعرف كل شي.. عني.. وانت ماكنت موجود..؟؟


ضحك :
منو قالك ماكنت موجود..؟؟


سكت.. وعقدت حيابيني :
لأني ما شفتــك.. ابد..


أشر علي :
خلك على اللي براسك يامحمد..
ولا تسأل ..وإذا فكرت تعرف الجواب.. ما بتقدر.. حتى تتجاوز كل الخطوط اللي تمنعك... من معرفت كل الأسئلة..



أي خطوط يالس ترمس عنها... ؟؟ ما فهمتك يالغريب..؟؟


ضحك.. وغير الموضوع ابسرعه:
شوف القمر والنجوم..؟؟ مو بالدنيا ومافيها..؟؟
هالمكان وااايد حلو.. طالع على القمر.. وشوفه زين.. بشو يذكرك..؟؟


رفعت راسي.. أطالع على القمر..وقلت :
يذكرني فيك.. احسه غريب مثـلك..

وأنت بشو يذكرك..؟؟

كانت عيوني على القمر.. وكنت انطر رد الغريب على سؤالي..
لكن لما شفته ما رد علي.. نزلت عيوني من على القمر وطالعت صوبه.. بسرعة.. ولما شفته واقف .. ساكت..

ابتسمت.. وقلت :
تصدق اني خفت مالاقـيك..؟؟

طالع علي :
لما بيــحين وقت أني لازم.. اروح.. بروح..
لكن ليش قلت ان القمر مثلي غريب..؟؟


انت غامض.. ما اعرف شي عنك.. غير هالمكان واسمك.. وما اعرف حتى ملامح..ويهك..؟؟
غير عيونك الوساع.. ما اعرف شي ثاني..وجريب على قد بعدك..
والقمر مثلك.. غامض غريب.. رغم بعده.. تحس بقربه..
وما تعرف ملامحه.. غير من المعلومات والصور اللي تظهر بالثقافه..
لكن بينك وبين القمر.. ماتعرف حتى ملمس صخوره..
يعني..
على.. قدر مالبعض يعتبروه.. مجرد كتله من الصخور.. هم بعد في ناس تعده.. ألماس بوسط السما..



وفجأة.. طلعت براسي فكره.. وقلت بسرعه وبلهفه:

بخاطري أعطيك شي يالغريب بتقبله مني..؟؟

وقف متفاجأ.. وهز راسه.. شو..؟؟

فتشت مخابـــيي.. ولما مالقيت..الشي طالعت عليه وأشرت :
انطرني شوي بيــيبه من السيارة..لا تنحاش..


رحت اركض..بكل سرعتي.. للسيارة ولما رديت

لقيته.. يطالع علي.. باستغراب..
اقتربت منه.. وأنا اتنهد.. من كثر الركض..وقلت :
غمض عينك..


هز براسه .. لأ..


استغربت ليش الرفض.. رديت اطلب منه يغمض عيونه..وشفت الحاحه يزيد بالرفض..
قلت:
أنت ليش ترفض تغمض عيونك على بالك باكلك..؟؟
عندي لك شي وبعطيك إياه..؟؟
يالله غمض..


طالعني بعيونه.. بنظرة :
آسف يا محمد.. اعذرني.. مقدر اغمض عيوني وياليتك.. تلمسلي العذر عندك..صج آآسف..


استغربت منه بالمرة.. لكني احترمت رغبته.. لأني واثق منه..
ابتسمت .. وظهرت يديني من ورى ظهري ومديت ايده.. اللي متغطيه هم بعد بالقفاز..
وحطيت..

***************************************

بيده الجوال..

سمعت ضحكة الغريب وهو يقول:
شو هذا..؟؟


ضحكت من ضحكته اللي صج توسع الصدر.. خذه.. لك.. هذا جوالي.. علشان متى ما اريدك.. اعرف واشلون أوصلك..


مد ايده.. ويود ايدي وحط الجوال بيدي وقال:
اعرف أنه جوال.. بس هم بعد ما أروم آخذه.. ومنو قالك.. أني ما أروم أشتري جوال..؟؟


لا يالغريب مو قصدي جذيه.. بس.. دخيلك.. خذه علشان خاطري..
اريد اتطمن انك ما بتختفي من حياتي فجأة..
لأني ياما يــيت اهني ومالقيتك.. وأكون محتاي لك..إذا كنت تعزني خذه..


طالعني :
لما ما كنت تلاقيني.. كنت اسوي هالشي بالعماد.. لأن بعض الشغلات.. ما تحتاي لي فيها.. بالعكس..
ما بتنحل إذا ما واجهت مخاوفك.. ومشاكلك ابنفسك..
ترى مو كل شي.. لازم.. اكون موجود..فيه..


المهم.. يالغريب.. خذه.. ولا تطول السالفة..


لأ.. يا محمد.. مابخذه..وإذا احتيــتني بأي وقت.. تعرف وين تلاقيني..
هني.. مكاني..
ازقرني.. وبتلاقيني جدامك..
لكن..
هذا الجوال ما باخذه..
آآآآآآآآآآآسف..


أنزين .. لاتاخذه لك.. خله وياك.. أمانه.. احتفظ به..
وردله لي بكره.. شو قلت..؟؟


سكت الغريب.. لفتره.. عقبها قال:
انزين.. بكره.. بكره..

أقول.. محمد..؟؟
ليش.. ما نتسابق..؟؟
ونشوف منو اسرع..؟؟


ضحكت.. وقلت بكل خقه:
محد سبقني ولا بيسبقني..


يالله بس انطر شوي..
رفعت كندورتي.. وربطتها على خصري..
وتأهبت للسباق ورسمت خط.. وقفت على يمين الخط وهو بيساره..
وبدأ السباق..

ركضت وركضت وركضت.. ولما كنت اركض قلت:
صح ماقلت لوين بالضبط نوقف.؟؟؟

ما سمعته يقول شي.. على بالي خدعه.. كملت ركضي وعدت سؤالي..
بس لما تأكدت.. أن السكوت.. هو الرد الوحيد اللي ألاقيه..
وقفت.. وأنا اتنهد.. وتلفتت..
يمين يسار..
بس.. على وين سار.. ما أدري..
اختفى الغريب..

طالعت بعيوني.. صوب البحر والشاطئ.. لقيت المكان فاضي..
توجهت صوب نعولي..
بحزن..
واخذتهم..
وركبت السيارة ورديت البيت.. ودشيت غرفتي..
وتسبحت..
وصليت ركعتين.. ورقدت..

****************************************

وفي صباح هذا اليوم..

نشيت على صوت سالم اللي لعفس الغرفة فوق حدر.. وأخذ يطقني..

سحبت اللحاف اريد ارقد.. لكنه.. سحبه قبلي.. وفره على الأرض.. وهو يقول :
وش رايك بالرقاد..؟؟
حلو صح..؟؟
مثل العسل..صح..؟؟
يجــــــنن..؟؟
بس..
ما بترقد..
حس فيني.. باللي سويته أمس.. تستاااهل ما بــيـيك..

وبدأ يصرخ.. نش.. نش..وبند المكيف..
وأخذ كوب الماي اللي فوق الكمدينو.. ورشه علي..
وهرب.. وخلا الباب مبطل

كنت.. اقطر ماي.. يلست بعصبيه وقلت بالصوت العالي..:
والله لا راويك يا سليم الئيم.. يا ويلك مني..
وقمت من فوق الشبرية..

وتوجهت صوب الباب وصكيته بالمفتاح..

ورحت..اتسبح.. وعقب ما خلصت..
لبست.. وتجهزت..
وكنت حاط براسي بكلم ابوي في الموضوع..
عقب الريوق

ولما كنت بظهر..
تذكرت... بآخذ سويتش هالأهبل.. وبعطيه.. وعقبها بذله

توجهت صوب الكمدينو.. وأخذت المفتاح.. لكن لما درت أريد اكمل مشيتي.. واروح..
وقفت.. وتيبست ابمكاني..
كأني شفت.. شي فوق الكمدينو..
بس..
مو..

*****************************************

كأني شفت.. شي فوق الكمدينو..
بس..
مو..

*****************************************

ودرت أشوفه..

مو هذا جوالي..؟؟
واشلون وصل لهني..؟؟

تيبست في مكاني .. كنت مستغرب وأشلون وصل جوالي لهني؟؟
قطع علي اصوات أهلي وهم يزقروني علشان الريوق..
خذيته وظهرت من غرفتي.. ورحت صوب أهلي.. وقبل لا اتريق.. اقتربت من سالم وعطيته سويتش سيارته.. ويلست
وبالي كان عند الغريب..
وارتفعت اصوات اخواتي نورة وايمان.. هالمرة..

طالعت صوب اليــميع لقيتهم يضحكون.. ماعداي..وماكنت فاهم شو سبب ضحكهم..؟!
طالعني ابوي وهو يضحك.. ولما شافني شارد الذهن.. سأل :
خير يا محمد..؟؟ فيك شي..؟؟

حطيت كوب الشاي من ايدي.. وطالعت عليهم وابتسمت :
لا مافيني شي..بس ابسأل.. حد يا اليوم وسأل عني..؟؟

الكل طالع في بعضهم البعض...وعقب قال ابوي وسالم بنفس الوقت :
لا محد.. سأل عنك..

وعقبها كمل ابوي :
تـنطر حد معين..؟؟

هزيت راسي.. لأ..بس مجرد سؤال..
وأخذت كوب الشاي.. وكملت.. بهدوء

نطرت حتى ابوي كمل ريوقه..وقام.. رحت من وراه.. ودشيت الميلس..
ويلست وياه..
وبدينا نسولف كل مره على شي.. وهو يقرأ بالجريده..
عقب تذكرت كلام الغريب.. تشجعت.. وأنا شابك يديني في بعضهم..
وقلت:
يــُبه.. ابستأذن على شغله.. بس.. خايف تتضايج وتعصب..؟؟

ترك الجريده من ايده.. وطالع علي بتركيز اكثر :
لا تخاف.. قول وش عندك...؟؟

سكت.. في البداية عقب.. يمعت شجاعتي :
تعرف عمي علي..؟؟
ولده مسافر.. واريد ايلس عنده.. كم يوم.. وكل يوم بايــي عندكم اهني.. وبطمن عليك وعلى أمي وأخواني وأخواتي..والله ما بقصر أن شاء الله
وش رايك..؟؟


سكت.. وهو يطالع علي.. قلت ابخاطري أن شاء الله تكون بداية خير..
أشر صوبي:
بس منقود بتكلف عليه..؟؟


لا يا يــُبه بتكفل بكل شي حتى يرد ولده...؟؟ وش رايك..؟؟


لو ما كنت اعرف هالريال واعرف كم تعب ويانا ماكنت وافقت..
خلاص.. توكل على الله.. بس طوف اهني كل يوم..سمعت..
ولا بردك بنفسي لهني.. وبحلف عليك ما تروح عنده خير شر..


استانست..
وقمت من مكاني.. ورحت صوبه وحبيت راسه..

وعقبها..

سرت غرفتي.. وخذيت ملابسي واغراضي.. وسلمت على امي واخواني الصغار..
وفهمت امي شرات ما فهمت ابوي..
ويالله يالله حتى طاعت..

وخليت سالم يوصلني صوب عمي علي.. وهو راح صوب عمي سالم..


***************************************

(( العم علي ))

كنت يالس في الصالة.. إلا دش علي محمد..
استانست.. وقمت صوبه ركض.. وخذيته بالأحضان وانا اصيح..
حسيت بردته..
ردتـلي الحياة..
واستانست زياده.. لما شفت وياه الشنطة.. عرفت انه يايــني هالمرة.. وبيطول أن شاء الله..

أخذ الشنطة.. وتوجهت وياه لغرفته..

ورتبنا اغراضه..

وخذتـنا السوالف..
وقضينا نص هاليوم اهني والنص الثاني في بيت سالم.. ابو نورة
واستانسنا حييييل


*************************************

(( محمد ))


تغيرت كل الموازين لما أبوي وافق أني اقضي هالأيام عند عمي علي..
صرت اروح وآيــي لبـيـت عمي سالم وعمي علي على راحتي..
وبدون أي خوف..

وكنت اقضي مشاويري يا بتاكسي أو أخلي سالم.. يوصلني.. حتى يا هاليوم..

اللي يا سالم عندي في بيت عمي علي.. وكنت يالس ويا عمي في الصالة..
دش.. وسلم ورحب.. وعقب طالع علي وهو يأشر :
أنت..
تعال..

وجهت بعيوني باستغراب صوب عمي علي.. وعقب صوب أخوي وأشرت باصبعي على صدري :
أنـــــا..؟؟


ضحك.. وهو يستهزأ:
هيه أنت ولا أبوي ..؟؟

قمت من مكاني.. واقتربت منه ويه بويه.. ورفعت يديني.. وأخذت امسح على كندورته.. وعقب يودته من حلجه :
أنا لي اسم.. مو أنت..؟؟


بدت ترتفع ضحكته.. وهو يقول:
ماعليه .. هذا جزاتي يوم يايـبنلك..مفاجئة..؟؟


هديت حلجه وعدلت كندورته وقلت بذرابه :
أفا.. عيل ليش ما ترمس من الصبح..؟؟ كنت سويتلك شاي.. قهوة.. كبتشينو
أو كوفي.. أو.. أي شي بخاطرك..
بس ماقلتـلي..
شنهي المفاجئة يا أخوي يا حبـيـبي..؟؟

رفع أبة الكندورة وطالع على عمي علي اللي كان يطالعنا ويضحك :
شفت يا عمي واشلون تسوي المصالح بالناس..؟؟؟
قبل شوي كان بيكفخني.. بس لما قلت مفاجئة..
عدل كندورتي.. ولا بعد بيسويلي شاي .. وما يلزم..!!


طالع علي..وأونه عاد يريد يسير .. خلاص.. يامحمد.. طوفت على عمرك..
مابعطيك المفاجئة..


تدخل عمي علي وقال:
أفا.. يا سالم.. تكسر بخاطر ولدي محمد..
أنزين ولو قلتـلك علشان خاطري..؟؟ بتـفرق عندك ولا لأ...؟؟


ضحك سالم واقترب من عمي علي.. وحب على راسه وطالع علي وكتف يدينه :
أنت خاطرك ياعمي بهالدنيا ومافيها.. مو بس أعطيه المفاجئة..
اعطيه أبو المفاجئة..بعد..

أنا هني استانست بطلت حلجي.. واقتربت من عمي وأخوي سالم وبطلت ايدي :
يالله عطني المفاجئة..

كمل سالم طنازته وهو يظهر شي من مخباه.. :
بذمتك يا عم علي.. مو كأنه ويا هالسنون.. مشترك بإعلان معجون الأسنان..؟؟

صكيت حلجي.. بسرعة..أما عمي علي.. ضرب سالم بكوعه وهو يقول:
عيب يا ولد.. عن الطنازه.. عطه المفاجئة..


بطلت حلجي مبتسم مرة ثانية ومديت ايدي أكثر من قبل.. وحط سالم بيدي علبة صغيرة..
لما شفتها.. صخيت.. وصكيت حلجي.. وسويت حركه استهزاء وعيني على العلبة اللي بكف ايدي وكنت رافع حايب.. ومنزل الحايب الثاني :
من الصبح.. حاشرني.. مفاجئة .. مفاجئة..!!
وتاليتها.. ( وأشرت بايدي الثانية )
تطلع بعلبة صغيرة..
أقل مافيها.. يوم تريد تتخقق يا سالم.. لا تيب علبة بهالحجم..؟؟
قلت ساعة.. أو بوك.. أو..
مو علبة..
وشو فاضيه ولا فيها شي..؟؟

ورفعت عيوني أطالع صوبهم.. لقيت سالم ماد بوز.. أما عمي علي.. حاط ايده على ويــهه
صخيت اهنيه أكثر من قبل..حسيت أني خبصت..

مد سالم ايده وأخذ العلبة بسرعة من كف ايدي وقالي:
اللحين شوف منو بيعطيك.. مو علبه صغيرة لأ...؟! حبة فستق أنزين..
لو مت جدامي ماعطيتـك.. إياها.. ولو شو ما سويت..


كنت واقف وبالع لساني.. ما رمت أسوي شي.. لكن عمي علي.. كان يضحك.. ويود سالم قبل لا يسير وحاول فيه وهداه وعقب أخذ منه العلبة ويا صوبي وقالي:
يعني لازم تاكل قرصك ابسرعه..؟؟
انطر شوي.. ترى مو كل شي صغير تستهين به..؟؟
خذ وبطل العلبة.. بطيت بجبدي..

خذيت العلبة.. وطالعت على سالم ببراءه وبطلتها.. وصخيت أول ما شفت سويتش سيارة بداخلها..
بطلت حلجي لدرجة أني حسيت انه بينشق..
ومقـلت عيوني.. وعقب.. صرخت.. وحظنت عمي علي.. ورحت.. صوب سالم.. وحظنته.. وكنت أقول:
أفا.. أفا..يابوحميد.. ماكان من الأول..؟؟
أنزين أي موديل.. وشو لونها..؟؟
أنزين وينها اللحين..؟؟

ضحك.. وهو يقول:
سيارتك.. برع.. في الحوش يالطفس.. بس علشان ما تـلوع فيني بمشاويرك..


سرنا يميع وشفت سيارة.. استيشن.. عشبية اللون..

استانست .. وااايد.. خصوصاً انها سيارة كانت صج ابخاطري..
سرت وغيرت ملابسي..
وظهرنا فيها يميع وتمشينا.. وبهالمناسبة عزمتهم.. على العشا..
وعقب ما خلصنا...

طالعت عليهم.. وقلت :
وش رايكم.. نسير الحديقة.. ونلعب..؟؟

ضحك عمي علي وقال:
عقب هالعمر كله.. ألعب..؟؟

طالع عليه سالم :
وليش أن شاء الله.. إذا أصلاً أنت بعدك شباب.. ويمكن لوسرت هناك.. بطيح عينك على وحده..
ونخطبها لك..!!

ضحك بصوت عالي.. ودار براسه صوب سالم:
أُفْ.. أخطب مرة وحده..؟!!!
لالا.. حرمتي.. الله يرحمها..مميزه.. ما اظن.. في وحده بهالدنيا.. ممكن.. تملا عيني..من عقبها..
ويقولك المثـل..يا ولدي..
صاحبك الأول.. لا يغرك التالي..

وأنت تـقول أعرس..؟؟

تنهد سالم :
صجك.. صاحبك الأول.. لا يغرك التالي..
بس ما أطلب من الله غير الفرج.. بحالي..

قلت لسالم:
انطر ياحمار ...حتى..
ولا اظنك تعرفه.. ما يحتاي أقوله..


ضحكنا.. وكمل دربنا.. وسرنا الحديقة..
ودشينا.. ولعبنا.. كل الألعاب.. وضحكنا وماحسينا بالوقت..
طالع علينا عمي وقال :
اللحين دوري بعزمكم.. على فوشار وذره.. وشو تبون..؟؟


صرخت :
اريد آيس كريم باسكن روبنز

طالع علي سالم وهو عاقد حيابينه :
صج احمار.. حد ياكل آيس كريم عقب الذره..؟؟

طالعته بنص عين:
أنت مايخصك.. كل واحد.. يسوي اللي يريده..
مشكله الغيرة..؟؟

ضحك عمي وأشر :
بسكم عاد.. سمعوني.. بسير اتشرى.. وين بلاقيكم..؟؟


أشرنا.. صوب المراجيح.. وقلنا:
هناك.. بنتسابق..

ورحنا.. نركض.. وتركنا عمي.. علي..


***************************************

(( العم علي ))

تغيرت نفسيتي.. لما يــينا على الحديقة.. آآه.. مذكر متى كانت آخر مرة يــيت اهني..؟؟؟

لكن ما أقول غير الحمدلله.. على كل حال..

عقب ماساروا.. صوب المراجيح..
توجهت صوب الكشك.. وكانت زحمة ناس بهالحديقة..
طلبت الأشياء اللي اريدها.. ونطرت الريال.. يجهزهم حتى آخذهم وأسير..

وفجأة..
سمعت.. صوت.. بنت صغيرة .. طالعت عليها..
شفتها..
يالسه.. تشد بكندورتي.. من تحت.. وعمرها ما يتجاوز الثلاث سنوات..
لما شافتني أطالع عليها..

ابتسمت وقالت:
لوسمحت جدو.. ممكن.. تشتريلي آيس كريم..؟؟
لأن الريال اللي يبيع ما يشوفني..؟؟

ضحكت..
ونزلت بجسمي ورفعتها.. وقلت وأنا ابوسها:
يالله هذا الريال جدامج.. اطلبي منه..


ابتسمت وهي مستانسه :
لو سمحت.. أريد آيس كريم..

طلبت من الريال يهمل طلبيتي شوي.. ويعطي البنت اللي تباه..
عطاها.. الآيس كريم..وطلبت منه يحطلها بعض الحلويات بالكيس..

ونزلتها على الأرض.. وقلت لها:
اللحين سيري والعبي..

رفعت راسي.. علشان آخذ الطلبية.. شفتها تشد كندورتي مرة ثانية..
نزلت بجسمي:
شو تريدين حبيبتي.؟؟

ضحكت.. :
اريد اعطيك هذي..
وباستني على خدي.. وهربت..

صحت بقلبي مواجع.. وذكرتني باللي أحاول انساه.. وغصب عني بكيت.. يوم ذكرتني بخالد وهو صغير..

رفعت راسي.. وخذيت الطلبية.. ومسحت دموعي.. ورحت صوب سالم ومحمد..

ويلسنا على الكراسي.. وأكلنا.. ونحن نتبادل السوالف.. لكن غصب عني.. كنت اذكر خالد بخاطري واايد.. ولهالسبب..
تعكر مزاجي.. زود..


سمعنا.. صوت اطفال.. اللي يضحك.. واللي يصيح..
وفجأة..
يــت عندي البنت جدام سالم ومحمد.. وقالت والدموع بعيونها وشفايفها متـقوسه لتحت وأشرت صوب الألعاب:
جدو.. في واحد.. ضربني وماخلاني ألعب..


طالعت على سالم ومحمد.. لقيتهم صاخين يطالعون فيني وفيها..
قمت.. ويودت ايدها.. ورحت صوب الألعاب..
وفهمت الولد.. أنه عيب يسوي جذيه..
وبديت ألعبها..
وهي تضحك.. وتلعب.. وتلعب.. وبدون تعب..
وانجرفت بدون أي احساس.. ورى شعوري بالماضي.. وتخيلت عمري أني كنت ألعب خالد..
وزلت مني الكلمة .. يوم قلت:
انتبه تطيح يا خالد..

طالعت علي وهي تضحك:
انا فطوم.. مو خالد..

صخيت.. وتلاشت صورة خالد من عيوني.. نزلت راسي..
ورحت صوب سالم ومحمد.. اللي كانوا يطالعون فيني..
ولما يلست وياهم..
سألوني عن هالبنت ومن وين اعرفها..؟؟
قلتـلهم بالسالفة..

وفجأة.. شفت ريال واقف احذاها.. وهي تصيح وتصيح..
تخرعت عليها..
وقمت.. اركض صوبها..
ولحقوني.. سالم ومحمد.. ولما وقـفت.. صوب الريال.. وحطيت ايدي على كتفه اريده يلف :
انت وش بلاك عالبنيه الله يهديك.. هد يدها وخلها تلعب..!!


دار بجسمه وهو يقول:
انت منو علشــ...

وسكت.. وهو يطالع فيني.. مستغرب.. وهم بعد.. توقف قلبي.. وصخيت..
عقد حيابينه وقال:
مو..مو..

وأخذ يأشر..
مو أنت.. العم علي..؟؟

نزلت عيني بسرعة عالأرض.. ودرت بظهري.. ومشيت.. بسرعة
لحقـني سالم ومحمد..
ويا الريال..
ركض.. ووقف بويهي يمنعني اهرب وقال:
لالا.. مستحيل اكون غلطان.. أنت عمي علي..
ماعرفتـني..؟؟
أنا جابر عبد الرحمن..؟؟
ماتذكرني..؟؟


كنت منزل راسي.. وتمنيت لأول مره أن الأرض تنشق وتبلعني.. كنت اريد اهرب منه بأي وسيله ومهما كان الثمن..
لكن ما باليد حيله..
رفعت راسي وقلت:
أنت غلطان ياولدي.. أنا اسمي.. مو علي..أكيد مشبه..

وكنت بمشي.. لكنه يود ايدي وقال:
متأكد ميه بالميه أنك عمي علي..؟؟
عمي أنا جابر ولد جيرانكم.. ولد رفيجك عبد الرحمن..الله يرحمه؟!!
ياعمي.. مستحيل اغلط فيك.. وأنت اللي ماقصرت فيني ولا بأهلي عقب وفاة الوالد..
أغلط بعيالي..؟؟ ولا اغلط فيك..؟؟


لما عرف مافي مجال للنكران.. رفعت راسي وطالعت عليه :
أنت مثـل منته ياجابر.. عنيد.. وراسك يابس.. ومايلين..

حظني بقوة.. وسلم علي ورحب.. عقب عرفته على سالم ومحمد.. اللي ماكانوا فاهمين شي..

طالع علي جابر :
ليش نكرت انك عمي علي..؟؟

عفوياً.. راحت عيوني صوب محمد.. اللي تغيرت ملامحه.. وهو يطالع علي.. بخوف وبحزن ..وقاطعنا :
يا جابر.. منو هالبنوته الحلوة اللي كانت تصيح..؟؟

ابتسم.. وهو يطالع عليها:
هذي.. بنتي فطوم..
ماتريد.. ترد البيت..

ورد يطالع على عمي علي :
أقول عمي..؟؟
وينك طول هالسنين.. ومتى رديت من السفر..؟؟

استغرب عمي اللي طالع عليه باستغراب:
أنــا..؟!
ومسـافر..؟!

هز راسه وهو يأشر صوبه:
هيه.. أنت..؟!
لأني كل ما كنت اتخبر عنك عند ولدك خالد.. يقول ابوي مسافر للعلاج..؟!
والله ياعمي.. يوم واحد ماقطعت عن السؤال عنك.. وكل ماكنت اطلب رقمك بالخارج.. كان خالد يرفض.. وبكل مره يتحجج..
وفهمت انه مايريد.. يعطيني الرقم..
حتى أني قلتله.. خبرني على أي دولة سافر..؟!
رفض..
حتى انه.. بدى بالأيام الأخيره يتهرب مني.. ولما قلت ما بسأل عنك عنده..
ردت علاقته وياي شرات قبل..


نزل عمي راسه للأرض .. وعقب رفع عينه بحزن.. ويود لحيته وهو يقوله:
حشيمة لشيب اللي فيني.. امسحها بويهي هالمرة.. ولاتزعل..
واعرفك زين.. ماتقصر.. وتسلم البطن اللي شالتك.. ريال من ظهر ريال..

يود ايد عمي وباسها:
أفا.. يالغالي.. أنت تآمر علي ما تيود لي لحيتك.. وأنت العود..؟!

قرب سالم مني وقال بصوت خفيف :
محمد.. مافهمت شي...؟!
وأنت.. فاهم ولا لأ..؟!
لو كنت فاهم فهمني..؟؟؟

ضربته بكوعي على خفيف ومقلتله عيوني علشان يسكت..

وبدأ الريال يحلف علينا إلا نسير وياه البيت ونتعشى.. ويالله يالله إلين ما اقتنع عمي علي..
ظهرنا من الحديقة.. وسرنا ورى سيارة جابر..
وأول مادشينا الحاره..
وبركنا عند البيت..
وظهرنا من السيارة..

لقيت عمي علي.. متيبس ابمكانه.. وعيونه متعلقه على شي من وراي..

تابعت بنظراتي.. على وين يطالع.؟!
لقيته يطالع على فله كبيره.. والأضواء منوره البيت..

اقترب مني سالم وقال بصوت خفيف :
ياخي في شي مو فاهمه..؟!!
فهمني لو كنت فاهم..؟!
وش بلا عمي علي صاخ يطالع على هالبيت.. فيه شي..؟!!

تفاجأة بصوت عمي علي يرد علينا وهو يأشر صوب الفلا :
هذا بيتي..أقصد كان بيتي..
واللحين صار بيت الاستاذ خالد..

عقد سالم الحيابين مستغرب.. اقتربت من عمي علي.. ونزلت ايده وقلتله بصوت خفيف:
عمي مايحتاي ترمس.. وخلنا ندش..

طالع علي..وقال:
خالد..
أقصد.. محمد.. خلني على راحتي يا ولدي..

سكت.. ونزلت عيني على الأرض.. وقاطع علينا والحمد لله.. واللي حسيته انقذ الموقف..
صوت جابر..
اللي بدأ يرحب.. ويهلل.. ودخلنا ميلسه..


بدت السوالف تيــر سؤال ورى سؤال.. حتى قال عمي علي سؤال فاجأني :
أقول جابر...؟!!
حرمة خالد.. يابتله عيال ولا بعدها..؟!!

درت براسي أنا وسالم.. صوب جابر اللي كان يضيفنا القهوة:
لا ياعمي.. ما يابت.. بس ربك من عليها اللحين.. وهي حامل وعلى ما سمعت أنه شهرها اللحين..
وخالد مستخف فرحان.. لأن ربي أكرمه بهالنعمة اللي كان ينطرها طول هالسنين..


بس ليش أنت ماتعرف...؟!!

سوى عمي علي حركه غريبة .. بس حسيتها من قهره سواها.. ضحك بصوت عالي.. وكأنه قاله نكته.. وعقب طالع عليه وهو يقول بضحك :
لا قال ولا بيقول..


ولو يته الفرصة بعد.. مستحيل يقول..
طالعنا كلنا عليه.. وطالعني وهو يأشر بالسبابه صوبي :
جابر..اعرفك.. على محمد..
هذا الملاك.. اللي انتشلني من دار المسنين عقب ما كسر ظهري خالد..
علشان جذيه..
وطالع عليه:
لا تنطر منه ابيوم يعطيك اسم المستشفى اللي كنت مرتمي فيها..
أنت صاحي..؟!! تريده يفضح عمره ابعمره ويقولك.. شنهو اللي سواه فيني..؟!!


مقل عيونه ووقف بعصبيه :
افــا..؟!!
يفرك بالمستشفى عقب هالعمر كله..؟!!
والله ياعمي لو تسمحلي بس اربيه لك .. بهالعقال..؟!!

نزل عينه على الفنيان القهوة اللي بيده:
خله يا ولدي.. مايحتاي تربي من نسى معنى تربية أمه وابوه له طول هالسنين.. وتابع شور .. ولا اقول..؟!!

طالع عليه :
خلها داخل القلب تجرح.. ولا تطلع برع وتفضح..
ودخيلك يا جابر.. امانه برقبتك ليوم الدين.. هذا الكلام كله مابيه يظهر من هالميلس..
ولا اريد حد يعرف اللي سواه خالد..
بس تكفى..
خلك مثل منت وياه.. ولا تبين له أي شي.. سمعت ياخالد..؟!!
نزل عينه على الأرض.. وهو يهز راسه ومبتسم ابتسامه شاحبه:أقصد جابر..

قال بعصبيه:
لكنـــ.....؟!!

قاطعه عمي:
لا لكن ولا شي.. وأن عرفت أنك خنت الأمانه ياجابر..صدقني.. لا أزعل منك زعل لا صار ولا استوى..

وافق جابر أنه يسكت عن الموضوع.. دار سالم براسه صوبي.. مستغرب عن اللي يالس يصير.. وقالي:
أنا صاحي ولا أحلم..؟!!

حطيت ايدي على عيوني :
وأنت الصاج..أنت خبرني وين أنا..؟!!

خوزت يديني وطالعت عليه وهو يقول:
أنت في بيت الصراحة والمفاجآت على ما اعتقد..


حب عمي علي يغير الجو اللي صار.. وطلب من جابر العود.. اللي معلقه على اليدار.. وطالع علي وقال:
دق بالعود.. لبروغه.. وميحد.. يابوك.. رجعنا شباب..
وضحك..

خذيت العود..وبديت أدق.. وأدق.. وكنت مع كل وتر يالس ادق عليه..
كنت أتمنى أكون اللحين مو بهالمكان ولا بهاليلسه المجروحه..
تمنيت لو أغمض عيني وابطلها وألاقي عمري..
عند البحر..
ومع الغريب أقل مافيها..

وعقب قمنا وتعشينا.. واستأذنا.. لكن جابر حلف مليون يمين..
أن عمي علي يبــيت اليوم عنده..
كنت رافض ابصراحة..
لكن عمي علي فاجأني بموافقته.. المفاجأة..
واللي ماكنت متوقعتها بالمرة..

استأذنت ويا سالم.. وظهرنا.. وعيني على عمي علي لآخر لحظة.. وركبنا السيارة.. وسلمت عليهم..
وابتعدنا عنهم. وظهرنا من الحاره ومافيها ..

***************************************

(( سالم ))

عقب ما ظهرنا من الحاره.. طالعت على محمد.. وهو يسوق وقلت:
محمد..؟!!
اللحين خالد.. ولد عمي علي صج فره بدار المسنين.. ولا مسافر..؟!!

لا يا سالم.. فره بالدار..تذكر أول يوم لقينا فيه عمي علي بالدايره عند الباركنات..؟!!

هزيت براسي.. هيه..

هذاك اليوم يا سالم.. كان عمي علي.. يدور على خالد..؟!!


حطيت ايدي على راسي..:
ليش يشتغل بنفس الدايره ويانا..؟!!


خطف علي بنظره.. سريعه وطالع على الدرب:
يا شيخ.. ترى خالد مو بس يتشغل هناك..!! خالد اهو المدير..

لالا.. أنت بصجك.. ولا يالس تقص علي..مثل عادتك..؟!!
محمد ترى مب بوقت الطنازه.. اللحين..

تنهد :
ياليتني أقص عليك.. بس هالكلب النذل الحقير.. هو ابن الملاك.. الطيب الطاهر..
والله لو بإيدي.. لا اسوي به.. شي لا صار ولا استوى..

وسكت..


وكملنا دربنا للبيت بسكوت.. وبصدمة بالأصح..

ولما وصلنا نزلني محمد..عند البيت وطالع علي:
بسير مشوار.. عقب بروح بيت عمي علي لو بغيت أي شي دق علي.. أنزين..؟!!

وراح.. عقب ما قلتله.. توكل على الله..

************************************

(( محمد ))

عقب ما نزلت سالم.. عند بيتنا.. توجهت ابسرعة.. صوب البحر..
ولما وصلت..نزلت بضيج يشيلني ويحطني..

واقتربت من البحر.. كنت أطالع على هالهدوء اللي يحظن أمواجه..

نزلت بجسمي لطرف البحر.. ومديت ايدي وخذيت غرفة وغسلت ويهي..ولما وقفت.. وويهي مبلول..

سمعت صوت الغريب يقولي:
أحم.. أحم..
واشلونك يا محمد..؟!! عساك ابخير..؟!

درت بجسمي .. وقلبي صج فرحان.. لكن مزاجي متكدر على اللي استوى ويا عمي علي.. ابتسمت :
زين تحمحمت..المهم.. أنا..
الحمد لله.. بخير يالغريب.. وأنت واشلونك.. ؟!!


يسرك حالي يا محمد..
لكن ليش متكدر..؟!!
ليكون أنا السبب ..؟!!

طالعت عليه.. وتذكرت فجأة.. سالفة الجوال :
صج.. صج..
واشلون تيـيب الجوال لبيتنا..؟!!
وأصلاً واشلون..
وأشلون.. وأشلون.. دشيت..؟!! إذا اهلي قالولي.. محد يا الصبح..؟!!

تلفت بعيونه يمين ويسار :
لي طرق خاصة ولا تتعب عمرك.. لأنك ما بتعرفها..


تعرف يالغريب.. صج أنت تخوف بلد..


ضحك.. وهو يأشر صوبي:
أقنعني يامحمد وقول أنك بديت تخاف مني..؟!!

سويت حركة بيدي.. على اساس أنه مايهمني وقلت له:
لاخفت ولا بخاف.. وتراك غثيتني بغرورك.. مايصير تيــيني ابيوم وتترك الغرور مالك بالبيت..؟!!
ولا أقول.. حط هالثام والجاكيت والقفاز..بالمرة والله اللي يشوفني وياك يقول مرابع فزاعه.. كلها خلاقين..؟!!


نزل بعينه على جاكيته وقال:
لو أنت تعرف شنهو اللي ورى هالجاكيت.. ماكنت رمست جذيه..

أنزين.. عرفني يافهيم زمانك.. وخبرني..


لا يامحمد..ما أروم افهمك على أي شي.. لكني أروم.. أفهمك.. ان الفرق اللي من بينا.. شرات هالفرق..

وأشر على السما والأرض..

أنزين.. يا فهيم زمانك.. صج من قال كلٍ يغني على شقى ليله..


ليش يا محمد.. وأنت شنهو اللي اشقاك اليوم..؟!!


طالعت صوب البحر.. ورديت أطالع عليه بخبث :
مو تسوي عمرك.. تعرف أخباري..؟!!
يالله.. خبرني..؟!!


هز كتوفه:
لا.. ما اعرف أخبارك ولا شي.. بس على ما اعتقد الموضوع يخص عمك علي..
ويـــيب السالفة من الأخير


ابتسمت ابتسامة سخرية :
عيل مرة ثانيه لا تتفلسف..
أسمع..
اليوم.. شفنا ولد جيران عمي علي..صدفه وحلف علينا نتعشى عنده..
وعمي خبره وخبر سالم... بالسالفة كلها..
واللحين هو بيرقد عنده..
وبكره بطوف وباخذه..


طالع علي.. وحط يدينه داخل مخابيه :
بس..؟!!
سكت.. مستغرب.. على طريقته بالكلام.. وعقبها قلدته :
بس..؟!!

هيه بس شنهو مُبْ عايبنك.. الكلام..؟!!


مو قصدي.. جذيه..
لكن..
في شي عمك ماقالك عليه..؟!!


استغربت.. وكتفت يديني فوق بعض :
شنو هالشي..؟!!

أنت اللي لازم تسأله يا محمد..


أنزين أسأله عن شنو بالضبط..؟؟


بساعدك.. وبقولك.. أسأله عن....................................


استغربت..
من هالغريب.. اللي خلاني أحس.. أنه مو طبيعي..
ومنو هذا بعد..؟!!
لا يكون بتوهقني يالغريب..؟؟؟



خذني على قد عقلي..
وبتشوف إذا هالباب ما بطلك ابواب من عقبها..

يلست على الرمل.. وبديت افكر..

ويلس بعيد عني شوي..الغريب اللي قال:
محمد..ما أروم.. أطول وياك.. عقب شوي لازم.. أروح..


استغربت لأن أول مرة يخبرني أنه بيسير .. طالعته باستغراب :
أُفْ.. اشوفك.. تنازلت.. وقلتلي.. أنك بتسير..
لكن ليش أن شاء الله..
بتسير..؟!!


يعني لو قلتلك ما عيبك.. ولو ماقلتلك.. هم بعد ما يعيبك..؟!!


لا تضيع السالفة يالغريب.. وقول على وين العزم... أن شاء الله..؟!!


بسير... مشوار ضروري.. وأكثر من جذيه.. ماعندي..


قلت ابخاطري.. هذي الفرصة المناسبة اللي بعرف عن الغريب وين يروح..
يلست وياه.. وعقب.. استأذن ومشى..

ابديت له موافقـتي في البداية..علشان يسير.. لكنه ماعرف أن بخاطري شي ..

وعقب ما ابتعد.. مسافة كافية بالنسبة لي.. قمت ابسرعة.. ومشيت وراه..
وبدون ما ينتبه..

ومشيت.. لدرجة أني تعبت.. وابتعدت عن سيارتي..
كان الظلام.. مخيم على كل الاتجاهات..
وهالشي كان ابصالحي..

وشفت الغريب..

***************************************

وهالشي كان ابصالحي..

وشفت الغريب..

***************************************


(( الجزء الواحد والعشرون ))

(( ســـر غامض ))


كل ما يـبتعد عني.. والظلام بكل مرة يزيد..

لدرجة أن خطر في بالي.. أن في الموضوع شي مو طبيعي..بالمرة

درت لوراي علشان اشوف كم ابتعدت عن سيارتي ؟؟!..عقب ما رمت أشوف أي شي.. بحكم سواد الليل ..درت براسي لجدام علشان أكمل دربي..

لكن..
تفاجأة..

في الغريب واقف بويهي على طول ومكتف يدينه وقال بعصبيه من بين الظلام :
ليش يــيت وراي يامحمد..؟!!


سكت واستحيت قلت ابخاطري هذا اللحين لو فـَوَلْ وعصب مشكله.. احسن اسكت..

رد وكرر علي السؤال.. ولما شاف سكوتي هو الجواب الوحيد اللي يحصل عليه..


قال بهدوء غريب:

علشان جذيه كنت ارفض اعطيك خبر قبل لا سير.. لأني اعرفك .. وكنت متوقع أنك.. بتـتبعني..وظني كان بمحله..



أشرت بسبابتي صوبه وقلت بطريقة هجوميه :
أنت السبب لو بس تخبرني أنت منو..؟!! وأشلون تختفي وأشلون تمشي أمورك بهالشكل.. وبهالطريقة الغريبة..؟!!
كنت ما تبعتك.. ولو لثانيه..كنت سكت وانطميت


هز براسه مبين أن كلامي مو عايـبه :
اللحين صرت أنا السبب..!! أنزين يامحمد.. السبب كله مني وفيني واللحين
عطني بقفاك وروح.. وكلمة زيادة ما بيصير خير..


سكت.. وعطيته ظهري.. بعصبيه وكنت حاس أني خبصت الدنيا فوق حدر بالغريب..لكن هم بعد كنت صاج باللي قلته
ولما كنت ابتعد.. خطر في بالي... الف براسي شوي وأطالع عليه واعتذر وبلا ما اروح وهو زعلان..

درت براسي وأنا أقول :
لا تاخذ.. علـ...

وتوقفت.. لما شفت المكان فاضي..وتلعثمت.. وتيبست اريولي في البداية.. عقب مشيت واقتربت من المكان اللي هديت الغريب فيه..بخطوات متردده
قلت يمكن الظلام حجب عني شوفته..
لكن تأكدت أنه صج مب موجود..
حزتها حلفت إلا أكشف سر الغريب ولو ثمنه حياتي..

مشيت.. واتجهت صوب سيارتي ودشيتها.. وتوكلت على الله متجه لبيت عمي علي..
علشان اسير ارتاح..
واروم اسوي اللي قالي عليه الغريب..

لكن بقى براسي السؤال منو هالغريب ..؟!!

*****************************************

في صباح اليوم الثاني.. توجهت صوب بيت جابر..علشان آخذ عمي علي..
لكن تفاجأة.. أن عمي ويا جابر مو موجودين خير شر..
رحت.. ورديت لهم مرة ثانية.. عقب العصر.. لقيتهم هم بعد طالعين..
ومشوا معاي على هذا المنوال..لعدة أيام..
كل ما اسير لهم ما ألاقيهم..
وفي أحد الأيام..
اتجهت لبيت جابر عقب صلاة الفير.. وطقيت الجرس..

ظهر لي جابر.. اللي ارتسمت ملامح الاستغراب والتوتر على ويهه اللي شكله كان غاط بالنوم.. :
خير يا خوي في شي مستوي..؟!!


كنت أحاول ما أفلت اعصابي :
آسف أني صحيتـك من ارقادك ويــيتلك بهالحزه.. لكن الله يسامحك أنت وعمي علي اللي ما خليتوا لي أي خيار اتبعه..وياكم..
كل ما يـــيت وسألت وتخبرت عنكم.. كله طالعين الله يهديكم.. حتى أني شكيت أنكم تتهربون مني..؟!!


قال وهو يمسح عيونه بيده :
أفا عليك يا ريال.. بذمتك هالرمسه تظهر من واحد معاشر عمي علي..؟!!
اسميك تاخذ الأمور بمحمل الجد..
اشقايل نهرب منك..؟!! أنزين ليش..؟!!


نطرت ينهي كلامه.. وعقب قلت وأنا اعض على اسناني:
والله ما ادري عنكم..؟!!
لكن اللي كنت اشوفه.. صج يحرج الاعصاب.. المهم.. ماعلينا..
وين عمي علي..؟!! أكيد بيكون ناش اللحين علشان صلاة الفير..
ممكن تزقره..؟!!


تلعثم في البداية وعقب قال :
ماعليه.. اسمحلي ما قلتلك تفضل..

قاطعته:
لالا.. مشكور.. بس سير وازقر عمي علي اريده ضروري..


سكت لفتره.. وأخذ يطالع وراه.. ويرد يتلفت.. وعقبها قال:
بسير اشوفه لك وبرد مو مطول عليك..


هزيت له راسي .. أنزين..


نطرت في مكاني .. وعقب ياني جابر وقال:
لقيته راقد اللحين..وش رايك.. تمر الظهر وتـتــغدا معانا اليوم.. وبالمرة ترمسه بالموضوع اللي تباه..؟!!


ماحبيت اثــجل عليه.. غمضت عيوني شوي وكنت اهدي نفسي ابنفسي .. وعقب ما بطلت عيني :
اعتذر للمرة الثانية لأني يــيت بهالحزة.. وخير أن شاء الله.. بس يوم بايي .. خل عمي علي يعمل حسابه.. أني ما برمسه وبس لأ..
أنا بايي آخذه لبيته.. وقله.. أني حبيت أطمن عليه..لا تنسى لو سمحت..


خلاص يا محمد... واصل أن شاء الله ومالك إلا طيب الخاطر..
وبننطرك على الغدا .. واعمل احسابك أني ما بقبل منك أي اعذار..

ابتسمت ابتسامة مجاملة :
أن شاء الله .. بايـي عقب صلاة الظهر إذا ربي طول بعمري..
لكن أنت متأكد أن عمي بخير مافيه شي..؟!!


لا يامحمد وش بلاك ياخوي..؟!! عمي علي احسن مني ومنك ومافيه إلا العافيه..أن شاء الله واليوم لما بتشوفه بتقول جابر قال..


عيل اترخص عنك وموعدنا اليوم أن شاء الله..وسلم على عمي يوم ينش..


ما بتدخل يا ريال.. قهوة شاي.. تفضل ترى البيت بيتك..


قلت ابخاطري.. وأنت خليت فيها قهوة وشاي.. يابوك.. حرجت اعصابي بهالأيام إلين ماقلت بس..
ابتسمت :
مشكور.. وما تقصر يابن الأياويد.. واسمحلي اللحين..عن أذنك


وعقب ما ترخصت عنه..

رحت لبيت عمي علي..

***************************************

(( جابر ))

عقب ما شفت حالة محمد اليوم.. طار اللي تبقى من النوم بعيني..وما صدقت حتى طلعت الشمس..
رحت مثل المينون.. بسيارتي.. لدار المسنين..

وتوسلت للطبيب اني لازم اشوفه.. وبالمضاربه.. طاع..

توجهت لغرفة عمي علي ولما دشيت.. وشافني.. ابتسم.. وهو ممدد على الشبرية..

لقيت ويهه شاحب واايد..والتعب ماكل جسمه

سلمت عليه.. وقلت بخوف وأنا ميود ايده:
عمي وش بلاك مصفر ..؟!! خير أنت تعبان..؟!!

ابتسم ابتسامه هاديه :
قلة نوم يا ولدي..ما عليك مني اللحين.. وماقلتي وش اخبارك ..؟!! واخبار أهلك وعيالك..؟!!
وفطوم حبيبة جدها..واش اخبارها..؟!!


كلنا بخير ياعمي وما ينقصنا غير وجودك.. لكن..لكن..


طالع علي بعيونه التعبانه:
خير حد استوى به شي..؟!!

لالا يا عمي الكل ابخير.. لكن محمد..
مثل ما تعرف كله يسأل ويتخبر عنك..
وياني اليوم عقب صلاة الفير.. وشكله واضح مهدود.. كأنه مب براقد..
وسألني عنك..ولولا حشيمته لك كان كسر الباب وهجم عالبيت ويدور عليك ابنفسه



قاطعني بخوف وبلهفه:
لايكون قلت له أني اهني..؟!!


أفا عليك يا عمي لا قلت ولا شي.. بس تراه اليوم يايــنا على الغدا عقب صلاة الظهر والشر باين بعيونه وقال بياخذك اليوم وشكله إذا ما خذك اليوم بيسوي اللي لا صار ولا استوى..


قال اللي ما توقعته.. بطريقة افتخار:
شفت هذا ولدي.. شفت واشلون ما نساني..؟!!
كنت عارف ومتأكد أنه ريال من ظهر ريال.. وعمره ما حسسني أني ثجيل عليه..
من يوم يومه.. شايلني على راسه.. وربي بيرزقه بنت الحلال.. اللي ترفع له راسه بكثرة العيال الصالحين..شرات ما رفع لي راسي..أن شاء الله
لكن طمني يا جابر أنت متأكد انه ما حس أو شك بالموضوع..؟!!
يعني ما زليت بلسانك.. وخبرته أني اهني..؟!!

يلست على الكرسي اللي احذاه:
إذا كنت مينون كنت بشككه.. بس واشلون أصلاً ازل بلساني.. حتى وأنا بعز ارقادي لساني متحذر وصاحي..
ومعقول اخبره أني يــبتك بيديني الثنتين لهني..؟!!
أنت تباه يذبحني..؟!!
وصدقني لولا أنك حلفتني وطلبتني طلبه أني أيــبك اهني علشان تيلس كم يوم ويا ربعك.. ماكنت طعت..لكنك غالي وتآمر أمر..


غمض عيونه وهو يقول :
زين والله .. وجميلك هذا ما بنساه..


سحبت ايدي من ايده:
لا جمايل ولا شي.. لكن..
عمي أبسألك سؤال.. إذا ما بثجل عليك..؟!!
أنت .. ليش ما تريد محمد يعرف انك اهني..؟!! لأني اعتقد لو قلتله تريد تزور ربعك ما بيقولك شي..ولا بيمانع..


تغيرت ملامح ويهه.. وصد للصوب الثاني وهو يقول :
اعرف انه ما بيقصر وبــيبني .. لكنه بيمانع أني ابيت اهني .. وإذا لزمت المبيت.. بيقول بيــبيت وياي.. وهذا الشي..ما اريده يستوي


ودار براسه صوبي وطالعني بنظره غريـبه بس الحزن واضح فيها

استغربت على ملامح الحزن اللي ارتسمت على ويهه وقلت بحنيه:
قول اللي بخاطرك..ليش لازم تخنق الكلمة قبل لا تقولها..؟!!
ليش ما تريح عمرك وتخبرني باللي يدور في بالك..؟!!
نظرتـني اللحين بنظره.. اعرفها زين.. نظره نظرتـني فيها زمان يوم كنت صغير وما اتوه عنها..أبد
نظرتك.. وراها شي.. وأعرف أني مو غلطان..


نزل بنظرته لأيده وابتسم ابتسامه.. مجبوره:
أقول..؟!! شنهو اللي بقى علشان أرمس عنه.. وأقول ..؟!!
وترى اللي خنق الكلمات قبل لا تظهر.. مو أنا..

ورفع نظرته لعيوني:
إذا ما تعرف بعرفك.. أن اللي خنقها هو نفسه اللي كسر ظهري..عقب هالعمر كله
خل اللي بالقلب بالقلب..

وبدأ ينش من على الشبرية..


طالعت عليه:
على وين يا عمي..؟!!


مقل عيونه بعيوني:
مو قلت محمد بيـــي..؟!! وأشلون تباه يشوفني اهني..؟!!
لازم.. اظهر اليوم.. علشان محمد لما ايــــي
ما يشك بالموضوع..

واللحين ساعدني وخلني اسير عند الطبيب..أريد اقوله شي..


ساعدت عمي واتجهنا صوب الطبيب وبالمضرابه ما طاع أني أدش..
وياه..


**************************************

(( العم علي ))

عقب ما دشيت عند الطبيب.. تفاهمت وياه.. أني لازم اظهر..
ووقعت على الأوراق..اللي
تخلي مسؤولية المستشفى لو استوى أي شي عندي..


وظهرت.. من المكتب

واتجهت لغرفتي وغيرت ملابسي.. وسلمت على ربعي اللي بالعنابر الثانيه..
ورحت ويا جابر البيت..عقب ما اتفقت وياه على حجه نقولها لمحمد.. عن الأيام اللي ما لقانا فيهن..

***************************************

(( محمد ))

نطرت بفارغ الصبر صلاة الظهر.. وعقب ما صليت.. توجهت بسرعة لبيت جابر..

وطقيت الجرس.. وهو اللي بطل لي الباب وسلم ورحب فيني..
ودخلني الميلس..

وطاحت عيني على عمي علي.. اللي ملامحه واضح عليها التعب والارهاق الشديد..
ورغم هذا يبتسم..


اقتربت منه وسلمت عليه.. ابزعل.. وكانت ملامحي واضح عليها الحزن والزعل والعصبية مرة وحده..

ويلست احذاه..


عقب ما تركنا جابر ابروحنا شوي.. كنت ساكت مو مثل العاده ارمس وياه واهذرب..كنت منزل عيني للأرض.. وصاد للصوب الثاني..

حط عمي ايده فوق ايدي..وقال:
وش بلاك ما تريد تشوفني..؟!!


حسيت العبرة تخنقني.. درت ابراسي صوبه بعصبيه.. وويهي صار لونه احمر..
والدم يغلي بعروجي.. وعيوني مصوبه على عيونه شرات السهم:
أنا..؟!!
أنا ما أريد اشوفك..؟!!
هديت الدنيا علشان اشوفك اليوم.. وكل هالفتره رايح جاي.. صبح ليل.. ماعرفت طعم النوم فيهن..
وتقول ما أريد اشوفك..؟!!
بس شكله اللي استوى ..يا عمي انك طبقت المثـل اللي يقول.. من شاف احبابه.. نسى اصحابه..

ضحك.. ولمني :
أفا عليك تزعل مني.. لكن هالفتره ابطولها كان جابر يمشيني لأن نفسيتي تعبت شوي.. بسبب الذكريات..
وإذا ما كنت تعرف.. خليني اعرفك..
أنت حبيبي وصاحبي وولدي.. وأبوي واخوي.. وإذا كل الدنيا تلمت في كف ايدي اليمين..
انت لحالك بتكون بكفت اليسار..
محد شراتك يالغالي..


وخاز عني وطالع علي وهو عاقد الحيابين:
يعني لما تـزعل أكون عمك.. ولما ترضى علي.. استوي أبوك..؟!!


غصب عني ضحكت..


ويودت ايده :
عقب الغدا.. بنسير البيت .. ومالك أي حجه تتحجج ابها.. سمعت..؟!!


ابتسم وهو يقول :
بسير وياك وأنا مغمض عيوني .. لأني مطمن أن ربي ما بيضيعني وأنت موجود.. من بعده..
حبيت على راسه.. وفجأة.. تذكرت كلام الغريب..
طالعت على عمي وقلت :
أقول يــُبه..؟!!


خير يا محمد..


خير أن شاء الله....أريد أسألك عن ...

قاطع سؤالي.. دخول جابر..

اضطريت أني اسكت.. لكن عمي طالع علي وهو يقول :
أنزين.. شنهو اللي تريد تسأل عنه..؟!!

عفوياً طالعت على جابر اللي كان يعطيني فنيان القهوة.. وعقب طالعت على عمي وقلت:
عقب.. عقب..


وشربت القهوة.. وبدون ما ارفع عيوني صوب أي واحد منهم..

ومر الوقت ابتبادل الكلام.. لكن بالي كان مشغول.. لأني كنت أحس أن في شي مو طبيعي يالس يستوي وياي..ويدور من حولي..
وهو فوق طاقتي على فهمه واستيعابه..

كنت اطالع على عمي اللي يبتسم.. ويقلب ذكرياته مع جابر..
وبدون ما يحسون اني شارد الذهن..

وما حسيت بالوقت.. إلا في حزة.. ما حط عمي علي ايده على كتفي يريدني اقوم من مكاني.. علشان نسير ونتغدا..

سرنا.. وتغدينا وعقب يلسنا في الميلس..وشربنا العصير.. وأخذنا نغوص بالسوالف لفتره... حتى صلاة العصر..

توجهنا للمسيد وصلينا.. وترخصنا أنا وعمي من جابر.. وتوكلنا على الله متوجهين للبيت..

طول الدرب عمي كان يسولف عن الماضي..
لكن احساسي ماكان مرتاح من شغله معينه.. وما كنت اروم افهم هالشغله..بالضبط ؟!!

ولما وصلنا البيت... وصلت عمي علي لغرفته..

وقبل لا اظهر..

سمعت عمي يقول:
محمد..؟!! فيك شي..؟!!


درت براسي اطالع صوبه:
لا مافيني شي.. بس ارتاح أنت اللحين.. لأني عقب احتايك تكون مصحصح وياي.. ومركز.. ومستوعب..


تغيرت ملامحه للأسوء وقال بطريقه غريبه:
شو تـقصد..؟!!
مافهمتك..؟!!!!!!!


قلت ببرودة اعصاب .. وما اعرف من وين يـــبـت هالبرودة :
ماعليه.. ترى كل شي بوقته حلو.. ريح اللحين.. ولكل حادث حديث..


ظهرت وصكيت الباب من وراي.. واتجهت لغرفتي..
*******************************************

(( العم علي ))

عقب ما ظهر محمد من غرفتي.. يلست فوق الشبرية.. وبدت الأفكار تعصف براسي..

كنت خايف أن محمد يكون عرف شي من اللي ما اريده يعرف..عنه

مارمت اتحمل..
قمت من مكاني.. وظهرت من غرفتي ورحت لغرفة محمد.. طقيت الباب واستأذنت للدخول..
ولما دشيت.. شفته ممدد فوق الشبرية..

لما شافني..كان يريد يقوم.. لكني أشرت له بإيدي.. خلك مثـل منت..
واقتربت منه ويلست احذاه..


أخذت امسح على لحيتي باعصاب تعبانه.. لكني كنت احول اظهر العكس وقلت بكل هدوء:
ما رمت انطر لبعدين.. ممكن تخبرني شنهو اللي مكدر مزاج ولدي الغالي..؟!!


نش من مكانه.. ويلس يلسه خلى فيها ويهه بويهي وحط عينه بعيني وشبك اصابع يدينه ببعضهم :
مادمت تريد تعرف عيل
اسمعني.. يا لغالي.. ما اريد اطول السالفة وادش وياك بدروب تايهه.. ومالها نهايه..
اتمنى انك تخبرني كل شي وبكل صراحة..

لأني اعرف كل كل كل شي.. وما يحتاي تقص علي.. لأني أروم افهم واقدر.. وما يحتاي انك تحاتيني..
سكت.. وحسيت انفاسي نيران تشتعل فيني وقلت برتباك:
ترمس عن شو بالضبط..؟!!


طالعني بنظره حاده:
أنت ابخص.. باللي ارمس عنه..


نزلت عيني للأرض وقلت خلاص.. اكيد كشف اللي محد عرف عنه.. ولازم انهي كل شي اللحين واحسم الموضوع..
وارتاح..


وفجأة قال:
ليش ساكت.. أنت كنت تتوقع ما بعرف عن الطبيب سهيل..؟!!


رفعت عيوني بعيونه وبكل تفاجأ:
سهــــــــــــيل..؟!!


رد بكل ثقه:
هيه الطبيب سهيل على بالك ما بعرف بالسالفة..؟!! هم بعد لي مصادر خاصه.. تخبرني عن الشغلات اللي ما ودك اعرف عنها..
واللحين إذا ما عندك أي مانع.. ممكن ترمس وتقول.. ؟!!
لأني حاب اسمع كل شي منك أنت بالذات..


أشرت صوبه:
يعني هذا اللي كنت يالس ترمس عنه من الصبح..؟!! كنت ترمس عن الطبيب سهيل..؟!!


هيه .. كنت ارمس واقصد الطبيب سهيل.. ليش في شي ثاني وأنا ما اعرفه..؟!!


سكت.. وقلت ابخاطري.. الحمدلله ماخبصت الدنيا وكشفت المستور.. ولا كان بيصير اللي كنت اخاف منه..


حط محمد ايده علي :
يُـــبه.. اريدك تعرف أني معاك معاك.. شرق غرب معاك.. ولا بزعل منك.. ومهما كنت تشيل من اسرار..
خبرني عن الطبيب سهيل من وين تعرفه..؟!!
ومنو يكون بالضبط..؟!!



تأكدت أن محمد مايعرف أي شي.. والسؤال اللي يالس يطرحه سؤال عادي وبريء..
طالعته وأنا ابتسم:
هذا الطبيب كان مشرف في دار المسنين.. وكان شخص طيب وحبوب.. وتابع حالتي لفتره معينه..
وعقب ظهرت من المستشفى وباجي التفاصيل أنت تعرفها..


طالعني بنظره:
يعني مافي شي ثاني ... تريد تخبرني عنه..؟!!


ارتبكت.. وقلت..بخاطري..شكله يعرف ..
اشرت:
أنت في بالك شي.. ليش ماتقوله وتريحني..؟!!


لالا.. والله مافي بالي شي.. بس كنت اريد اتأكد وارتاح.. انك مو خاش علي شي..
وفي البداية والنهايه.. أنا ما اريد إلا راحتك.. ولا تتوقعه حب الفضول..؟!!


خوزت ايده.. ووقفت :
تسلم يالغالي.. وما يحتاي تبرر.. وتفسر.. اعرفك زين..
وتأكد ان مافي أي شي.. يحتاي ارمس عنه..
ولو عندي شي بخبرك..


ابتسم وهو يقول:
اعتبره وعد..؟!!


صخيت في مكاني.. وهزيت راسي.. هيه..
وظهرت من الغرفة..


*********************************************
(( سالم ))

تمر الأيام..وكل مرة
نتيمع.. يا في بيت عمي سالم أو بيت عمي علي..

وتعلقي بنورة كل ماله يزيد..


وفي أحد الأيام..زارنا محمد في البيت.. وعقب ما شبعوا الكل منه.. يودت ايده.. ودشيت وياه غرفتي.. وصكيت الباب من وراي..

يلس هو على الكرسي.. وأنا يلست فوق الشبرية..

طالع علي بطنازه:
اش عندك.. تسحبني.. من ايدي؟؟ لا تقول مشتاق..؟!!


أشرت بإيدي عليه:
ووووعْ ... مـــــــــالتْ عليك.. بشتاق حق شو بالضبط..؟!!
لا مشتاق ولا هم يحزنون.. لكني ابيك ابسالفة شايده..


حط ريل على ريل:
كنت متوقع انك تريدني مو لله .. بس يالله هذا قدري.. قول شو عندك..

ومد ايده.. وخذ كوب الماي اللي فوق الطاولة..وبدأ يشرب..


طالعت عليه بجديه.. وقلت :
بخبر أمي أني بتزوج نورة..


عق الماي من فمه.. عقب ما وقف نصه بحلجه.. وبدا يكح ويكح..

قمت من مكاني وضربت على ظهره..
ولما هدأ.. ووقف من الكح.. رحت لمكاني ويلست..


شفته يطالع علي وهو يحط الكوب فوق الطاولة:
خذ الله عدوك.. يوم خليتني اغص
أنت بعقلك..؟!!
بتقول لأمي أنك تريد تتزوج نورة..؟!!
اسميها اليوم بتتعشى عليك..


يالله عاد.. يا محمد.. على بالك ليش اخبرك.. علشان تعطيني كم كلمة..؟!!


مقل اعيونه:
ليش.. وش المطلوب أن شاء الله..؟!!


محمد.. أنت من يوم يومك..كبش الفدا.. يعني بيفرق وياك..
(ومسكت.. طرف اصبعي..)
هالخبر بس..؟!!


ضحك ضحكه:
لهْ يا شيخ..؟!!
هذا الخبر مو قد طرف اصبعك وأنت الصاج..؟!! هذا قد... راسك..


عقب هالمشكلة كلها.. تريدني اخبر أمي أنك تبا تتزوج.. من نورة بنت عدوتها..؟!!
والله لتشويني وأنا حي...اسمحلي بهالشي ما اروم اساعدك..


قلت ابخاطري اعرف محمد زين.. لو سويت نفسي زعلان بكسر بخاطره.. سكت.. وما طالعت عليه..
ولما شافني ساكت..

قام من على الكرسي ويلس احذاي :
سالم.. حرام عليك.. أنت ما بترتاح إلا يوم تشوفني في ثلاجة الموتى.. عقب ما أمك.. بتقطعني شرايح..


تقلب مزاجي وذكرت ثلاجة الموتى واشلون كنت متوقع أن محمد متوفي واحساسي حزتها أشلون كان
عصبت بويهه:
خلاص ما اريدك تقول أي شي وانسى الموضوع.. ومرة ثانيه أن سمعتك تطري ثلاجة الموتى والله يا محمد.. والله.. لا ازعل منك ولا اكلمك خير شر..
وهالموضوع.. عفته.. وما ريده..


سكت محمد في البدايه .. لما شافني عصبت.. ورد يطالع علي:
أُفْ .. اُفْ..
هذا كله علشان نورة..؟!!


حطيت عيني بعينه بعصبيه:
لا.. مو علشان نورة.. ونورة إذا ربي ما كتب لي معاها نصيب.. ممكن اتحمل واكابر..
لكن انت.. ما اتخيل يستوي فيك شي.. أنت نسيت واشلون كنت بتينن لما استوى الحادث وتلخبطوا فيك.. وقالوا انك متْ..؟!!
تعبت.. نفسيتي من الخاطر.. وإذا كنت تعزني.. مرة ثانيه لا تطري ثلاجة الأموات ولا حتى بالغشمره..ياخوي..


صخ.. لما شافني ارمس بهالطريقة.. وعرف أن الكلام ظاهر من قلبي..


حب يغير الجو..اللي تكهرب وانقـلب..بسبة هالموضوع..
وقال:
عيل بسير ارمس ويا أمي.. قبل لا ينش ابوي..؟!!


خلاص يا محمد.. قلتلك.. ما اريدك تخبر امي.. أنا بسير واخبرها..

وقمت من مكاني.. وظهرت من الغرفة متجه صوب امي في المطبخ.. ومحمد كان وراي يهذرب
ولما وصلت للمطبخ.. شفت امي تحط الشاي في الدله..صخيت.. في البدايه.. لما شفت البخار يظهر من الشاي..
قلت ابخاطري.. خلها تبند غطى الدله عقب برمس.. لا تشيل الشاي وتكبه على راسي..

حط محمد ايده على كتفي من وراي..وهمس بأذني:
سلوم.. مو وقتك.. تسوي عمرك.. بطل وشجاع.. خلني ارمس أحسن لك..هذي أمي مو أي حد ثاني..؟!!

بدون ما ألف صوبه .. خوزت ايده من على كتفي وقلت :
هذا موضوعي.. وأنا اللي لازم اتحمل نتايجه..


رد يهمس:
سلوم.. صدقني.. نتايجه وخيمه ..


وقبل لا اقول أي شي.. دارت أمي بجسمها.. وشافتنا.. أنا ومحمد.. صاخين عند الباب نطالع عليها.. وهي ماسكه الدله..


استغربت وابتسمت:
خير وش بلاكم.. متيـبسيـن عند الباب..؟!!


أشرت صوب الدله :
حطي الدله من ايدج.. وتعالي.. اريدج بموضوع..


خير يا سالم قول وش موضوعك...؟!!


شفتها.. تحط اكواب الشاي والدله في صينيه.. وتريد تشيلها.. يـــيت صوبها.. وخذيت الصينيه من ايدها وقلت:
يستحسن تحطي الصينية هني للحفاظ على الأمان..


يسد أني اريدج.. انتي بروحج.. على بالج أنتي هينه.. ؟!!


طالعتـني باستغراب:
فيك شي..؟!! والله مافهمت من اللي تقوله شي واحد..؟!!


طالعنا محمد اللي كان منسند على الباب ومكتف يدينه :
حالياً.. احسن أنج مافهمتي..
لكنــ..


طالعت عليه ومقلت عيوني وأشرت.. تــشَبْ..

سكت..

ويودت ايد امي.. ورحنا صوب الميلس.. ودشينا .. وصكيت الباب من وراي..وأنا مطنش ومتجاهل محمد


في البدايه يلست احذاها.. لكن.. عقب..ما شفت عيونها..سكت ما رمت أقول شي.. طالعت علي :
خير يا سالم وش الموضوع..؟!!


أشرت.. على محمد اللي كان واقف عند الباب.. :
لا يا يمه لخبطي محمد اللي يريدج بموضوع مو أنا..؟!!

مقل محمد عيونه.. وهو منسند على اليدار.. ومكتف يدينه وقال:
هــاه..؟!!

قمت من مكاني بسرعه ووقفت وراه... وهمست له:
محمد..انسى كل كلمة قلتها بذرابه.. وأنت الصاج هذي أمي.. مو أي حد..
يالله.. مهدت لك نص الدرب..
والباجي عليك..

عدل وقفته ولف لوراه.. وطالعني بنظره تضحك :
ليش يا حسره.. وأنت قلت شي..؟!!


وسمعنا أمي تقول:
واللحين بتقولون وش عندكم تتساسرون..؟!!


أشرت له.. روح.. يالله..
وأول ما لف بجسمه صوب أمي.. دزيته.. علشان يكون جريب منها..
وقلت:
الله يكون بعونك أن شاء الله..


لف براسه.. وقال: هين.. لا اسويها فيك.. أنا قلت من البدايه.. مستحيل ترمس..


وقف بويه أمي اللي يالسه على الكنبه.. وقال :
سمعيني يمه.. أنتي من متى تقولين اريد افرح فيكم وأشوف عيالكم..؟!!

ابتسمت:
من زمان يا ولدي..


أنزين.. ولف براسه يطالعني..وقال: بداية خير.. انطر..


وطالع صوب أمي:
أنزين يالغاليه.. ولو قلتلج.. يا هاليوم.. اللي نريدج تفرحين فيه.. وشو تقولين..؟!!


لهْ.. اخيراً.. وطالعت صوب محمد شوي وعلي شوي..
يعني تريدوني اخطبلكم..؟!!


مقل محمد عيونه.. وأشر:
لالا.. مو أنا.. لا توهقيني يا شيخه..!!
هذا.. ( وأشر صوبي ) سالم.. مو أنا..

وقالت أمي لمحمد:
وليش أنت ما تريد اخطبلك.. اسمع.. قبل يومين أم سعيد الخطابه.. قالت أنها شافت بنتين توأم.. مثل القمر..
بخطب وحده لك.. والثانيه لسالم..
يعني اثنين اخوان لثنتين اخوات..


مقلت عيوني وقلت ابخاطري.. توهقت اللحين.. يا محمد..وش الحل يا رب..؟!!


ضحك محمد بالصوت العالي:
قلتـلج.. بعده على الزواج يا يمه.. ولا بعد توأم..؟!!
إذا أنا متوهق بسالم.. بعد تريدين توهقيني بوحده.. يمكن ألاقيها عند أختها كل أربع وعشرين ساعه..؟!!
لالا.. انسي الموضوع..

أشرت أمي صوبه:
إذا ما تريدون أخوات مو مشكله.. بخطبلك وحده مو من نفس القبيله.. حتى.. وش قلت..؟!!


حط محمد ايده على راسه:
قلت.. لا إله إلا الله ومحمد رسول الله..
( وبدا يأشر )
يا.. يُمه.. دخيلج.. قلت.. انسي الموضوع.. ما اريد اتزوج..
( وأشر صوبي )
سليم الئيم.. هو اللي يريد الزواج مو أنا.. مو انـــــــــا..


خلاص برايك.. أنت حر يا محمد.. بس لما تريد تتزوج خبرني.. وطالعت علي أمي :
وأنت.. حاط وحده براسك.. وتريدني اخطبها لك..؟!! ولا تريدني اخطب على ذوقي..؟!!


طالعت صوب محمد.. اللي قال لأمي:
أيوه.. عليج نور قلتيها بنفسج.. حاط وحده براسه..ويريدج تخطبيها له..


ضحكت أمي.. وأشرت:
قرب مني وقول منو هي ..؟!! بنت منو..؟!!


أشرت :
لالا.. مرتاح بمكاني..

طالعت على محمد.. علشان يساعدني..


قال محمد بسرعه لأمي:
البنت.. اسمها نورة..


طالعته:
نورة.. هــاه.. نورة بنت عمك فارس..؟!!
زين مخترت.. بنت ناس.. زينه.. ومتعلمه.. وأكثر من جذيه اعرف اخلاقها.. من يوم هي صغيره..


قال محمد:
لالا يا يمه.. مو بنت عمي فارس..
نورة اللي نقصدها وحده ثانيه..


سكتت أمي شوي .. وعقب طالعتني:
هــاه.. عرفتها.. أكيد تقصد نورة.. بنت خميس اللي بيتها في الركن..
زين والله.. هم بعد بنت ناس وأياويد..


صرخ محمد:
لالالالا.. لا يا يـــُمه.. مو نورة بنت خميس..


ردت.. وسكتت أمي.. وأخذت تفكر.. عقب طالعت علي وهي تبتسم:
عرفـتها.. أكيد نورة بنت سعيد.. صح..؟!!
خير مخترت يا ولدي..بنت بقمة الجمال والأدب.. والله أنك طالع علي ..ذوقك حلو.. وزين أنك قلتلي.. لأني سمعت أمس أن حد متقدملها..
اللحين بسير وبلبس عباتي قبل لا توافق باللي ياها..

حط محمد ايده على راسه وصرخ بصوت عالي:
لالالالالالا..
نورة اللي نقصدها.. لا نورة فارس.. ولا نورة خميس.. ولا نورة سعيد..
نورتنا وحده ثانيه..

طالعت عليه أمي :
أنا اريد اعرف منو منكم بيخطب.. أنت ولا هو..؟!!


أشر محمد صوبي : لا هو اللي بيخطب مو أنا..


أشرت له :
عيل اسكت.. ماقلت كلمه.. إلا انت ترد.. خلني افهم منه..


وردت تطالع علي:
وأنت ماعندك لسان.. قول وخلصني.. نورة بنت منو ..اللي أنت تريدني اخطبهالك..؟!!


قال محمد ابسرعه :
نورة بنت عمي سالم..


طالعت أمي صوبه:
اسكت كم مرة لازم أقولك اسكت خله يرمس يقول ..

طالعت علي.. وشكلها.. ما استوعبت اللي قاله محمد.. إلا عقب.. ما شافتني.. وردت تطالع على محمد بعصبيه ووقفت:
شــــــــــــو..؟!!

نورة بنت الحيزبون..؟!!


طالعت صوبي وهي تصرخ:
لو تموت.. ما خذيتها.. سمعت ولا لأ..؟!!
وأنا اقول وين تروح.. كل ما تقص وتغيب.. هأ.. هــأ.. ( وبدت تسوي حركه بيدها )
غيب يا قط العب يا فار..


وقف محمد.. اللي كان يريد يتفاهم وياها:
أنزين شو مشكلة نورة بنت عمي سالم.. ؟!! لو بتقولين على أمها..!!
أمها.. توفت من زمان الله يرحمها..
يعني مافي أي شي..


أنت اسكت ولا كلمه.. أكيد بتشجعه.. أصلاً محد خرب أخوك غيرك..

ليش يا يمه.. حد قالج أن سالم جهاز علشان اخربه.. !!


حمود..عن
قلة الأدب.. قلت اسكت يعني اسكت..


وراحت من صوب محمد.. ويت عندي.. وطالعتني بعصبيه:
سالم.. لو تريدني أخطبلك أي بنت بهالديره.. ماعندي أي مانع.. بس نورة بنت عمك.. لأ.. يعني لأ..


قلت باعصاب هاديه:
يمه.. هذي حياتي يعني أنا اللي بتزوج.. واللي أريدها نورة بنت عمي..
وإذا ما خذيتها..
ما اريد آخذ غيرها..


أشوفك.. يا سالم.. من قبل ما تاخذها.. وقفت بويهي وتعاند.. عيل شو بيستوي لو خذيتها..؟!!
يتضربني..؟!!


تغيرت ملامحي :
يا يُمه.. الله يخليج.. فهميني .. نورة غير امها.. والله غير..
ولو تحبيني صج.. بتخطبينها لي..


تعرف يا سالم.. احسنلك تسوي شرات أخوك.. ولا تعرس.. انزين..
وإذا المحبه تنقاس بمقياس نورة..
عيل لا احبك.. ولا بخطبها لك.. ما دام راسي يشم الهوى..وإذا مت.. تزوجها.. لأني حزتها.. ما بكون موجوده علشان اعارض..


صرخت:
بسم الله عليج.. لج طولة العمر..


قاطعتني وهي تخوزني من جدامها.. واتجهت للباب علشان تظهر:
يا حسافة عمري اللي قضيته بتربيتكم.. يا حسافه..
شكلي ماعرفت اربيكم زين

وراحت... عقب ما صكت باب الميلس من وراها بقوه..


اقتربت من محمد.. وطالعته:
والحل..؟!!


وجه محمد بعيونه صوب الباب :
المهم خطينا الخطوة الأولى.. وخير أن شاء الله..على الخطوة الثانية
ظهرنا.. من الميلس..

وتركني في البيت..عقب ما تناقشنا.. وسولفنا.. على اللي استوى.. واللي ممكن يستوي..


******************************************

(( محمد ))

رحت وسلمت على اخواني وعلى أمي اللي استسمحت منها قبل لا اظهر..

وتوجهت لبيت عمي علي..

وأول ما وصلت ودشيت البيت.. لقيت عمي علي يالس في الصالة.. اقتربت منه ويلست..
وأنا اتنهد..واخوز القــتره من على راسي..

طالع علي بابتسامه خفيفه:
خير أن شاء الله..وش بلاك تـتـنهد..؟!!


ليش اتـنهد..؟!!
مافيني شي.. بسير ارتاح في غرفتي شوي وعقب بيلس وياك.. واسمحلي اللحين..


انزين يا محمد ما بتخبرني وش بلاك قبل لا تسير..؟!!


طالعته عقب ما وقفت :
صدقني انه شي.. عادي..تعب وارهاق مو اكثر من جذيه..

أشر بايده:
خلاص.. ما اقطع عليك.. سر لغرفتك.. وريح وعقب بنرمس أن شاء الله..


****************************************

(( العم علي ))

عقب ما دش محمد غرفته.. قمت للمطبخ وسويت له كوب عصير بارد.. علشان يهدي اعصابه
واتجهت لغرفته

ولما وصلت عند الباب.. سمعت صوت محمد يرتفع..
وهالسبب اللي خلاني اوقف في مكاني..غصب عني..

*********************************************

(( محمد ))

لما دشيت غرفتي قلت بهدي اعصابي وعقب بيلس مع عمي علي.. لكن ياني اتصال مفاجأ من سالم أخوي..وقبل حتى لا افصخ كندورتي..

ولما رديت عليه.. اسمعه يقول بعصبيه :
محمد.. أمك طينتها..


خير يا سالم.. طينت شنو بالضبط..؟!!

يعني ماتعرف شنهو اللي تطين..؟!! أمك يا استاذ.. حولت البيت حريجه.. وابوك اللحين في الصاله.. ينازع..
وأنا اللحين اشوف الواحد سبعه.. وكلمه وحده من ابوك ما اظمن عمري..

تعال.. ياخي قبــ...

وفجأة.. قطع كلامه.. صوت ابوي اللي على ما اعتقد دش عليه في الغرفه وكنت اسمعه يقول لسالم:
اسمع.. نورة هذي تحرم عليك مثل ماتحرم عليك امك سمعت ولا لأ..؟!!


وانقطع الاتصال ابويهي..بدون سابق انذار

ركضت علشان اظهر من غرفتي.. لكني شفت عمي علي واقف عند الباب يطالع علي وهو ماسك كوب العصير..قبل لا اظهر..

تصامت عيونا في بعضهن.. وقال:
خير أن شاء الله.. وش بلاك يا ولدي..؟!!


اضطريت اني ارد عليه وانا اركض متجه صوب الصالة.. علشان بسير:
عقب.. عقب.. مو اللحين..
شكله اليوم يا ذابح او مذبوح..

وظهرت من بيت عمي علي.. بسرعة فضيعة.. ورحت لبيتنا...
واول ما وصلت.. سمعت.. اصواتهم مرتفعه..
دشيت البيت بسرعه..

لقيت حارب ونورة وايمان.. متيبسين.. عند باب غرفتهم.. أما.. ابوي وامي وسالم.. في وسط الصاله..ضايعين في الخلاف..

ركضت صوبهم وقلت وأنا أاشر :
هدوا.. هدوا.. يا جماعه.. وش بلاكم الله يهديكم..
اصواتكم وصلت لآخر الحاره..

طالع علي سالم اللي لأول مرة في حياتي اشوفه معصب مثل هالمرة وهاللحظة بالذات :
ياخي.. فهمهم..
صرخ ابوي مقاطع:
اسكت يالخايس يوم تقول لأخوك يفهمنا..
شنو على بالك..؟!! بهايم ما نفهم..؟!!


تدخلت بسرعه:
لالا يُـبه مو قصد سالم جذيه..


وأشر ابوي بويه سالم:
قصده ولا مو قصده.. هذي ماهي مشكلتنا.. المشكله اللحين..
أن اخوك.. يريد يكسر كلمتي..
ويمشي رايه علي.. أنا وأمه..
هذا وانت ماخذتها تراددني ومو قاصر عليك غير ترفع ايدك وتضربني يا سالم..؟!!


سالم تنهد بصوت عالي وقال:
أووووه..
السالفه ماهي بسالفة تمشيت راي.. السالفة سالفة أني اريدها تكون حرمتي..
انزين انت ليش محتر.. أنا اللي بعرس عليها..


مد ابوي ايده على فلينت سالم ..وهو يقول : تقول محتر لبوك.. يالكلب..؟!! تدخلت في الوسط من بينهم وفارعت وبطلت ايد ابوي وقلت:
تراه بياخذ بنت اخوك مو غريبه.. وش بلاك معصب اللحين الله يهديك..؟!!


صرخ سالم وهو يأشر صوب أمي :
حشى منتي بأم..حشى..

ورد يأشر صوب أبوي:
وأنت..
إذا الخلاف من بينك أنت وعمي وش له تدخلونا نحن وياكم.. وهذا اخوك وش بلاك .. ماتريد تقتنع..

صرخت بصوت عالي :
بس.. خلاص.. انسى الموضوع يا سالم..

طالع علي وقال:
انسى..؟!!
حشى ما نسيت.. ونورة بتكون حرمتي ولـ...........


قاطع كلامه.. ابوي اللي يود فلينت سالم وطرها نصين:
يالخايس ما بتاخذها يعني ما بتاخذها..

تشابك ابوي مع سالم.. ويت امي تريد تدخل..

لكني قدرت افكهم عن بعض..اتجه سالم لغرفته بعصبيه وهو يقول:
باخذها..يعني باخذها..
وظهر وهو ماخذ كندورته

لحق وراه ابوي وصرخ:
لو ظهرت يا سالم..لا أنا ابوك ولا اعرفك وبتبرى منك ليوم الدين..

صخ.. سالم في مكانه..وهو معطينا ظهره

ركضت صوبه وقلت له بهمس وأنا ميود ايده :
سالم هذا ابوي الله يهديك.. دش غرفتـك..وغضب الوالدين من غضب الرب لا تخلي الشيطان يفرق من بينك أنت وابوي .. ونورة لاحقين عليها..
دش غرفتك اللحين يالله..

تنهد وهو يطالع علي:
بنفجر يا محمد.. خلني اظهر احسن..

ماعليه يا سالم.. بس مو اللحين...اظهر عقب..أقل ما فيها..
احترام لبوي..
وعلشان ما يغضب عليك..


خوز ايده عن ايدي وبدون ما يطالع صوب ابوي .. اتجه لغرفته..
وصك الباب من وراه..


اقتربت من ابوي وقلت:
ريح اعصابك يالغالي.. وما يحتاي تفور دمك.. أنا اقول لـ...


قاطعني:
أنت السبب يا محمد.. أنت..


استغربت:
أنــا..؟!!


هيه أنت.. من يوم يومك تيب المشاكل..هالبيت كله استوى جحيم وأنت السبب..


طالعت صوب أمي اللي كانت واقفه بسكوت مفاجأ.. ورديت اطالع عليه:
بس أنا ما سويت شي.. ولا لازم محمد يكون بكل سالفة تستوي..؟!!
يــُبه..
لا تظلمني..؟!!


وصار اللي ما توقعته..

عطاني طراق.. خلاني ارد لوراي.. حطيت ايدي على خدي.. ورفعت عيوني أطالع عليه بذهول..


طالع علي..وقال وهو يصرخ:
اطلع برع يا محمد.. وما اريد اشوف ويهك بهالبيت..
لا تعتب هالبيت مادمت حي..سمعت ولا لأ..؟!!

وفجأة.. سمعت صوت ايمان وحروب يصيحون بالصوت العالي..
ركض حارب ووقف عند ريولي وهو يصيح.. ويقول لأبوي:
ماهبك..


طالعت على ابوي.. بصدمة..خصوصاً انه مد ايده علي جدام اخواني الصغار..
وقلت:
بظهر.. واوعدك.. ما بتشوفني.. لا انا حي.. ولا انا ميت..
بس قبل لا اظهر بقولك شي
عرفت اللحين ليش كل مرة تطقني وتطردني.. وليش نظرات الكره هذي دايمن لي..
لكنك.. تحاكمني على شي مارتكبته..
والمشكلة اللي بينك وبين عمي.. عمرها ما بتنحل بالنسبة لك.. إلا إذا الموت دق بابكم.. علشان يسلبكم اللي ما قدرتوه..


ونزلت.. وحبيت حروب.. واتجهت صوب اخواتي.. وحبيتهم.. وقبل لا اظهر..
طالعت صوب امي :
نصيحة.. لا تخسرين سالم.. شرات ( وطالعت على ابوي ) شرات ما خسرني..



وظهرت من البيت..
وأنا اسمع صوت بكا اخواني يتردد في زواياه..


*****************************************

يتبع
vvvvvv
vvvvv
vvvv
vvv
vv
v

القصة طويلة مررررررررررررررررررررة بس حلوة مرررررررررررة مرررررررررررررررررررة مررررررررررررررررررررةوشكرا

سلووووووووووووووووووووووووووووم

يسلمووووووو على المرور خليلو

](( العم علي ))

دش علي محمد وويهه متغير.. وبدون ما يطالع علي.. اتجه صوب غرفته..

لحقته.. ودشيت من وراه..

شفته واقف في نص الغرفة.. اقتربت منه وحطيت ايدي على كتفه..من وراه وقلت:
محمد وش بلاك..؟!! ماشفتـني كنت يالس في الصالة..؟!!

كان ساكت.. وما قال أي شي.. درت من وراه.. وجابلت ويهه ويه بويه.. وهو منزل عينه للأرض..انصدمت لما شفت خده احمر..
مديت ايدي ولمست خده.. وأنا اقول باستغراب:
محمد..؟!!
شنهو اللي بويهك..؟!!


ابتسم ابتسامه شاحبه وهو منزل عينه للأرض :
ما فيني شي..


قلت بعصبيه:
محمد.. طالع ويهك..واشلون صاير..؟!! وتقول مافيك شي..؟!!


رفع عينه وصد للصوب الثاني:
تشاديت مع واحد من الربع..وإذا ما يضايجك ..؟
ممكن اللحين تهدني بروحي..؟!!


كان كلامه يدور براسي..وما كنت مقتنع.. رديت أعيد عليه نفس السؤال:
محمد..شنهو اللي بويهك..؟!!


عاد علي نفس الإجابه وهو صاد للصوب الثاني.. عصبت :
والله اللي اشوفه ما عادت لي قيمة عنك..موجود ولا مو موجود عادي مافي فرق..صح..؟!!
إذا مو بخاطرك تقول الصج..؟!! على الأقل قول ما اريد..
لكن تكذب علي هذا اللي ما اتوقعه منك..؟!!
واللحين بتخبرني وين رحت بالضبط وشنهو اللي خلا ويهك أحمر..ولا لأ..؟!!


سكت.. في البداية.. عقبها دار بويهه .. وحط عينه بعيني .. ومشى صوب الشبرية ويلس على طرفها وطالع علي:
تعرف وين سرت..أول ما ظهرت من البيت..؟!!
رحت بيتنا.. لأن سالم وابوي تضاربوا..
بسبب موضوع نورة بنت عمي.. مثـل ماتعرف انه يريدها له كزوجة..
وبسبب الخلافات.. لا أمي ولا ابوي طايعين..
المهم.. فاتحنا أمي بالموضوع.. وهي رفضت.. فعقب ما رديت اهني اتصل سالم وخبرني أن الوالده الله يهديها خبرت ابوي..
فسالم شد الكلام ويا ابوي.. وابوي معروف مو مال تفاهم للأسف..
فتشابكوا يــيت وفارعت من بينهم.. ويالله يالله حتى طاع سالم ودش غرفته..واقنعته ما يهد البيت..
لكن..
اللي ما توقعته.. وربي ماتوقعته..
أن ابوي يمد ايده علي جدام اخواني الصغار.. أنت لو شفتهم بيكسرون خاطرك..كل واحد متـلصق بالثاني..
لدرجة أن حروب ركض صوبي وقال لأبوي ما أحبك..
وياليته اكتفى بالطق..بعد..راغني من البيت..
هذا جزاتي..؟!!

كنت افكر.. وحبيت آخذ العذر لأبوه وحتى لو كان غلطان:
لا يا محمد.. ابوك أكيد مو قصده يمد ايده عليك وبالذات جدام أخوانك الصغار.. لكن الغضب من الشيطان ولا تاخذ على خاطرك منه..


طالع علي بنظره:
آخذ بخاطري..!!ضحكتـني ومالي خاطر اضحك.. ابوي ما خلا شي بخاطري علشان آخذ عليه شي..


ما رمت ارد على كلامه بأي شي.. اضطريت اني اتحجج :
ماعليه يا ولدي..بتركك اللحين وارتاح.. وعقب بيلس وياك .. وبنتـناقش


***************************************

(( محمد ))

عقب ما ظهر عني عمي علي.. لازمت غرفتي وما ظهرت منها..
وكان يطل علي بين فتره وفتره..وطول هاليوم.. افكاري تروح وتيــي باللي دار واستوى من احداث

مرت الأيام والاتصال بيني وبين أهلي مقطوع ما عدا سالم كان الاتصال بينا متواصل ..

وفي أحد الأيام..

اتصل علي عمي سالم.. وطلب مني أني ابيت عنده.. ومارمت ارد طلبه خصوصاً عقب ما قالي أنه أخذ الموافقه من عمي علي..
وبدوري..
استأذنت من عمي علي أني بروح لبيت عمي وبرقد عنده هاليوم وبس..

وافق على طول بدون ترد لأنه متـفق من قبل ويا عمي سالم..
على الرغم أني اقترحت على عمي علي لو يرقد هو بعد في بيت عمي سالم.. لكنه رفض.. وباصرار..

واحتراماً لرغبته.. وافقت..ورحت..

******************************************

(( العم علي ))

سار محمد لبيت سالم عقب صلاة العصر.. ومر علي الوقت وأنا في الحوش يالس ازرع ..بعض النباتات.. اقضي وقتي..


وعقب ما سمعت أذان صلاة المغرب.. اتجهت..
لداخل البيت توضيت..
ورحت للمسيد.. وصليت..


وعقب ما خلصت صلاتي.. كنت يالس ادعي لليميع.. وبالي كان مشغول ويا اللي مستوي.. وفي حزة.. ما كنت ادعي..فجأة..
ربي الهمني بفكرة.. ممكن تحل مشكلة هالعايلة..


ظهرت مثل المينون..
متوجه لبيت سالم.. ولما وصلت.. وطقيت الجرس.. بطل محمد الباب اللي أول ما شافني ضحك..:
ما كان من الأول..؟!!


خوزته بإيدي :
أنت غلطان مو ياي ارقد وياك اهني... المهم خبرني اللحين عمك سالم وينه..؟!!

أشر صوب الميلس: عمي بالداخل.. تفضل..


دشينا ويلسنا.. وعقب الترحيب.. طالعت على ابو نورة :
اللحين أنا ياي ابرمسكم بموضوع ضروري.. لكم بارض ولا لأ..؟!!

طالع ابو نورة صوب محمد.. اللي علامات الاستغراب باينه عليهم:
قول .. وش عندك ياعلي..؟!!

اللي عندي.. بيحل مشكلتكم يميع.... او يمكن يساهم بتيسيرها بإذن الله لأن عقب الصلاة.. يتني هالفكرة وأنا ادعي


استغرب محمد من كلامي:
إذا كنت تقصد مشكلة عمي وأبوي.. من اللحين بخبرك.. لا تتعب عمرك.. مالها حل..


أفْ يا سالم.. مرة وحده مالها حل..؟!! يابوك هالدنيا كل ماشاكلها مرتبطه بحلولها لكن يبالها من يفكر ويصبر.. وترى الصبر مفتاح الفرج..وأنا ابوك..


عقد حيابينه.. وقال سالم أبو نورة:
ماعليك منه.. وخبرني وش الفكرة.. ؟!!


اسمعوا............................................ ..................................


سكتوا في البداية.. عقب طالع علي محمد:
وش اللي يخليك تضمن انها بتحل المشكلة أو يمكن تيسرها..؟!!


محمد يا ولدي.. ترى الفكرة يسد انها يـــتني وانا ملتجأ ومذلول في بيت الله.. والرحمة من ربك..وكل ما كنت واثق بالله.. كل ماربي بيحقق اللي تباه.. ولا بيخيب ظنك..


قالوا بصوت واحد.. والنعم بالله..


وأشرت صوب محمد.. وأنت لازم اللي تبدأ بهالخطة..

خوز ظهره من على الكنبه.. وعقد حيابينه ومقل عيونه:
نعم..؟!! شـنهــــــــو..؟!! أنــا..؟!!
وأشر بيدينه..
لالا.. اسمحلي.. لذاك البيت مالي رده.. لاني حي ولا ني بميت..


مسكت على لحيتي:
وإذا قلتلك لجل هالشيــبات..بتفرق عندك..؟!!


قاله ابو نورة:
أفا.. يا محمد لو بترد عمك علي..

حط ايده على ويهه وتنهد.. ورد يطالع علينا:
مستحيل ارده.. لكنكم تجبروني.. وربي تجبروني..ادش هالبيت..

طالعته.. وكنت انتهز الفرصة:
يعني بدش ولا لأ..؟!!

بدشه علشانكم.. لكن.. حطوا في بالكم زين..بسوي اللي تبونه.. إلا شي واحد..أني ارمس ويا ابوي.. والله لو ذبحتوني ذبح أنزين..


ضحكت:
لالا يا محمد.. ما بيحتاي ترمس وياه.. لكن سو اللي خبرتك عليه..وبس..


رد.. يقول وهو يطالع صوبي:
لازم اسوي اللي يالس تقول عليه..؟!! يعني ما عندك غير هالفكرة..؟!!


ابتسمت.. وكانت عيوني كل مرة تتوجه صوب كل واحد منهم:
ماعليه.. سايرني.. اللحين.. وخذني على قد عقلي..
وشوف إذا هالشيبات بيفيدنكم ولا لأ..؟!!

**********************************************

(( محمد ))

أول ما سمعت جملة عمي علي.. قمت من مكاني وأنا ممقل عيوني ويلست احذاه.. وقلت بكل استغراب:
اتريا.. اتريا.. عيد اللي قلته قبل شوي..؟!!


استغرب عمي علي.. ورد يقول:
قلتلك..
ماعليه.. سايرني


لالا يا عمي.. اريد اللي عقب هالجملة.. أنت قلت خذني.. على.. قد.. شو..؟!!

ضحك:
هـــا.. تقصد.. خذني على قد عقلي..!!


أشرت:
أيوه.. أيوه.. من وين يــبت هالجملة..؟!!


طالع على عمي سالم وقال.. عقب ما رد وطالع علي:
هالجملة.. معروفه.. بس ليش تسأل عنها..؟!! أنت أول مره تسمعها..؟!!


هزيت براسي..لا.. ورديت لوين ما كنت يالس
وقلت ابخاطري:
معقول يكون..عمي هو الغريب..؟!! لكن واشلون..؟!!

وسمعت صوت عمي يقولي:
لا تنسون.. من بكره.. ابدأوا


قال عمي سالم:
أن شاء الله..

عيوني كانت متعلقة بعمي علي.. طول الوقت.. لزم عليه عمي سالم على العشا.. ويلس ويانا وتعشى..وطول هالفتره..
وأنا اقول في خاطري:
يا كثر هالأسرار اللي تريد من يكشفها..وأولها هالغريب..

******************************************


(( الجزء الثــــــاني والعشرون ))




(( ضربة يا تصيب يا تخيب ))




(( سالم ))

ياني اتصال من أخوي محمد وخبرني على اللي اتفقوا عليه.. هو وعمي سالم وعمي علي..

كنت عامل حسابي.. ونطرت في الغرفة.. وما ظهرت لأي مكان..
وعيني على الساعة.. ولما شفت الوقت حان..


قمت من مكاني.. وتوجهت للصالة.. شفت ابوي وأمي يالسين يشربون القهوة.. واخواني في الحوش يلعبون..


رديت لغرفتي.. واتصلت على محمد وخبرته على الوضع.. في البيت..
وظهرت مرة ثانيه.. ويلست ويا امي وابوي في الصالة..نشوف التيلفزيون
وبحكم اللي استوى من بينا..
كان السكوت هو سيد الموقف.. وبعد فتره ..

سمعنا صوت اخواني بالحوش يرتفع..
حتى وصل لداخل الصالة..
ودخلت ايمان ركض.. تطالع علينا بفرحة كبيرة :
محمد يا البيت .. محمد اهني..


طالعت على امي وابوي .. علشان اشوف ردت فعلهم.. لقيت ابوي يطالع على أمي .. اللي وقفت على طول..في مكانها..


دش علينا محمد.. اللي أول ما دش.. ما طالع لا صوب أمي ولا أبوي
كأن الصالة فاضية..ولا حد فيها..
واتجه صوب غرفته..
وخلا الباب مبطل من وراه.. ودشوا اخواني الصغار..


طالعت امي صوب ابوي اللي كان يالس وقالت:
محمد رد يا حسن.. ما بتسير وترمسه..؟!!

أخذ فنيان القهوة.. وقال:
خليه.. اللحين..


وفجأة.. سمعنا صوت حروب يصيح.. وعقب يت نورة تركض صوبنا..

****************************************

وفجأة.. سمعنا صوت حروب يصيح.. وعقب يت نورة تركض صوبنا.. وأول ما وقفت.. أشرت صوب غرفة محمد :
لحقوا.. محمد يقول انه بيسافر..


مقل ابوي عيونه .. وحط الفنيان من ايده.. واتجه اهو وأمي صوب غرفته.. بسرعة
وكنت واقف ابمكاني.. اطالع واتفرج..

**************************************

(( محمد ))

لما دشيت غرفتي.. طالع علي اخواني الصغار.. ولما شافوني آخذ اغراضي بشنطة السفر.. سألني حروب:
ألا وين أنت بتـلوح..؟!!

وبدون ما أطالع عليه:
بسافر.. وبهج من هالبيت.. وبترك الدنيا لأبوك.. مو قال أني أيـــيب المشاكل من أول ما ادش بهالبيت..؟!!
يالله بريحه مني.. ولا بيشوف رقعة ويهي..


سكت في البداية..لكن عقب ماتذكرت ان اللي يالس ارمسهم يهال ولما درت أطالع..على هالسكوت اللي حل بالغرفة فجأة..؟!!طاحت عيني بعين حروب ..اللي أول ما شاف عيوني.. بكا.. وهو يقول:
أنا تمان.. بلوح مأك.. وبهذ.. من هالبيت .. ما اهب ابوي.. لانه ذلبك تَفْ..

سكت.. وطالعت على ايمان اللي تيبست.. عند الباب وشفت نورة.. راحت ركض صوب الصالة..

اقتربت من حارب:
اسمعني حبيبي ابوي ضربني أنا.. علشان جذيه بهج.. أما أنت ابوي يحبك وايد وعمره ما ضربك فاشلون.. بتهده بروحه..؟!!

كان رافض.. يسمع كلامي.. حظنته وحبيته على راسه.. وأول ما حسيت بخطوات تقترب من غرفتي.. هديت حروب..
واتجهت صوب الشنطة.. اكمل بترتيب اغراضي فيها..

دش ابوي وأمي.. وسويت عمري مطنش.. ومو مهتم..
وكنت بكل مرة.. امد ايدي وآخذ شي من الغرفة واحطه بهالشنطة.. وصوت بكا حروب.. هي الموسيقى الوحيده.. اللي تطرب بهالغرفة.. وتقطع قلبي..

سمعت صوت ابوي فجأة يقول:
وش هذا اللي يالس تسويه يا محمد..؟!!

لا طالعته ولا شي.. كلمته وأنا احط بالأغراض:
سلامتك.. ما سوي شي..بس ياي آخذ كل اللي يتعلق فيني بهالبيت..


وسمعت أمي تقول :
ليش..؟!! مو براد لهالبيت يا محمد..؟!!

وقفت وأنا ميود كندورتي..ورفعت عيوني صوبها:
لا مو براد لهالبيت حتى لو مت.. مو براد.. وبهدلكم البيت والحاره والمنطقة والدولة بكبرها..
بهاجر
ورديت اكمل بحط الأغراض..


اقترب مني ابوي ويود ايدي وهو يقول:
رد الاغراض مكانها.. وبلا حركات اليهال..هذي..

طالعت عليه بنظرة كلها حزن.. وخوزت ايدي من ايده:
انا ريال.. واللي يالس اسويه.. مو حركات يهال.. وإذا ما كنت ملاحظ..
خليني انبهك..
كل ما استوى شي بهالبيت.. أنت وامي.. تقولون.. أنت السبب..
أنت اللي تــخرب اخوانك.. وأنت.. وأنت..
وبكل مرة.. تطق.. وتمد ايدك علي.. وبلا ما تحشمني.. وكل مرة اقول ماعليه.. ابوي..
وهم بعد تروغني من البيت..
يــُبه.. اريد ارتاح وريحك.. بهدلك الدنيا ومافيها.. ولا تخاف.. اطمنك.. لو بالغلط.. ما بتشوفني.. إلا إذا ربي اراد..
واكوه أنا جدامك يالس انهي صلتي فيكم.. وبروح..
ومشكلتك أنت وعمي.. حلوها على كيفكم.. مالي خص.. وسالم يتزوج نورة ما يتزوجها.. اظنه كبير ويروم يتخذ أموره بنفسه..
واخواني الصغار الله يحفظهم.. انت وأمي ما بتقصرون فيهم..
وإذا حد سألك عني.. قول.. مات
أو قول اللي تباه..
( وأشرت ) وهالبيت.. ما عاد لي مكان فيه..


وصكيت الشنطة.. وتجاوزت ابوي وأمي اللي كانوا واقفين على الباب..
لحقتني امي في نص الصالة ويودت كندورتي وهي تصيح..:
علشان أمك يا محمد لاتروح.. لا تقطع قلب أمك بالهجر.. تريدني احبك على راسك بحبك..
تريدني اعتذر.. أنا آسفه.. غلطت وحقـك علي.. بس لا تروح..


ركضوا اخواني.. صوبي وتلصقوا فيني وهم يصيحون..
كنت ساكت..

سمعت ابوي يقول لسالم:
كلم اخوك.. خبره لا يسير..


طالع عليه سالم:
ليش..؟!! وش السبب اللي تباني اذكره واقنعه به حتى لا يسير..؟!!
مو أنت كل مرة تروغه.. خلاص.. بيريحك منه وبيهدلك البيت ومافيه..
وأنا ما يخصني..


رد عليه ابوي وهو يأشر:
ترى محمد أخوك.. يعني لو بيسير ما بيسير عنا وبس..!! تراه بيسير حتى عنك..؟!!


ضحك باستهزاء:
مو مشكله.. يمكن هذا هو قدر هالعايله.. أن الأخ.. يهد اخوه..
أنت ترفض الصلح ويا عمي.. ومحمد بيهاجر.. وبيهدني..
وشكله حروب يوم بيكبر.. بيهدنا وبيسير..
هذا هو حال الدنيا..
واللي بتزرعه.. يا يــُبه..أنت اللي بتحصده..

ودش سالم لغرفته.. وصك الباب من وراه..

نزل ابوي عينه للأرض.. وعقب رفع راسه ويا صوبي:
محمد.. تريدني احب على راسك.. علشان تيلس ..وتتراجع عن اللي براسك...؟!!


لك الحشيمة يا يــبُه لكن ماعاد يفيد لا الحين ولا عقب..
لكني قررت ومابتراجع.. لأني اعرفك زين.. استوت مدت الايد عندك شي عادي.. وتروغني لو بنصاص الليالي عادي.. مو فارجة وياك.. واللحين
الله يخليكم خلوني اشوف حياتي

وخوزت أمي وأخواني من علي.. ومشيت صوب الباب .. وسمعت ابوي يرمس من وراي.. عقب مرتسمت
ملامح الحيرة على ويهه.. وأخذ يقول عبارات مرتبكة:
ياولدي استهد بالله وتعوذ من الشيطان.. وايلس ..
يا ولدي.. اعرف اني خطيت بحقك..ياولدي..

قاطعته.. عقب مادرت براسي صوبه:
الله يخليك.. ماريد منك أي كلمة زيادة.. ولا تآمرني بشي.. أنت بنفسك ما تسويه.. وتنهيني على اللي ماتنهي عمرك عنه..

وطالعت صوب اخواني وأمي.. وعقب صوب أبوي:
اتركم برعاية الرحمان..

وظهرت من البيت.. وقلبي متقطع على المعاملة اللي اضطريت اعامل ابوي وأهلي فيها..

***************************************

(( حسن ))

عقب ما راح محمد.. كنت واقف اطالع على الباب مو مصدق باللي يصير.. وسمعت أم سالم تصرخ بنص الصالة وتقترب مني:
أنت السبب يا حسن.. أنت اللي بتضيع عيالي مني شفت سواياك لوين وصلتنا..؟!!
كم مرة قلتلك عيالك اكبروا وهذا مب أسلوب تـتبعه وياهم..؟!! بس أنت ما تسمع غير شورك العوي..

طالعت عليها بكل عصبيه:
اسكتي.. ولا والله ما يصير خير..

وابتعدت عنها.. واتجهت لغرفة سالم.. ودشيت على طول لقيته يالس فوق الشبرية..

ووجه عيونه صوب عيوني .. بصمت..

صكيت الباب من وراي واقتربت منه.. وقلت بهدوء:
سالم خبرني وش اللي يالس يصير اهني..؟!!

كان يريد ينش من على الشبرية.. لكني حطيت ايدي على كتفه..وقلت:
ايلس.. وما يحتاي توقف..

هز كتوفه:
شنهو اللي يالس يصير ..؟!!


كنت احاول اتمالك اعصابي..:
هذا كله اللي استوى جدامك وتقول شنهو اللي يالس يصير..؟!!
اسمعني زين يا سالم.. إذا كان في موال ابراسك أنت واخوك وعلى بالكم أني بلين جدام حركاتكم ذي .. ريح بالك أنت وأخوك.. لأني ما بغير اللي براسي..


ابتسم ابتسامه هاديه:
المشكلة يـــيت تسأل وتجاوب بنفس الوقت..


لميت قبضة ايدي وقلت باعصاب متماسكه:
سالم.. عن حركاتك هذي.. وخبرني.. على اللي طابخينه أنت ومحمد..


اسمعني يــُبه.. لا أنا ولا محمد يالسين نسوي أي طبخة أو أي حركة مثل ما تقول..


تنـهدت :
عيل ممكن تفسر اللي سويتوه اليوم..؟!!

يــُبه.. ليش تعتقد أن اللي استوى اليوم ممكن تكون حركة..؟!! ليش ما تقول أن القيود اللي قيدتنا فيها.. كانت وااايد قوية.. وخنقتنا حييل..
اسمعني إذا كنت تريد تعرف.. شي عن اللي استوى..
بريحك..
محمد.. صج بيهاجر..وبيهد البيت بكبره..
وحاول انك تستوعب أن اللي يصير صج.. ولا تظن أن محمد ياهل وما يروم يهج..عيال الأمس كبروا.. واستوا رياييل اليوم..
إذا كنت مو منتبه

خطر في بالي أنها حركة وكذبه لكن ملامح سالم تدل على عكس اللي يصير..
وقلت بعصبية:
آها.. عرفت اللحين..؟!!
أكيد.. بيسيرعند عمك علي أو عمك سالم..وأونه يقول بيهاجر..


وقف من على الشبرية.. وحط عينه بعيني :
إذا ما كنت تعرف .. خلني أخبرك.. ترى عمي علي.. مو موجود.. يا ولده خالد.. وخذه.. أما عمي سالم.. وهذا هو الأهم..
بيسافر اليوم..وبيتركلك الدنيا بكبرها وبيروح.. مو هذا اللي تريده..؟؟!


صرخت وأنا ممقل عيوني:
شنهو..؟!!
واشلون بيسافر..؟!!

قال بكل هدوء:
بيسافر شرات الناس..بطايره.. بس تطمن محمد ما بيسافر معاه..


صرخت بويهه.. مقاطع كلامه:
اتركني اللحين .. من محمد.. وفهمني.. واشلون بيسافر ..؟!! وأنا..؟!!


حط سالم ايده على كتفي..:
غريب أمرك يا يــُبه.. كل ما اقترب منك.. رغته.. وكل ما اعتذر صديته.. ويوم قال بيتركلك الدولة اللي انت فيها.. علشان ترتاح.. تقول وأنا..؟!!
وأنت شنهو اللي تباه..أكثر من جذيه ؟!!


خوزت ايد سالم من على كتفي.. وظهرت من الغرفة بسرعة..
كانت أم سالم يالسة في الصالة هي وعيالها يصيحون..
اتجهت لغرفتي.. ولبست كندورتي وظهرت من البيت..
مثل المينون..
متجه لبيت أخوي سالم..

******************************************

(( سالم ))

لما شفت ابوي ظهر.. اتصلت مباشرة على محمد وخبرته عن كل شي استوى هنيه..

وهو بدوره خبر عمي سالم وعمي علي..

*********************************************

(( سالم أبو نورة ))

على اتفاقنا.. كنت مفضي البيت.. ومتوجه للمطار أنا وبنتي نورة..
وأول ما وصلنا يلسنا في صالة الانتظار..

ياني اتصال من محمد.. يخبرني أن اخوي متوجه للبيت عندي..
وأن شاء الله ربي بيجبر بخاطرنا يـميع..

*******************************************

(( حسن ))

أول ما وصلت بيت أخوي سالم.. طقيت الجرس طقيت الباب مافي فايدة
وأخذت انازع وأركل بريولي الباب..

وفجأة.. سمعت صوت شخص من وراي.. لما درت علشان أشوف منو هالشخص..؟!!

لقيته علي.. اللي قال:
خير وش بلاك ترافس بالباب..؟!!

يودت ايده.. بعصبيه وترجي بنفس الوقت:
أخوي سالم... بيسافر.. يا علي..؟!!


ابتسم ابتسامه بارده:
أنزين أنت ليش محترج دمك..؟!!
مو هذا اللي كنت تريده من أول ما ظهر أخوك مرة ثانية في حياتك..؟!!

خوزت ايده بعصبية:
أوووووووووووهووووو..
كلكم تقولون هذا اللي أريده..؟!! ليش وأنتوا دشيتوا قلبي علشان تعرفون اللي اريده واللي مابيه..؟!!


لا ياحسن نحن مادشينا قلبك.. بس معاملتك وياه وجفاك.. هم اللي فهموا اللي حولك
أنك تريد سالم أخوك يختفي من حياتك..
بس ماعلينا اللحين.. اللي صار صار.. وسالم اللحين في المطار وبيسافر..


قاطعته بلهفه:
أنت تعرف وينه..؟!!


هيه أعرف وينه.. اتصل علي وطلب مني أيــيب له شي نساه من البيت.. وبوديه له للمطار قبل لا يسافر..لأن موعد طايرته عقب نص ساعة على ما اعتقد..


يودت ايده.. وأنا اريده يـركب السيارة:
اركب.. اركب..بلا ما تيــيب شي ولا هم يحزنون خلني ألحق على أخوي قبل لا يسافر..


انزين ياحسن.. خلني أيـــ....


قاطعته:
دخيلك.. اركب بسرعة..


ركبنا السيارة وتوجهنا على طول للمطار.. ولما وصلنا.. ظهرنا من السيارة.. بسرعة البرق.. ندور عليه..
لكن علي خبرني على المكان اللي بينطر فيه أخوي
ولما وصلت.. والنفس عندنا يطلع وينزل..


قلت بصوت متقطع من التنهيد:
ســـ..ســ..سالم..


تلفت.. أخوي اللي أول ما شافني تيبس في مكانه.. وللأسف مو هالاستقبال اللي توقعته..
كان واقف.. وما يا صوبي..


اقتربت منه وحظنته وأنا اصيح:
يالنذل..تريد تعيد غلطتك مرتين..؟!!
كم باجي على العمر يوم نعيد الغلطة مرتين ياخوي..؟!!


خوزني من عليه وهو يقول:
ماعليه يا حسن.. مو هذا اللي تباه..؟!!


صرخت بويهه: ومنو قالكم أن هذا اللي اباه.. بتجلطوني..؟!!


نظرني بنظره..وعطاني ظهره.. وأخذ الشنطة وقال:
يالله يا بنتي طايرتنا بطوفنا ونحن اهني..

يودت ايده.. ولما دار يطالعني.. صرخت بويهه:
وربي يا سالم مالك دولة غير دولتك.. وسفر منت مسافر.. وانسى كل شي استوى زمان..
وافتحلك ذراعاتي من أول ويديد.. سامحني ياخوي..
اشتـقت لحظنك يا سند ظهري..
واشلون تريد تروح وتهدني ابروحي.. وأشلون..؟!!


أول ما شافني مبطل ذراعاتي.. ارتمى بحظني.. واندمجت الدموع بالفرحة..

وأخذت الشنط.. وحلفت على اليـــميع انهم معزومين عندي..
وتحركنا.. مبتعدين عن المطار..

وايدي بايد اخوي.. والضحك مصاحب خطواتنا..

******************************************

(( سالم ))

كنت يالس في غرفتي.. إلا شوي اسمع اصوات غريبة في الصالة..
ومن بين الأصوات..

سمعت صوت عمي سالم..

ظهرت من غرفتي.. إلا اشوف ابوي وعمي ونورة واقفين مقابلين أمي وأخواني في الصالة.. يتبادلون السلام..


وقفت في مكاني.. لكن عيوني سبقتـني صوب نورة اللي كانت متغشية..
بالغشوه..

جبرت ريولي انها تـتحرك صوبهم عقب ما زقرني عمي سالم..
ولما وقفت وسلمت على اليميع..


سمعت امي تقول:
حسن.. اشوفك رديت اخوك.. وما رديت ولدي..؟!!
عيل وين محمد..؟!!


تلفت ابوي اللي حط ايده على راسه.. وطالع على عمي وقال:
محمد بيسافر يا سالم.. ولدي بيروح مني..

طالعوني يميع وقالوا وهم يمشون لصوب الميلس:
بسرعة خلونا نلحق محمد.. بسرعه..


توجه أبوي وعمي علي للميلس.. أما انا كنت متمسمر صوب أمي ونورة.. لكن صرخت ابوي خلتني بدال ما ألحقهم للميلس.. خلتني اسير غرفتي..وعقب منتبهت رحت الميلس وأنا شال كندورتي


اتصلنا على محمد.. اللي شكل الدور عيبه..لكن تيلفونه كان مغلق لفترة..
ولما ما شفنا في فايدة..
توجهنا.. كل مرة صوب بيت عمي سالم وعمي علي.. لكن مافي فايدة..
رحت بسيارتي أدور عليه..

أما ابوي وعمي سالم وعمي علي كانوا رباعه..

فنتهزت الموقف..
واتصلت عليه للمرة المليون.. ويالله يالله علق..

**************************************

(( محمد ))

لما كنت في السيارة.. اجول من شارع لشارع.. توقفت عند محطة البنزين..
وعقب انتبهت ان تيلفوني مفضي من الشحن..

مديت واير الشرش.. وشرشت التيلفون.. اللي أول ما تبطل شوي..
لقيت مليون مسج..
وسالم كان يتصل..
رديت عليه:
مرحبا السع..


سمعته.. يهذرب بعصبيه:
هـــــــــــــــي أنت وينك..؟!!
لاتكون اللعبه حلوة بعيونك...؟؟!!


ضحكت ضحكة:
اشوفك تشعر فين وانت مو حاس..؟!!

اسمعني يالطفس أترك عنك هالفلسفة.. وقول.. وينك..؟!
.. ترانا من متى ونحن ندور عليك .. وأبوي وعمي سالم وعمي علي.. راحوا المطار على بالهم أنك صج بتسافر..
وبترول السيارة قرب يخلص يالنذل.. خلصني وينك..؟!!


قلت بستغراب:
بشر..؟!!
شنهو اللي لم المتعوس عمك على خايب الرجا اللي هو أبوك..؟!!


ضحك وهو مفول:
ضحكتني ومالي خاطر اضحك.. بذمتك.. حد يرمس عن ابوه جذيه..؟!!
بس ماعليه ما تنلام..
الطفس يبقى طفس..
خلصني.. قبل لا يخلص البترول عقب لا خليك تيــي وتقنص السيارة.. بروحك..!!
وينك اللحين..؟!!


أنزين يا سالم.. لا تحشرني..
اللحين أنا عند شيشة البترول اللي على الشارع العام..


قال بصوت عالي:
أوفْ.. الشارع العام.. يعني مسافة نص ساعة.. غربل الله عدوك..
خلاص..
انطرني وباييك.. لا تتفلسف وتتحرك من مكانك..!!



لا يا سلوم ما بظهر عن الشيشة.... لكن بدش الكوفي اللي حذاه.. وبصف سيارتي بالباركن أوكي..؟!!


قال بعصبيه:
أكيد يالطفس.. ناس بالكوفي.. وناس محتاسين بالشوارع..
المهم.. ياينك..اللحين..


قلت بسرعة قبل لا يصك:
سالم..؟!!
الخطة انجحت..؟!!


صباح الخير يا محمد..؟!! ياي تسأل عن الخطة..؟!! المهم للحين أوكي..
لكن الباجي..
يا ضربته تصيب أو تخيب..
واللحين ياينك.. وعقب بنرمس على راحتنا..أوكي.. خلني اتصل واطمنهم أني لقيتك.. يالله في داعة الله..


أول ما صك عني سالم..
تحركت بسيارتي.. وصفيتها بالباركن .. وظهرت من السيارة.. ودشيت الكوفي..

ويلست..

وعقب مدة..ياني سالم.. اللي دش ويلس شوي بالكوفي.. ولما ظهرنا..
توجه كل منا بسيارته..

لبيت عمي علي..

ولما دشيت.. لقيت ابوي وعمي علي وعمي سالم يالسين يتريوني..
ولما شافوني..
وقفوا..

اقترب مني ابوي وقال:
ما بتسلم على ابوك يا محمد..؟!!


نزلت راسي.. عقب ما طالعت على اليـميع..حسيت حزتها ماعندي أي كلمة ممكن اقولها له..
لأني أول ما شفته تذكرت الطراق اللي عطاني اياه..
لكن بنفس الوقت.. سامحته..
من أول ما دشيت وشفته ويا عمي يالسين رباعه..



رفع راسي بإيده وقال:
أفا يا محمد.. أنت ما تنزل راسك.. خل راسك مرفوع..
ومو ولد حسن اللي ينزل راسه سمعت ولا لأ..؟!!
مهما صار ومهما استوى..
وحظني..بكل قوته..



اقترب عمي علي وعمي سالم.. وأخوي..
وأخذوا.. يضحكون..
ويرطبون الجو..وأنا ساكت..

و توجهوا صوب الحوش علشان نروح لبيتنا.. الكل كان يمشي صوب سيارته ماعداي.. كنت واقف..

داروا براسهم لوراهم يطالعوني.. قالي سالم:
محمد..؟!! ليش وقفت..؟!!

وجهت عيوني لأبوي وقلت:
قبل لاروح وياك البيت.. اريدك تتعهدلي أنك ماتمد ايدك علي


سكت أبوي اللي طالع علي عمي سالم.. اقترب مني عمي علي وقال بهمس:
محمد.. خل موضوع ابوك عقب.. مــو اللحين..؟!! أجله وأنا ابوك..

طالعت على عمي علي وقلت بصوت عالي..:
ما بأجل هالموضوع.. وأنتوا شنهو اللي يضمن لكم أنه ما يروغني من البيت مرة ثانية ويطق كل ما طلعت ابراسه..؟!!

اقترب ابوي اللي قال:
من حقه..يا علي..

وطالع علي.. أنا آسف.. حقك علي.. وأوعدك.. ما امد ايدي عليك خير شر وإذا مديت ايدي احكم علي باللي تباه موافق..؟!!


هزيت راسي:
أول شي ما يحتاي تعتذر.. بس كنت اريدك توعدني أنك ما تمد ايدك علي.. لأني كبرت يا يــُبه.. وماعدت شرات قبل ياهل.. ما يفتهم..
لكن باتفاقك.. بسير وياكم..
وأن شاء الله تلتزم به..

مشيت.. صوب سيارتي.. وخذيت عمي علي وياي.. أما.. عمي سالم ركب ويا أبوي بسيارته..

وسالم بسيارته..

وتوجهنا صوب البيت..

ولما وصلنا..

دش عمي علي ويا عمي سالم الميلس.. أما أنا وابوي وسالم دشينا الصالة..
وأول ما شافوني اخواني.. اللي عيونهم وارمة من البكا..
اقتربوا مني وأخذوا يحظنوني..
ويت أمي صوبي.. اللي أول ما شافتني بكت.. وهي تحظني ويا أخواني الصغار وقالت:
مرة ثانية حد منكم قال بيظهر من البيت بحش ريوله حش.. ومالكم غير هالبيت.. واللي يفكر يظهر منه.. ما بيظهر إلا عقب موتي.. سمعتوني كلكم.. من كبيركم لصغيركم..؟!!

لمينا أمي.. وكنا نطيب خاطرها.. وعقب ماهدت والحمدلله..

توجه أبوي وأمي.. صوب نورة في ميلس الحريم.. أما سالم اللي ما يستح على ويهه.. مشى وراهم..

سمعت ابوي يرحب بنورة ويهلي.. وعقب سمعت سالم يقولها:
البيت بيتج وخذي راحتج.. وأنتي مو غريبة..


إلا شوي شفت ابوي يدزه ويقول وهو ممقل عيونه:
رح رح.. عند اخوك احسن لك..

وطالع على نورة.. وقال:
ماعليج منه يحب يتفلسف على الفاضي.. المهم يا بنتي هذي عمتج شرات أمج وهذول يميع كلهم أخوانج وأنا أبوج يا بنتي.. سمعتيني ..
يالله بخليج اللحين ورتاحي..


ظهر ابوي من عندها..

واتجه صوب الميلس.. أما أخوي سالم اقترب مني وهو يقول :
يعني لازم الكلمة الأخيرة..؟!!
( وأخذ يقلد ابوي )..أخوانج

ضحكت...وخوزت أخواني عني عقب ما حبيت على راسهم..وقلت لسالم:
خلنا نسير اللحين الميلس ونرتاح شوي..
ولاحقين على قصتـك ويا نورة..


يودت أخوي سالم من ايده.. ودشينا الميلس.. واستمر هاليوم.. بالأكل والضحك واليلسة..وعقب ما مضى الوقت ويا الليل
حلف ابوي أن مالهم طلعه من البيت.. على الأقل هاليوم..لازم يباتون

وبالفعل..
مضى هاليوم الأول اللي بات في عمي ونورة عندنا..
وفي اليوم الثاني..
توجهوا صوب بيتهم ويابوا ما تبقى لهم من اغراض.. وفضى سالم غرفته لنورة..
وصار هو يبيت وياي بالغرفة.. أما عمي سالم..
أخذ غرفة الضيوف له..بحكم أنها يايه على تصميم جناح..

وعشنى يميع بنفس البيت.. وابوي تعدل وتغير مية مليون درجة.. حتى نفسيته تحسنت عن قبل.. واستوى يتغشمر اكثر عن قبل..
والبيت استوى فيه حياة..

وفي أحد الأيام سرت بيت عمي علي علشان اشوف احواله.. واشلون ماشيه..
ولما وصلت البيت تفاجأة.. أن البيت فاضي.. محد فيه..

خطر ببالي أن عمي علي عند جابر.. وبالفعل..توجهت لبيت جابر وسلمت عليه وسألته عن عمي علي..
وظني كان بمحله.. عمي علي كان عنده..يزوره..

وعقب مادشيت ويلست وياهم يميع.. خذيت عمي علي البيت عندنا.. قلت علشان يغير جو..

وبالفعل..

يلسنا كلنا بالميلس سوالف وضحك..وكنت سالم يالس حذاي.. يصدع راسي بنورة.. وفجأة.. قطع سوالفنا صوت عمي سالم.. وصار اللي ما توقعناه خير شر..
قال عمي سالم لأبوي :
واللحين عقب مازال الخلاف من بينا.. واستوينا في بيت واحد..
صرت اروم اقول اللي بخاطري..
عيالنا كبروا يا حسن وكبرونا وياهم..
ولأني اشوف عيالك عيالي..وبنتي بنتك.. أنا أقول يعني وش رايك نزوج نورة ومحمد.. جريب..؟!!

مقل سالم عيونه وتيبس بمكانه وطالع علي بذهوووول عقب ما طالع على عمي..

السكوت خيم على الميلس..

لقيت عمي علي وأبوي تغيرت ملامحهم.. لكن الوحيد اللي مارمت ارفع عيني بعينه..
كان أخوي سالم..

لقيت عمي علي وأبوي تغيرت ملامحهم.. لكن الوحيد اللي مارمت ارفع عيني بعينه..
كان أخوي سالم..

************************************************** *************


(( الجزء الثالث والعشرون ))


(( الزواج قسمة ونصيب ))


(( محمد ))



دش علينا أخوي حارب وقال:
أمي تتول.. تآلوا.. ألثان الأدا


طبعاً ما صدقت أن حد يا علشان ينقذني من اللي أنا فيه.. قمت على طول.. وظهرت من الميلس..بدون حتى ما الف براسي ورى..
وأول ما ظهرت في الصالة ومشيت..

شفت حد ييود ايدي.. وقفت ولفيت.. لقيته أخوي سالم.. يطالعني بنظرات كلها ذهووول وصدمة وعتاب كل المشاعر بنفس الوقت.. وقال وهو ممقل عيونه بعيوني:
مالقيت غير نورة يا محمد..؟!!
ضاجت عليك الدنيا.. وما لقيت غير نورة..؟!!


تنهدت.. وأنا احاول افهمه:
اسمعني يا خوي.. أنت فاهم الموضوع غلط..

أنزين يا محمد.. فهمني.. خبرني..؟!!!!

سكت.. وحطيت ايدي على راسي.. وعقب ما تنهدت:
اريد اعرف يا سالم.. أنت وشلون تظن أني اريد نورة كزوجة.. والله.. أني اعدها أختي.. لكن..
لكن..
عمك..

وسكت..

طالع علي:
عمك.. شنو..؟!!
يريد يزوجك منها..؟!!
يعني تريد تفهمني أنك مو أنت اللي مرمس عمي على نورة..؟!!

طالعته بنظرة غضب وارتفع صوتي عليه..:
أنت غبي..؟!! ولا يالس تتغابا..؟!!
سلوم.. أنا ما وصلت لهالخسة اللي يالس ترمسني عنها..
معقول تتوقع أني اريد اتزوج من نورة وأنت تباها..؟!!


تلعثم في البداية.. وعقب صرخ فيني:
عيل عمك من كيفه قال يريدك لنورة..؟!! وشو يعني أنت بالذات..؟!! وش له مختارني..؟!!
ياخي السالفة.. فيها شي.. وأريدك اللحين تخبرني..
لأن كلامك مو منطقي



ما رمت اتحمل اعصابي.. يودت كندورته من حلجه وحطيت ويهي بويهه وقلت بنبرة كلها عصبية:
تشب..يا سالم..
يوم أريد اتناذل.. ما بتناذل على أخوي.. ومو مستعد انلدغ من نفس الجحر مرتين..
على بالك ببيعك علشان نورة.. وليش..؟!!
لا عمك ولا نورة بيخلوني بيوم اغلط بحقك.. يسد اللي مضى.. سمعت ولا لأ..؟!!
وش على بالك.... ؟!!آخذ وحده.. عين أخوي عليها..ليش من قلة البنات.. يا شيخ افهم.. افهم..

أووووووووووفْ

وبطلت كندورته.. وابتعدت شوي..


سكت.. في البداية.. عقب طالع علي وهو مثل اللي يحاول يستوعب :
ياخي..الأمور تلخبطت ابراسي.. يوم سمعت عمي يقول يريدك لنورة..



تنهدت من عصبيتي .. وأول ما كنت برد عليه.. يا أبوي ووقف .. ويانا.. وهو ساكت..
طالع عليه سالم.. بنظرة.. عقب طالع علي.. وقال:
بسير اشوف الغدا لاوين وصل بالضبط..؟!!
وراح..


وأول ما كنت اريد امشي.. يود ابوي ايدي وقال:
محمد.. تعال اريدك شوي..


أشرت.. يالله... ومشينا..
ودشينا غرفتي.. وصك الباب من ورانا.. وطالع علي وقال:
وش رايك باللي قاله عمك ..؟!!

حبيت استهبل شوي.. قلت:
ليش شنهو اللي قاله بالضبط..؟!!


يلس على طرف الشبرية:
لما قال يريدك.. لنورة..


هزيت براسي:
مافهمتك.. شنهو اللي تقصده بالضبط..؟!!
وضح اكثر..


قام من على الشبرية واقترب مني :
اللي اقصده.. وش رايك لو نحدد ملشتكم يوم الخميس الياي..؟!!


مقلت عيوني :
شـــــــــنهـــــــــو..؟!!
الخميس الياي..؟!!
أنت صاج..؟!!


ابتسم:
هيه .. وخير البر عاجله..


رفعت ايدي:
لحظة لحظة.. أنت تعرف أن سالم يريد نورة ولا لأ..؟!!


سكت في البداية عقب حط عينه بعيني:
هيه اعرف.. وشكل نورة من نصيبك أنت مو من نصيبه.. وأن شاء الله من بكره بسير وبخطبله أي بنت يأشر عليها..
ولو تريدون تستوي ملشتكم ارباعه.. هم بعد ما عندي مانع..


ابتعدت عن ابوي بكم خطوة.. ورديت اطالع فيه ومعقد حيابيني :
تعرف أن اخوي عينه على نورة.. وتريدني أنا اتزوجها..!!
احلف بس..؟!!
اسمعني يا يــُبه.. نورة منا بماخذها.. واشلون آخذ وحده أخوي يريدها له حرمة...


عصب علي:
اسمع يا محمد.. كلمة عمك ما بردها.. لو على قطع رقبتي سمعت
ولا اعيد..؟!!


كنت احاول اتمالك اعصابي .. وما حبيت أشد ويا ابوي.. فكلمته بطريقه هاديه :
لا تعيد ولا شي.. لكن اسمعني لو سمحت.. نورة ما بروم اتزوجها..


عصب علي وأخذ يصرخ بويهي:
بتزوجها يعني بتزوجها.. وأعلى ما بخيلك اركبه ..
ولا ني بمستعد اخسر أخوي واكسر له كلمته..علشان شو..؟!!
( وبدأ يقلدني ).. اخوي اللي يريدها..؟!!
وشو يعني الدنيا بتخترب لو خذيت نورة وهو خذ وحده ثانيه..؟!!


هني فولت.. ناظرته بنظرة:
لا وأنت الصاج.. الدنيا ما بخترب.. لكن علاقتي بأخوي بتخترب
ولا ني بمستعد أخسر أخوي علشان حد..


يودني من حلجي :
تتحداني يا محمد..؟!!


خوزت ايده.. ومشيت.. واقتربت من صوب الباب وطالعت عليه:
لا اتحداك ولا شي.. بس نورة ما باخذها.. ولو تنطبق السما على الأرض..
وهذا آخر شي عندي.. واللحين اسمحلي..

وظهرت من الغرفة..


ورحت صوب سالم في المطبخ..وأول ما دشيت.. طالع علي وقال:
وين رحت..؟!!

هزيت براسي.. ماسرت مكان..

وأشرت صوب أمي علشان آخذ الصينية..

اتجهت بصمت.. صوب الميلس.. وكان وراي سالم اللي بدوره متعكر مزاجه..
وما استوى من بينا أي احتكاك..

دشينا.. وجهزنا سفرة الأكل وتغدينا.. كان أبوي يالس احذى عمي سالم.. وكنت احس بعيونه اللي بتاكلني على الرغم ما كنت أطالع عليه..

وعقب ما تغدينا وخلصنا..

يلسنا.. في الميلس وقدمنا العصير

****************************************

(( سالم ))

كنت أطالع على محمد اللي كان باله مو معاي.. وشفته يشرب بالعصير بهدوء تام..

وقطع علينا هالهدوء.. كلام عمي سالم الموجه لمحمد:
ها يا محمد.. وش رايك متى تريدنا نسير على المحكمة وتملش على نورة..؟!!


وبدون أي شعور.. طالعت على محمد كأن حد صكني طراق.. ولقيته هو بعد انكب العصير على كندورته بدون ما يقصد..


نش من على الكرسي وهو يقول:
أووه.. سمحولي.. بسير اغير الكندورة وبايي..

ظهر من الميلس وعيني عليه.. ولما كنت بسير وراه.. سمعت ابوي يقول لعمي سالم:
اسمع.. خل الملشة يوم الخميس الياي وأن شاء الله بيكونون العيال مرتبين كل شي..
وش رايك..؟!!

قاطعت كلامهم من حرتي وقهري:
لكـــنـ..؟!!


طالعت على ابوي والدم يغلي بعروجي.. مقل ابوي عيونه علي.. وعض على شفايفه.. يباني اسكت..
استغربت..
وسكت..

لكن عمي سالم حط العصير من ايده على الطاولة وهو مبتسم:
لكن.. شنو..؟!!

اضطريت أيــيب أي حجة..
لكن نورة وش رايها بالموضوع.. يعني ما شوفكم سألتوها.. أو..أي شي..؟!!

ابتسم عمي وقال:
اكيد بسير وبشاورها أن شاء الله


ما رمت اتحمل الكلام.. خذيت عمري وظهرت من الميلس.. ودشيت الغرفة..
لقيتها فاضية.. استغريت عيل وين محمد..؟!!
تلفت مالقيته..


ظهرت من الغرفة.. واتجهت لغرفة أخواني الصغار.. وطقيت الباب وأول ما دشيت..

لقيت نورة بنت عمي يالسة مع أخواني يبنون بيوت بالمكعبات..

وأول ما شافتني .. احمر ويها.. وابتسمت ونزلت عينها للأرض..

قلت على طول:
أوه.. آسف.. كنت ادور على محمد.. آسف آسف..
وظهرت..


ووقفت لفترة بسيطة وما تحركت من على الباب رغم أني صكيته..
حسيت ريولي متيبسة..
لما تذكرت ان محمد ممكن يتزوجها..


وأول ما سمعت بأصوات في الصالة.. ابتعدت.. ودشيت غرفة محمد مرة ثانية..


**********************************

(( محمد ))

أول ما انكب العصير على كندورتي .. خذيت عمري واتجهت لغرفة الوالدة..
وبدون حتى ما اغير هالكندورة..

طقيت الباب .. ولما سمعتها.. تقول : تفضل..

دشيت..وصكيت الباب من وراي بالمفتاح..

.. طالعت علي وهي مبتسمة ويالسة على اليلسة العربية :
خير يا محمد..وشـ..؟!

ولما شفتها سكتت وعيونها متجهه لتحت.. تابعت نظراتها بعيوني.. وشفت أنها تطالع على العصير اللي على كندورتي..وأشرت وهي تضحك :
شنو هذا يا محمد..؟!!


أشرت على كندورتي:
هذا عصير انكب علي بدون مقصد..


حطت ايدها على خدها :
انزين سر وعق كندورتك في غرفة الغسيل.. والبس غيرها..
يعني ما تعرف وأشلون تتصرف..؟!!


نزلت عيني على الأرض وعقب رفعتها وطالعت عليها:
لكن مو هذا اللي يابني عندج..اللي يايبني..
أ...
بصـ..


وقفت وقالت :
خير وش بلاك يالس تتلعثم كأنك ما تعرف تنطق الحروف ..؟!!
قول بسرعة..؟!!


قوية نفسي وقلت بخاطري .. لازم اخبرها.. يمكن تساعدني بشي:
يُمـــه.. ابوي يريدني اتزوج..


ضحكت.. وهي تقول:
يعني هذا اللي خلاك.. تتلعثم..؟!!
مـ...


تنهدت.. وأنا أأشر صوبها:
ابوي يريدني آخذ نورة بنت عمي..


صخت.. في البداية وعقب قالت وملامحها تغيرت:
نورة..؟!!


تنهدت.. واقتربت صوبها ويلست:
هيه نورة.. تصدقين
والمشكلة الكبيرة يا يمه أن ابوي رمسني وقالي لازم آخذها..


حطت عينها بعيني وقالت بكل هدوء :
انزين.. خذها..وين المشكلة..؟!!

مقلت عيوني وقلت بطريقة تعجب واستغراب :
شنو آخذها..؟!!
هي حلاوة وآخذها.. وخلصت السالفة..؟!!
وش بلاكم ما تفكرون..!!
انزين وسالم.. سالم يا يُمه.. نسيتيه..؟!!


خوزت نظراتها عني وهي تقول:
لا ما نسيته..ولوعلى سالم خله علي.. وما دام ابوك قالك تآخذها خذها.. ويسدنا مشاكل يا ولدي..


قمت من مكاني وأنا اطالع عليها:
خذها سالم ولا ما خذها.. أنا.. مو ماخذ نورة..
سمعتيني ولا لأ..؟!!


وابتعدت عنها.. وهي تحاول تقنعني بكلماتها اللي تطيح على مسمعي..لكني مشيت.. وأول ما وصلت عند الباب.. وقفت ودرت لوين ما أمي واقفه
وقلت :
قلتها لريلج.. وارد اقولها لج.. هذا آخر رد عندي..
نورة ما باخذها.. ولو .. ( وأشرت للسما )
ولو انطبقت السما على الأرض..
مــــــــــــــــاني بماخذها..


وظهرت من الغرفة معصب..

واتجهت للميلس.. وأول ما دشيت.. لقيت الميلس فاضي.. صكيت الباب ومشيت..لغرفتي..

ولما بطلتها.. لقيت ابوي وسالم يالسين في الغرفة..

**********************************************

(( نورة ))

عقب ما دش علي سالم.. حسيت ويهي حار من القفطة.. رغم أني كنت متشيلة..

لكن أحسن شي.. اسير لغرفتي..

وعقب ما رتبت الألعاب ويا ايمان وحروب.. طالعت على نورة اللي كانت تقرأ مجلة للقصص القصيرة.. وقلتلها..:
نورة حبيبتي.. أنا بسير غرفتي.. وإذا تريدون مني أي شي تعالوا لغرفتي.. واللحين داري على اخوانج.. خليهم يقيلون..


ابتسمت نورة وقالت وهي تطالع عليهم :
أن شاء الله.. بس يارب ما يعورون راسي.. تراهم صدعة..

طالعت على حروب وايمان.. لقيتهم يطالعون على نورة بنص عين وعقب شفت نورة تحط ايدها على خصرها.. وقالت لنورة:
هي أنتي..؟!! لا يكون على بالج أنج الرئيسة..؟!!


حط حارب ايده على خصره مقلد ايمان وردد شراتها:
أي انتي ..؟!! لا يتون ألا بالذ أنذ الإيثه...؟!!


ضحكت أنا ونورة.. لكن ايمان طالعت على حارب وهي معصبة:
ليش تقلدني ..؟!! أنت ببغاء..؟!!


صخ حارب في البداية.. عقب ضحك.. وهو يقول لنورة:
إذا أنا ببآآآء .. انتي عنذة عمي فالث.. اللي ذبهوها في الإيد..
انذين..؟!!
أهثن.. ثوفتي هليتيني اثاتمث..؟!!


على بالي ايمان بتعصب.. لكنها ضحكت ضحكة وقالت وهي تطالع علينا:
مسكين على بالي بييب شي عدل..
وطالعت صوب حروب وقالت: يا غبي يوم تريد تشاتم.. لا تذكر الأموات.. مو زين..


غصب علي أنا ونورة ضحكنا.. على فلسفة ايمان.. لكني عقبها أكدت على نورة أنها تداري عليهم.. وظهرت من عندهم..

واتجهت لغرفتي..

ولما دشيت لقيت ابوي يالس على الكرسي.. وأول ما شافني مبتسمة.. ابتسم هو بعد وقال:
خير ليش تضحكين..؟!!


صكيت الباب واقتربت من شبريتي ويلست فوقها وأنا أقول:
عيال عمي الصغار يلستهم حيل ما تنمل.. خصوصاً هالحروب.. والله جنان هالولد..
تصدق ..؟!!
لما شافني امشط شعر ايمان.. وحطيت بشعرها شباصة.. يا.. وطلب مني احط بشعره نفس الشباصة اللي على شعر ايمان..
عاد لا.. وياليتك.. تشوف ايمان وهي تسوي عمرها العاجل..
طالعت عليه بنص عين وهي تقوله:
عيب الأولاد ما يحطون الشباصات.. الأولاد يحطون .. الكاب.. القحفية شرات سلوم وحمود..
ولا أنت مو مثلهم..؟!!

وضحك ابوي.. اللي ضحك على ضحكتي.. وعقب قال:
ماعلينا .. خلينا من عيال عمج اللحين..
أنا ياي ارمسج بموضوع..

لما سمعت موضوع.. تيبست في مكاني :
خير أي موضوع..؟!!

ابتسم وهو يقول:
الخير بويهج أن شاء الله..
تذكرين موضوعنا.. اللي رمستج عنه زمان..؟!!

عقدت حيابيني وقلت:
أي..؟!! مذكر..؟!!

سكت.. في البداية.. عقب كمل كلامه وهو يطالع علي:
موضوع الزواج..
وترى مثل منتي شايفه الحطب من بيني أنا وعمج طاح والحمد لله..
واللحين.. ما عندنا شي نترياه بعد..
واليوم..عقب الغدا اتفقنا أنا وعمج نسوي الملشة يوم الخميس الياي ..
وش رايج..؟!!



صخيت في مكاني.. وحسيت الأرض تدور فيني طالعت عليه.. عقب ما تأكدت أن الموضوع ما منه هروب.. تكلمت وقلت:
أي راي.. وأنتوا اتفقتوا وخلصتوا..؟!!


أشر:
لالا يا بنتي بعده الموضوع بيني وبين عمج.. وأنتي على راحتج.. إذا مو مناسب.. بنأجل..


ما اعرف من وين يتني الشجاعه.. طالعت على ابوي عقب ما نشيت من على الشبرية:
العرس بكبره مو مناسب..


عقد حيابينه :
ما فهمت قصدج..؟!!

ترددت في البداية عقب.. قلت وأنا منزلة عيني على الأرض:
اللي اقصده.. ما اريد اتزوج..


لما سمعت صوت ضحكت ابوي .. رفعت راسي.. وطالعت عليه.. لقيته يضحك ويقول:
يابنتي لا تخافي.. بكون عندج.... بنفس البيت..
وترى هذا مصير كل بنيه وأنا بوج..


قلت أول ما شفته سكت:
لا مو بهالقصد.. اللي اقصده.. ( وبديت ارتبك ..)
الليـ..الليــ..
اللي اقصده.. ما اريد اتزوج ولد عمي..


وقف ابوي من على الكرسي وهو يقول:
شنهو..؟!! ما تريدين ولد عمج..؟!!
ليش..؟!!
وأنتي بتلاقين احسن من محمد وين..؟!!

سكت في البداية.. لكن لما رد ابوي يعيد علي سؤاله قلت بعصبية:
ما اريد اتزوج.. يــُبه.. افهمني.. انـ..


صرخ بويهي:
شنهو اللي تريدني افهمه..؟!!
يالله عاد.. عن العيارة.. وكلمة عمج ما بثنيها ولو ما سويتي يا نورة..


لما سمعته يرمس وياي بهالطريقة.. يتني غصة.. وما رمت اتحمل.. طالعت عليه وأنا ابكي:
يـُبه.. هذا زواج مو لعبه.. وأنا ما اريدك تشيل ذنبي برقبتك..
محمد ما اريده..مابيه..
دوروله على حرمة غيري..من قلة البنات اللحين..
قلـ..
( وما رمت اكمل )
وارتفع صوت بكاي..

اقترب مني وقال:
يا بنتي
أنتي لو درتي العالم ابكبره.. ما بتلاقين حد بيداري عليج شرات محمد..

قلت بعصبيه:
لكني ما اريده.. مابيه.. ما بيه تُكفى يا يُبه.. مابيه..


قاطعني وهو يقول بطريقة لأول مرة يرمسني فيها:
بلا دلع .. اشوف أنج مزودتها..سمعيني..
بهدج اللحين وفكري بالموضوع.. لكن.. اللي اريدج تتأكدين منه..
أن غير ولد عمج مو ماخذه..


وظهر.. من غرفتي.. وهو معصب..

أما أنا..

رميت عمري على الشبرية.. اصيح.. وخايفه.. من الياي..

*****************************************

(( سالم ))

لما دش علي ابوي.. في الغرفة.. يلس على الكرسي وهو يطالع علي.. بسكوت..

وماهي إلا ثواني..

دش علينا محمد.. اللي أول ما دش.. تيبس في مكانه.. وعقب دش الغرفة.. وصك الباب..وهو يقول:
السلام عليكم..

ردينا عليه:
وعليكم السلام ..

وكمل ابوي:
وين كنت..؟!!

اقترب محمد.. ويلس حذاي وقال وهو يتنهد :
كنت عند الوالدة في غرفتها..

شبك ابوي يدينه ببعضها وقال وهو يطالع كل مرة على حد فينا:
أكيد قلتلها.. بالخبر..
لكن مو هذا المهم.. المهم..
انك انت واخوك.. تعرفون أني ما بتراجع عن كلامي..


طالعت على محمد.. عقب طالعت على ابوي باستغراب :
أي كلام..؟!!


سكت ابوي في البداية وهو يطالع على محمد.. عقب وجه بنظراته صوبي وقال:
أن محمد بيتزوج نورة..


حسيت انفاسي تنقطع.. كنت اطالع عليهم ابحيرة.. واستغراب.. وعقب وجهت كلامي ونظراتي لأبوي:
وأنا..؟!!

قال وهو يأشر:
وأنت على راسي من فوق.. بخطبلك أي وحدة تريدها..


قلت والعبرة تخنقني:
واللي اريدها نورة..


وقف من على الكرسي وهو يقول:
بخطبلك أي وحدة.. بس مو نورة بنت عمك.. نورة بياخذها محمد..


وأول ما كنت بتكلم.. وقف محمد عقب هالسكوت وقال:
اشوفكم تبيعون وتتشرون فيني..وأنا ساكت..؟!!
اسمعوني.. وأنت بالذات يا يُبه..اسمحلي لأني برمسك بهالطريقة.. لكنك.. ما خليت عندي أي خيار اتخذه..
نورة بنت عمي.. ما باخذها.. وقلتها لك قبل.. ولو
( وأشر ت على السما والأرض )
ولو ولو ولو انطبقت السما على الأرض.. نورة ماني بماخذها..
يعني.. ما بآآآآآآآآآآآآآآآآآآآآآآآآخذها..


لما سمعت كلام اخوي محمد.. حسيت ماي بارد وانكب على الحريجة اللي بقلبي.. ابتسمت وقلت لمحمد:
حيا الله أصلك.. ريال..


وأول ما طالعت على ابوي.. مد ابوي ايده على بجامتي من عند الحلج وهو يقول بعصبية:
تريد تشرشه يالنذل..؟!!


اقترب محمد وخوز ايد ابوي من علي وهو يقول:
أنا مب بياهل.. علشان انطر حد يشرشني..؟!!


طالع عليه ابوي بعصبيه وأخذ يأشر علينا نحن الاثنين:
سمعوني زين..أنت وياه..
حددت ويا عمكم.. وخلاص.. يعني انتهى الموضوع..


وأشر صوب محمد:
وأنت..اعمل حسابك.. ملشتك أنت ونورة يوم الخميس الياي
وبنشوف أنا ولا نتوا..


وظهر من الغرفة.. عقب ما كان بيكسر الباب من وراه..


طالعت على محمد.. وحظنته وأنا اقول:
فديتك ياخوي..

وخوزته عني شوي وقلت وأنا اطالع عليه:
واللحين شو بنسوي يا محمد..؟!!


ابتسم علي وهو يقول:
ما عليك يا خوي.. ما دام راسي يشم الهوى.. محد بياخذ نورة غيرك أن شاء الله..



*********************************************

(( محمد ))

مر اليوم بصعوبة.. وحسيته ما يريد يخلص..
والمشكلة ما زالت ماشية ويانا..

ومرت الأيام.. والاجواء متكهربة بالبيت.. بيني وبين سالم وابوي..

كنت اروح وآيي من بيتنا لبيت عمي علي.. فترات ايلس وياه وابيت..
وفترات..أرد البيت.. متأخر.. متجنب أي احتكاك ممكن يستوي بيني وبين ابوي..

وفي أحد الأيام..

رديت البيت متأخر.. شوي.. وأول ما دشيت الصالة..
لقيت ابوي يالس ويا أمي في الميلس ..وعلى ما اعتقد يتريوني لأن مو من عادتهم السهر لهالحزة..

ولما شافوني.. زقروني..

اتجهت صوبهم وسلمت.. أشرت أمي على الباب وقالت:
دش وصك الباب من وراك..


دشيت.. وصكيت الباب من وراي.. وبقيت واقف عند الباب..
سمعت ابوي يقول :
تعال وايلس اهني..

احتراماً لرغبته.. اقتربت ويلست مقابلهم علشان اروم اشوفهم واسمع اللي يريدوني اسمعه..
طالع علي ابوي اللي قال:
واللحين يا محمد.. وآخرتها يعني..؟!!


وجهت بعيوني صوبه وقلت بكل هدوء :
آخرت شنو..بالضبط؟!!


قالت أمي متداخله بالكلام:
آخرت هالموضوع.. يعني نريد نعرف شنهي نهاية هالسالفة اللي تخص زواجك بنورة
ترى هذي مب حالة يامحمد


أشرت وبكل اعصاب باردة :
لا.. يعني لا..
هذا آخر رد عندي.. نورة ما باخذها.. وإذا في حد بياخذ نورة في هالبيت..
بيكون سالم..


توقعت ابوي بيعصب على عادته.. لكن فاجأني بهدوئه المفاجئ وقال بنبرة.. ما تطمن :
يعني اللحين مشكلتك بسالم ...؟!


طالعت على أمي بنظرة.. تردد.. وعقب وجهت بعيوني صوب ابوي...تنهدت..ونزلت براسي.. وطالعت صوب ايدي وقلت:
أكيد


صدمني ابوي أول ما قال:
وإذا سالم وافق أنك تاخذ نورة بتاخذها..؟!!


رفعت راسي.. بصدمة..وسكت..لأني
كنت اعرف ومتأكد أن سالم مستحيل يوافق.. آخذ نورة..
لكني حسيت بخبث في هالحوار اللي من بينا ..
ابتسمت وقلت:
انزين.. هذا ان وافق سلوم..


وقف ابوي..وقال:
هذي مو مشكلتك.. المهم..خلاص.. اتفقنا..كلام رياييل..


ابتسمت:
هيه كلام رياييل ونص..


طالع على أمي وقال:
يالله يا حرمة.. الوقت تأخر خلينا نرقد ..وعقب طالع علي وقال:
تصبح على خير..

أشرت صوبهم باستغراب :
وانتوا من هله..


عقب اتجهت لغرفتي.. ويلست على شبريتي افكر وافكر.. بهالمشكلة
وبدون ما احس بالوقت..


سمعت صوت أذان الفير.. يأذن..
قمت وتوضيت.. وعقب وعيت أخوي سالم.. اللي عيونه

واضح عليها انها ما عرفت طعم الرقاد
تجنبني وقام علشان يتوضأ.


****************************************

(( سالم ))

الرقاد محرم على جفوني من يوم ما سمعت الخبر اللي كسر كل مجاديفي
ومر علي الوقت بدون ما احس..

ولما كنت تحت اللحاف.. حسيت بحد.. يحط ايده علي.. خوزت اللحاف شفت ابوي واقف
وأشر لي تعال..وأنت ساكت..

قمت من على شبريتي.. وأول ما كنت بتجه صوب الحمام.. يودني ابوي من ايدي وأشر:لا..


تبعته لبرع الغرفة.. وأول ما صكيت الباب.. طالع علي وقال:
سر حمام الميلس وغسل ويهك.. وبنطرك في الميلس..ابيك بموضوع..


هزيت راسي.. انزين..

اتجهنا للميلس.. وعقب ما غسلت ويهي.. شفت ابوي يالس وصاك باب الميلس..
لما شافني أشر وهو يقول:
تعال وايلس عندي..


اقتربت منه ويلست احذاه.. شفته.. يطالع علي بنظره غريبة .. تنهد في البداية.. عقبها حط عينه بعيوني وهو يقول:
اسمعني يا سالم.. أنت ولدي البكر..وأحب افرح فيك واشوفك معرس.. ومابيك تظن اني ما اريدك تتزوج من بنت عمك..
لكن شو بيدي..؟!!
عمك اللي قال يريد محمد لنورة..مو أنا..؟!!


تنهدت من حرارة قلبي.. وحسيت النيران تشتعل فيني من داخلي..:
يــُبه.. تروم تقول لعمي انك تريد نورة لي.. وأنا متأكد انه ما بيردك.. خصوصاً عقب ما تصالحتوا..

حط ايده على ايدي:
اسمعني يا سالم.. اعرف انك تريد نورة لكني ماروم اقول لعمك انك تباها.. ومثل ما قلت.. عقب ما تصالحنا..
اهون عليك يا ولدي.. اروح واكسر بكلمة عمك..؟!!


غصب عني نظرة الحزن ارتسمت بعيوني :
عيل اهون عليك أنك تكسر بقلبي..؟!!


وقف وبدأت علامات الغضب ترتسم بويهه:
سلوم.. اشوف الكلام الزين ما ينفع وياك..؟!!


وقفت وطالعت عليه وأشرت :
آآه يا يُبه.. صج اللي ايده بالماي غير عن اللي ايده بالنار..

صرخ بويهي:
اسمعني يا سالم.. افهم اللي بقوله زين.. بتسير عند اخوك محمد وبتقوله أنك أنت موافق انه ياخذ نورة..


مقلت عيوني :
شنو..؟!!
أوافق ياخذ نورة..؟!!
أكيد انت تتغشمر..صح..؟!!


عطني ظهره:
لا ما اتغشمر..


درت وحطيت ويهي بويهه:
عيل واشلون.. اقول لأخوي.. أنا موافق انك تاخـ..


قاطعني وهو يقول بصيغة تهديد :
عن الهذربة اللي ما لها فايدة.. وافهم.. انك لو ما سرت وقلت لمحمد.. انك موافق.. تأكد.. اني بتبرى من محمد..
وبروغه من البيت..
وأنت تعرف ان هذا اللي بيستوي.. ومثل منت شايف ما بقى على الملشة غير كم يوم..


من صدمت اللي سمعته.. مارمت اتحمل...حسيت العبرة تخنقني.. طالعت على ابوي اللي أول ما شاف عيوني نزل عينه للأرض :
واشلون تسوي فيني جذيه..؟!!
ليش تحطني بين نارين..؟!!


رفع عينه بعيني :
هذا انت اللي بتسويه في محمد.. إذا ما وافقت.. وأنت تعرف أن محمد لو طلع من البيت مستحيل يرد..

وفكر في الموضوع..

وأول ما كان يريد يظهر من الميلس

*******************************

يتبع
vvvvvvvvv
vvvvvvvv
vvvvvvv
vvvvvv
vvvvv
vvvv
vvv
vv
v

من صدمت اللي سمعته.. مارمت اتحمل...حسيت العبرة تخنقني.. طالعت على ابوي اللي أول ما شاف عيوني نزل عينه للأرض :
واشلون تسوي فيني جذيه..؟!!
ليش تحطني بين نارين..؟!!


رفع عينه بعيني :
هذا انت اللي بتسويه في محمد.. إذا ما وافقت.. وأنت تعرف أن محمد لو طلع من البيت مستحيل يرد..

وفكر في الموضوع..

وأول ما كان يريد يظهر من الميلس قلت له:
وأنت خليت فيها تفكير..؟!!
والله حرام..حرام اللي بتسويه فيني..حـــــــــرااام..


سكت واخذ يطالع علي ..وأنا افر جسمي على الكنب واحط ايدي على راسي..وأقول:
بأي منهج يقول سوي اللي بتسويه فيني يا يُبه..حرام عليك
وربي حرام


عطاني ظهره وراح..بدون أي تعليق..


*****************************************


(( محمد ))

لما نشيت الصبح..شفت سالم مو موجود..في الغرفة.. قلت اكيد نش من زمان..قمت.. وأخذت حمام دافي.. وعقبها ظهرت ومشيت في الصالة....

وبعدني ما توجهت للميلس..
سمعت اصوات متوجهه من داخل المطبخ...



تبعت الأصوات .. وأول ما وقفت عند الباب..


تحمحمت.. وطقيت الباب بأطراف اصابعي.. شفت ابوي وأمي واقفين صوب الطاولة.. وأول ما
شافوني..

سكتوا بدون أي مقدمات..طالع ابوي امي بنظره غريبة.. وشوي لقيت أمي متجهة صوب المغسلة.. وأونها تغسل الأكواب..



الجو تغير.. ملامحهم.. فيها شي مو طبيعي لمست بنظراتهم المتبادلة.. انه في شي مو طبيعي يالس يصير..
لكن الظرف اللي أنا فيه ما يسمح لي بالمناقشة والأخذ والعطى وياهم..



قطعت هالصمت الغريب.. وأنا واقف عند الباب :
السلام عليكم..



ردوا علي ببرود ما عهدته فيهم..
وعليكم السلام..


قلت بخاطري ما عليه يا محمد بادر وابدأ بمحاولة ثانية.. ابتسمت وقلت:
صباح الخير..


وهم بعد ردوا علي نفس البرود والغرابة:
يا صباح النور..



طالعت صوب امي وين اهي واقفة.. وسألتها:

يُمه..عيل وين سالم..؟!!


رد ابوي:
دش بالأول.. عقب اسأل عنه ليش واقف عند الباب..؟!!


حسيت بخوف كأنهم ناويين علي نيه الله عالم فيها..
أشرت مع ابتسامة باردة ارتسمت على شفايفي:
لا مشكور مرتاح هني..
بس وين سالم..؟!!


قام ابوي واتجه صوبي وقال:
في البيت ولا وين بيروح..؟!!
( وأخذ يقلدني )وين سالم..؟!! وين سالم..؟!!سندرت راسي.. كأنه ياهل..ومضيعه..
اقول.. ( ودخل ايده بين كتفي وجانب الباب وكمل..)
خوز عن الباب خلني اسير عند عمك..


ولما خزت عن الباب.. لف براسه وقال:
واعمل حسابك عقب الريوق لا تظهر عندي كلام وابي اقوله لك..


وعطاني ظهره وسار..


كنت مندهش من اسلوبه.. بارد.. جاف.. زعل مع غضب مدفون..
ابوي مو على عادته..
حتى صوته فيه شي..

دشيت المطبخ ويــيت صوب أمي وحطيت ايدي على كتفها:
يُمه فيكم شي..؟!!



جاوبتني بدون ما تدور براسها وتطالعني:
لا.. وشو بيكون فينا..؟!!
يازينا ويا حلاتنا..




ابديت ضحكة مصخرة.. وكملت:
والله فيكم شي..اعرفكم زين.. يابوج عشرة عمر.. وماتبيني احفظكم..؟!!
وأبوي بالذات.. لو بتحلفين من اليوم لبكره..وتقولين مافيه شي.. مع احترامي لج ما بصدقج.. ابوي فيه شي.. ها عاد لا تخشين عني..
ابوي وش بلاه...؟!!
وشو الموضوع اللي يبي يرمسني عنه..؟!!
أكيد تعرفين.. مستحيل ما يخبرج..



حطت الأكواب من يدينها في المغسلة بعصبية.. ولفت وبدون ما تطالعني أخذت تنازع.. وتقول:
أووووووووووهووووووو
تراك طفرت بي.. قلتلك مافي شي.. يعني ما في شي..


وظهرت من المطبخ وهي تفر الفوطة على الطوالة..


استغربت.. وبهالموقف تأكدت أن اللي اشك فيه صح.. فيهم شي.. بس يارب عساه خير..لايكون في شي بموضوع نورة..؟!!
تلفتت لقيت نفسي واقف بروحي بهالمطبخ عقب ما ابوي سار وأمي ظهرت..
قلت بخاطري.. عيل شنو اللي موقفني اهني..؟!! خلني اسير اشوف سلوم..



وأول ما كنت بظهر..


******************************************

(( سالم ))


عقب ما ابوي قال اللي قاله.. يلست في الحوش مدمر.. أخذت افكر بأبوي اللي مو همه غير نفسه..
كله يريد رايه وشوره بهالبيت.. ولا بعد.. حتى الزواج صار من ضمن الشور شورك يا يُبه..
بس وشلون اطاوعه..؟!! وشلون اقول لأخوي.. خذ اللي احبها واتمناها تكون أم لعيالي..؟!!



مر الوقت.. ومرت الساعات وسؤال يصاحبه سؤال ثاني ومحير.. تعبت من التفكير..

تجولت في البيت.. كنت حاس لو يلست زيادة ممكن اموت..
وما حسيت بالوقت..

غير نورة.. تظهر من غرفتها..


وأول ما شفتها.. انخشيت في الزاوية.. علشان ما تنتبه لوجودي وتستحي وتدش لغرفتها مرة ثانية..
لكني انتبهت لعيونها.. حمره ووارمه.. حزتها عرفت أنها هي بعد مجبورة على القدر اللي يريدون يحطونا فيه..


كنت اراقبها من خلال الزاوية..

وأول منتبهت انها متجهه صوب المطبخ.. رحت اركض صوب الميلس..
وصكيت الباب من وراي.. ويلست..



وما حسيت بأي شي.. غير أن ابوي دش علي.. وأول ما شافني..
قال:
لا تقول أنك هني من حزت ما تركتك..؟!!


كان لساني مربوط.. حسيت العبرة تخنقني.. سكت وما تكلمت.. عبارات الغضب والحزن واليأس هي الرد الوحيد لابوي..


ولما شاف سكوتي طول.. اشر صوب الباب وهو يقول:
روح المطبخ.. اخوك محمد يالس يدور عليك..



كنت متيبس غصب عني.. كان همي الوحيد واشلون أشوف نورة..؟!!
صج نورة..
يعني محمد في المطبخ.. ونورة ســارت..ســ...

قمت بسرعة من مكاني.. متجه للمطبخ..


*********************************************


(( الجــزء الرابع والعشرون ))


(( نورة ))

ظهرت من غرفتي ورحت صوب المطبخ.. وأول ما دشيت.. لقيت محمد كان يريد يظهر..


كنا بننصدم في بعض لأنه ظاهر وأنا داشه.. لكني..توقفت بسرعة..

وما رمت ادش..


أما محمد.. رد لورى ودش المطبخ مرة ثانيه..علشان يعطيني مجال.. وهو يأشر ويقول:
صباح الخير.. تفضلي..( وخوز عن الباب ).. أنا كنت بسير


كنت منزلة عيني للأرض.. وما كنت اريده يشوف عيوني الوارمة من كثر البكا..
سكت في البداية عقب قال:
سمحيلي على السؤال بس أنتي فيج شي..؟!!
تعبانه..؟!!



( قلت بخاطري.. هذا يالس يستخف دمه ولا اشلون..؟!! على باله ما بعرف بالسالفة..؟!!!)
رفعت عيوني بغضب.. وأول ما شاف نظرتي نزل عينه وهو يقول:
هيه..عرفت..


قلت بعصبية وكان ودي اذبحه:
شنهو اللي عرفته..؟!!



هز براسه وهو رافع يدينه :
لا سلامتج.. تفضلي.. دشي علشان اريد اظهر ولا تبيني ايلس في المطبخ..؟!!



كنت حاسة أن هالوقت المناسب اللي مو ممكن يتعوض.. أنا ومحمد.. في المطبخ وبروحنا.. يعني اروم اقول اللي بخاطري..



دشيت المطبخ.. وقلت على طول:
تريا لا تسير مكان.... ابيك بشي..



طالعني.. واقترب صوب الطاولة وسحب الكرسي ويلس عليه وهو يقول :
تفضلي اسمعج..شو بخاطرج..؟!!



حسيته يلعب علي بأدبه وطريقته في الكلام..قلت بخاطري.. وعيوني بكل مرة تطالع على شي..( لكن مو علي يا محمد اللي بخاطري بتسمعه.. اقل ما فيها خلني اوعيك وأصحصحك من حلمك اللي تحلمه.. )




وسمعته يقول:
أنتي وياي..؟!!




طالعته.. بنظره.. وكنت أحاول اتمالك اعصابي.. وقلت بأسلوب عكس عن اللي بداخلي:

محمد اسمعني زين باللي ابي اقوله.... وافهمني.. أنت اخ وعزيز علي ومن على راسي من فوق..
لكن تكون ريلي هذا آخر شي اتوقعه..




ولو سمحت..


ووقف وهو يقاطعني:
اتريي..أنتي..فــ..


قاطعته وأنا أأشر صوبه:
ايلس لو سمحت.. واسمحلي لأني بعدني ما كملت اللي عندي..



سكت.. ورد ييلس على الكرسي..حط ايده على خده.. ونزل عينه للأرض.. وقال:
آسف.. تفضلي.. كملي اسمعج..



(سكت.. وكنت اتمنى لو اطقه ليل نهار بالعقال اللي هو لابسه على الأقل.. يمكن يترك عنه هالحركات..
على باله بيلفت انتباهي له.. وبآخذه.. بس حلم ابليس بالجنة..)


طالعني وقال:
نورة تفضلي..
اسمعج..



كملت كلامي وأنا واقفه صوب المغسلة.. وقلت بهدوء علشان ما ينتبه لعصبيتي ويستـغل هالنقطة فيني:
المهم..
ابيك تعرف أني مع احترامي لك.. ما افكر فيك كزوج..أنا صج اعزك..لكن كأخ..
وياليت..يا محمد..تنسى اللي براسك..


رفع عينه يطالع علي بسكوت وببرودة اعصاب.. صرخت عليه:
ليش ما ترمس..؟!!



أشر ببروووودة وهدوء :
ابيج تخلصين مرة وحدة اللي عندج وبلا ما اقاطعج..وعلشان اقول اللي عندي هم بعد مرة وحدة وبلا ما تقاطعيني..



رفعت يديني وقلت بحركة استهتار:
قول .. تفضل.. خلصت اللي عندي..



طالع علي وقال :
منو قالج أن براسي شي..؟!!.. وأصلاً يابنت الناس.. أنا ما اشوفج غير أخت وبس
وبذمتج في حد ياخذ اخته..




خوزت ظهري من على المغسلة اللي كنت منسندة على حافتها..وكنت ميودة كوب الماي.. وقلت:
أخت ولا مو أخت.. هذي مب شغلي..
وإذا أنت صاج باللي يالس تقوله..
عيل ليش ابوي مصمم يزوجني منك..؟!!
يعني تريد تفهمني.. مالك شغل بهالسالفة..؟!! ياخي ارمس رمسه عدله..تدش الراس..؟!!



وقف من مكانه وهو يأشر ويرد الكرسي من وين ما سحبه:
الله يطولج ياروح.. إذا حوارنا بيتم على هالحاله صدقيني ما بنطلع بنتيجة لا انتي ولا أنا..واللحين..سمحيلي.. وحطي في بالج أن كلامي مو وياج..
صج اللي فيني كافيني




واتجه صوب الباب يريد يظهر.. مشيت بسرعة.. ووقفت في نص الدرب علشان امنعه يظهر وقلت وأنا أأشر صوب ويهه:
إذا انت تقول اللي فيك كافيك..عيل أنا شو أقول؟! محمد..حس فيني اشوفك أخ عزيز..علشان جذي لجأت لك..



غمض عيونه شوي ورد يبطلهن وهو يقول بكل هدوء:
منو قالج أني ما أحاول؟!
ما تشوفي وشلون البيت مستوي من ورى هالسالفة؟!



نزلت راسي للأرض..وقلت بخاطري ( محد مرتاح غيرك..على بالك غشيمه..وما أفهم... )



رد يكمل..
أوعدج..بسوي كل اللي اروم عليه..واللحين
ممكن تخوزي لو سمحتي.. اريد اروح..



عصبت من كل قلبي.. وصرخت بويهه وأنا ابكي.. حسيت الدم يغلي بعروجي:
وشلون بتشوف وبتحاول..؟!!




ابتعد .. ووقف في نص المطبخ.. وهو يطالع كل مرة على شي.. رد يطالع علي وهو يتنهد بصوت عالي :

يابنت الناس.. مو بإيدي عيل ليش ماتقولي هالرمسه لبوج..
ليش ما تحاولي به..؟!!
يعني بإيدي شي وقلت لأ..؟!
ولا مو قادرة على ابوج قلتي بقدر على محمد..؟!!
إذا كنت قادر اسوي شي.. اعرفي اني يالس اسويه.. اكثر من جذيه ما عندي..
وهدي عمرج ليش يالسة تصيحين اللحين..يا بنت الناس أنا اللي فيني صج كافيني..والله كل شي معقوق على راسي.. شو بلاج..؟!!





كنت.. اصيح وابكي.. رغم موقفي.. ورغم أني ماتحركت..من على الباب..
قلت وأنا اتنهد:
ليش ما صيح..الموقف بكبره.. يذبح...
ولو رضى ابوي.. كنت بتلاقيني واقفه هالوقفه جدامك.. أو حطيت عمري بهالموقف..؟!!
محمد مب سهله علي أبد أني اوقف جدامك وأنا بهالحالة..!!



رفع يدينه بعصبية:
اعرف ..وما يحتاي تفسرين..دخيلج لا تصيحي..
وشفتي..؟!! أنتي بنفسج قلتيها.. لو رضى.. يعني ابوج رافض..
إذا انتي بنته رفض لج طلبج.. عيل بيوافق على طلبي..؟!!
المهم..هدي عمرج واستهدي بالله..
واللحين سيري عن الباب الله يخليج ..واللي ربي كاتبه بيصير
هدي عمرج..


ونزل عينه للأرض..مكمل:
بسج صياح..دخيلج..


كنت أحاول اتمالك أعصابي...إلا شوي..


اقترب من عندي.. وبيني وبينه كم خطوة..وأشر بأصبعه:
لو سمحتي خوزي.. ابي اظهر..الله يرحم والدينا ووالديج



( موقفه استفزني.. حسيته مو سائل..قلت بخاطري ليش هالانسان بليد..؟!! ليش يباني غصب..؟!!
حد ياخذ وحده ماتحبه..؟!! )



رد وهو يرفع صوته:
لو..لــو..لــــو سمحتي يا نورة .. ( وأشر ) خوزي شوي عن الباب وعقب دشي وايلسي وتربعي بالمطبخ مثل ما تريدين..
المهم.. خوزي شوي..




طالعت عليه .. بنظره وقلت بهدوء غريب..عقب ما حسيت أني بديت استفزه..:
تريد تظهر.. انزين تفضل..


وخزت من على الباب.. طالعني وقال :
قبل لا اظهر اريدج
تتأكدي زين.. أني أحاول أضعاف ما انج تتوقعين ممكن اسويه..واللحين برخصتج..



وأول ما كان يريد يظهر.. وقفت وراه وقلت:
محمد..؟!!



لف وطالعني وهو يقول:
لبيه..



اقتربت منه وقلت :
لا تنسى موقفك لأني ما بنساه..مستحيل أنساه..يا محمد..


سمح لعيونه..تطالع صوب الصاله..وقال بدون ما يلتفت لي:
ما عدت اعرف إذا انتي يالسة تطنزي ولا قاصده شي ثاني..؟!!


قلت بطريقة استهزاء واضح:
انت ابخص..


وأول ما كان بيتحرك..قلت:
بتندم يا محمد..وخذها وعد..


دار بجسمه..ووقف جدامي.. وعقد حيابينه..باستغراب ..
اندم..على شنو بالضبط..؟!!


قلت بخاطري: ( على أنك طالعت على شي مب لك...)
مسحت دموعي.. وطالعته بعين قوية..وقلت :
سلامتك..بس نسيت أنك متعود...تاخذ اللي مب لك..


طالع علي بنظره..وقال:
حاسبي على كلامج يا نورة..صج كلامج قوي..يابنت الناس..
بس مشكورة وما قصرتي..بقى شي بخاطرج..؟!!



( كان بخاطري..اقول أي شي..يستفزه..أريد اجرحه..اريده يحس بالنار اللي بقلبي..قلت باسلوب بارد عكس اللي كنت احس به ) :
منو قالك هذا اللي بخاطري أنا بروحي..!! هذا بخاطر كل اللي بالبيت..
وأنا ما غلطت..صج..
وروح اسأل اليميع..ولا أقولك..اسأل حروب..اصغرهم..وشوف رده لك..
بس أنت تحب تسمع اللي تريد تسمعه..وتطنش اللي تريد تطنشه..



وقف باستغراب وبدهشة.. من اللي سمعه.. ومو مستوعب اللي صار..
مقل عيونه وهو يقول:
هذا احساسج بروحج..وانتي من قهرج يالسه تعقي كل خيط وخيط..لكن..بحشمج..وبقدر موقفج..



قلت بكل ثقة..وهدوء :
موقفي..؟!!
ما تشوف موقف أهلك منك..؟!!
محمد أنت مالك مكان لا عندي ولا عند أهلك..
وأنت ( وأشرت صوبه ) تعرف هالشي ولو أنك تتجاهله..


تنهد بهدوء..وكنت احس بانفاسه حاره..وقال:
الله يسامحج وما عندي لج رد..



ابتسمت ابتسامه نصر:
لأن ما عندك رد أصلاً..فكر بكلامي زين..وافهم أن صج مالك مكان..



استغربت أن ملامحه تغيرت للرضى وقال وهو يبتسم:
هذول هلي..ولي مكان بينهم ولو أنتي تقولي عكس هالرمسه
وتعرفي شنهي مشكلتج؟!
مشكلتج أنج حاطحه ببالج أني مذنب..وأنا صج بريء


هزيت راسي بالرفض وقلت :
هيه وأنت الصاج شرات برائة الذيب من دم يوسف..



سوى حركه بيديه:
أنتي مايفيد وياج الكلام..أحسن لي أظهر..


حطيت عيني بعينه:
واللي خلق السماوات يا محمد..ما أكون نورة لو ما خليتك تكره اليوم اللي انولدت فيه..


قال وهو صاك اسنانه ابعضهن:
أحاول ايود اعصابي لكنج..ما تبي تمري اليوم على خير..لكن..مقيولة
قالوا البنت طالعه على منو؟؟قالوا على أمها..

أول ما قال أني طالعة على أمي ..بدون أي شعور..أو سابق انذار..كبيت كوب الماي اللي بإيدي على كندورته..


**********************************************

(( محمد ))

كنت أحاول اتمالك اعصابي..رغم الكلام اللي كانت تقوله لي..لكنها انجحت باستفزازي..وبدون ما احس..قلت المثل..

بس أول ما كبت الماي على كندورتي..

صرخت بكل عصبيه.. حتى أني توقعت أن كل الحارة سمعوني..ورفعت ايدي وأنا صاك قبضتي .. لكني توقفت.. أول ما شفتها غمضت عيونها بخوف.. وصرخت بويهها :
والله لو كنتي ريال لا تصرفت وياج.. بس لأنج بنت بحشمج..
لكن لادفعج ثمنها غالي يا نورة

وإذا ما خليتج.. تندمين على اللحظة اللي فكرتي فيها ترمسيني بهالطريقة



ورديت ارفع إيدي.. بعصبية..كنت اريد اطق أي شي..بس اطلع حرتي منها..أطق الباب..الجدار..أي شي..


وفجأة..



سمعت صوت سالم من وراي يقول :
استح على ويهك يالخسيس..


شفت نورة تبطل عيونها..وتطالع على جهة الصوت..


لف من وراي وهو ميود ايدي .. وكان يضغط عليها..بإيده اليمين.. وبإيده اليسار..يودني من كندورتي وهو يصرخ وينازع:
يالنذل.. يالخسيس..
تتحلف عليها..؟!! وتريد تضربها بعد..؟!!
شنو يامحمد..ما تقدر إلا على البنات..؟!!
تبي تتضارب طقني أنا.. ريال..
وتعال.. صج..
وتسوي عمرك وياي وساندني وأنت من وراي تلعب بذيلك.. وتتحلف.. وتسوي نفسك عنتر زمانك..؟!!


غمضت عيوني وأنا استغفر واتعوذ من الشيطان..
لكن سالم..
عصب زووود وقال عقب ما بطل يدينه عني..وأخذ يضرب بإيده على صدري ويدزني :
شايفني شيطان.. يالخايس..؟!!
تتعوذ وتستغفر..؟!!
لو كنت ريال ارمس.. ولا اقول..؟!!
اضرب احسن..



وأخذ يدز وكنت ساكت وما كانت اقول شي..
وفجأة صرخ سالم بويهي :
طق ولا ما تقدر إلا على البنات.. تستقوي عضلاتك عليها..؟!!


طالعت عليه:
ياخي اسمعني..


لكن سالم صدمني.. لأنه.. أخذ يضرب طق لا صار ولا استوى.. وشق كندورتي..
لكني
ما كانت ارد عليه بضربه وحده.. بس كنت اقول :
سالم اسمع.. سالم أنت يالس تعورني..سالم..استهد بالله..



كنت لأول مرة اشوف سالم بهالحالة العصبية..ويتهجم علي..
********************************************

(( نورة ))

أول مرة اشوف سالم وهو بهالانفعال..
لكنه كان بلحظة غضب..
وكنت انانية..وهم بعد خايفة.. نطرت سالم يفك حرتي ولو شوي بمحمد.. عقبها تعوذت من الشيطان..


وكنت حاسة أني أنا السبب باللي صار.. حاولت افارع بس واشلون افارع بين اثنين شباب وأخوان..
ظهرت من المطبخ وأنا اصرخ وانادي عليهم:
لحقوني.. سالم بيذبح محمد..


يا عمي حسن وأبوي وأمي ركض.. ووقفوا في الصالة..
وسألوني:
خير منو يصرخ..؟!!


أشرت وأنا ابكي بخوف.. صوب المطبخ:
لحقوهم..هنــ..



وارتفعت اصوات..سالم ومحمد..
دشينا يميع المطبخ..
وأخذوا يصرخون فيهم.. عمي حسن يود سالم.. أما ابوي يود محمد..
وامهم واقفه في النص..



كان سالم يصرخ ويحلف ويهدد محمد.. لكن محمد كان يمسح الدم من انفه..بسكوت.. وتنهيد..



قال عمي بعصبية:
استحوا على ويوهكم ريايل وش كبركم وتتضاربوا..؟.!!
لا حيا ولا مستحى.. ولا ما تعدون للبيت حرمة.. على الأقل حشيمة لعمكم وبنته..
وليش هالضرابة أصلاً..؟!! ليش..؟!! ردوا علي..؟!!



طالع عليه محمد.. اللي خوز ايد ابوي عنه بعصبيه.. وقال وهو يمسح الدم:
آسف.. أنا الغلطان..


وطالع على سالم وكمل: كنت معصب.. ومديت ايدي عليه..



صرخ سالم.. وهو يأشر.. ويريد يخوز ايده من عند عمي حسن علشان يكمل المضرابه:
كذاب بعينك كذاب.. أنا اللي طقيته.. والله لو شفته عقب بكمل واكسر راسه..بعد.. هالنذل..



صرخ عمي:
هي.. بس حشموني على الأقل..
بسم الله عليكم.. اصبحنا واصبح الملك لله..
وش بلاكم تتضاربون على صباح الله..
الناس تهدي اعصابها..عالصبح.. وانتوا تبدؤا صباحكم بطق ونزاع..



أخذ محمد القترة من على الأرض.. وقال وهو يريد يروح:
أنا الغلطان..وقلتلكم.. آآآسف.. واللحين برخصتكم..


صرخ فيه سالم:
روح.. وصجه ابوي يوم قال.. مالك مكان من بينا.. لو تروح وتذلف.. يكون احسن..اذلف يا محمد اذلف


صخ محمد في مكانه وهو معطنا ظهره.. عقب لف وطالع علي بنظرة وعقبها طالع على سالم وقال:
لا تستعيل.. أصلاً بيــي يوم بهدلك الدنيا بكبرها مو البيت وبس..


عقب ما سار محمد.. طالع على ابوي وقال:
ليش عيال عمج يتضاربون..؟!!

( قلت بخاطري.. شو تباني أقول..؟!! تباني اخبرك أني أنا السبب..)
مارمت ارفع عيوني قلت.. مادري.. وظهرت من المطبخ لغرفتي..


****************************************
****************************************

(( محمد ))


عقب ما ظهرت من البيت.. رحت لبيت عمي علي..وكل الأحداث كانت تنعاد براسي..وأول ما وصلت .. صفيت السيارة.. ودشيت..بيت عمي
لقيته يالس في الصالة..



وأول ما شافني بهالحالة..
يا صوبي ركض.. وهو يقول بخوف ..:
بسم الله عليك.. بسم الله عليك.. وش بلاك يامحمد..؟!!
شو اللي سوى فيك جذيه..


مارمت ارد عليه.. حسيت بضيج بيذبحني..واشلون اخبره أني تضاربت ويا أخوي..؟!!



رد يكرر سؤاله علي بعصبية :
محمد وش اللي خلاك بهالحالة..؟!! طالع نفسك.. واشلون صاير..؟!!


تنهدت.. وأنا اقول:
الدنيا يا عمي..

الدنيا..


ورحت.. متجه صوب غرفتي..ما كنت اريد اسمع أي شي.. أو أي سؤال أو أي تعليق .. احس نفسي تعبان..
كل شي على راسي انقط..
وياليت ألاقي من يقدر كل اللي اسويه..

الكل ضدي.. حتى أخوي..
الله يسامحك يا سالم يوم تقول أن ابوي صاج باللي قاله.. الله يسامحك..

وقطع افكاري..
صوت عمي علي .. درت براسي اطالع عليه.. لقيته واقف عند الباب وهو يقول:
محمد
ما ودي اضغط عليك.. بس ريحني يا ولدي..خبرني مع منو متهاوش..؟!!




نزلت عيني للأرض.. وعطيته ظهري وأنا اقول:
خلني اللحين الله يخليك.. خلني..بروحي شوي..


سكت في البداية.. وعقبها..قال:
ما عليه يا ولدي..ريح اللحين وعقب يوم تحس عمرك تريد ترمس تعال بتلاقيني في الصالة..واللحين بسير ايبلك عصير بارد..



درت بجسمي لوين ما عمي واقف وقلت وأنا أاشر :
لا..لا.. تيب أي شي مشكور ..بس خلني بروحي اللحين..


بدأ يرد الباب على الخفيف وهو يقول:
خلاص..خلاص.. ريح يا ولدي..


كنت أطالع على عمي علي وهو يصك الباب من وراه..


*******************************************

(( أم سالم ))

عقب ما ظهر محمد.. وظهرت نورة..طالع علينا سالم أخو ريلي واستأذن انه بيسير الميلس..


لأنه شاف الجو متوتر بالقو.. ونحن نطالع على سالم ولدي.. اللي ابوه كان ميود ايده..


نزل ابو نورة عينه للأرض.. وظهر من المطبخ..


طالع حسن على سالم وهو يضغط على ايده..:
ما تخبرني على شنو تضاربون أنت ومحمد..؟!!
فشلتوني ..الله يهديكم بس..


خوز سالم إيده من ايد ابوه.. وظهر من المطبخ وراح لغرفته... لحقناه أنا وحسن..
ودشينا الغرفة..


يلس سالم على الكرسي.. وحط ايده على راسه.. وهو يتنهد..


اقترب منه حسن وصرخ بويهه:
خبرني ليش كنت تتنازع أنت ومحمد..؟!!


تدخلت بالموضوع:
أكيد بسبة نورة..( وطالعت على حسن ) مو قلتلك.. هالسالفة.. ما بتييب لنا غيرعوار الراس ..
شفت بعيونك.. سالم ومحمد تضاربوا..



قاطعني حسن وهو يقول:
لو سمحتي خليه هو اللي يرمس.. ( وطالع على سالم ).. وأنت خبرني..ليش تمد ايدك على اخوك..؟!!


كان سالم ساكت.. ولا يرد بكلمة وحدة.. حتى أني شكيت أن عقله مب معانا..رد حسن يقول:
أنت تسمع ولا ما تسمع..؟!! أنا يالس ارمسك..


خوز سالم ايده.. وطالع علينا بغضب وهو يقول:
قلت مافي شي.. بس خلاص.. ممكن تخلوني بروحي..؟!!


صرخ حسن ..عليه:
هيه أنت.. شنو على بالك الدنيا فوضى مافي شي.. كنت شوي بتذبح اخوك وتقول مافي شي..؟!!ما دام اصواتكم ارتفعت..من حقنا نعرف اللي استوى من بينكم..


اقترب سالم.. من حسن وقال:
انزين تريد تعرف.. عيل اسمع.. واسمعني زين بعد..
محمد.. ما بياخذ نورة..لو انطبقت السما على الأرض.. نورة محد بماخذها غيري.. ولا والله والله..
اتركلكم البيت ورقعت ويهي ما تشوفونها مرة ثانية..


اقتربت من حسن وقلت:
عيالي بتفرج من بينهم علشان أخوك.. جدامك.. محمد ظهر والله العالم على وين..؟!!
واللحين سالم بيهد البيت..
ليش هذا كله علشان أخوك وبنته..؟!!


صرخ بويهي وهو يقول:
بس انتي بعد.. اللي فيني كافيني..


طالع عليه سالم وقال بأسلوب استهزاء:
ليش..؟!! وأنت فيك شي..؟!! يا حسرة غير تآمر وتنهي .. وأوامرك كلها مستجابه ومطاعة.. اكثر من جذيه شو تريد..؟!!


رفع حسن السبابه وأشر:
بلا هالاسلوب يا سالم..حشم عمرك.. أنت يالس ترمس ابوك.. مو ياهل بالشارع..؟!!


ابتعد سالم.. واتجه صوب الشبرية.. ويلس وهو يقول:
لأنك ابوي كنت بسمحلك تدمرني ..
ولأني ابنك..شو بتسوي..؟!!


سكت حسن.. اللي طالع على سالم وعقب علي.. وبدون أي رد على اللي قاله سالم..
ظهر من الغرفة..


طالعت على سالم.. اللي كان ساكت..

حسيت الجو ما ينفع آخذ واعطي معاه.. ففضلت أني اظهر من الغرفة..وعقبها بيحلها ألف حلال..

ورحت صوب غرفتنا على وين ما سار حسن..

*******************************************

(( حسن ))


دشيت غرفتي.. وكنت أفكر..

بالتهديد اللي قاله سالم.. احترت.. عيالي يضيعون جدام عيني وأخوي بكفة.. ما ابي ازعله ولا اكدر مزاجه..


شوي إلا دشت أم سالم.. التزمت الهدوء لفتره.. عقب يلست احذاي وهي تقول:
حسن هذي مو حالة .. أنت مثل منت شايف بيتنا بيدمر حرام عليك..



كنت ساكت وما ارد عليها بأي كلمة.. كملت كلامها.. عقب ما شافت سكوتي طول:
أنت ما بتخسر لو رمست سالم أخوك.. وقلتله أن سالم هو اللي يريد نورة..!!


طالعت عليها.. وأنا احاول ألاقي حل:
هذا الشي مستحيل يصير.. يا أن أخوي بنفسه يتراجع..؟!! ولا أي شي ثاني..
لكنج تقولين أني اسير واكسر كلمته.. أنتي غلطانه.. مب قايله شي..



أشرت على عمرها:
عيل أنا اللي بقوله.. إذا أنت متفشل..



اقتربت منها وأنا أقول بعصبية:
إياني وإياج تفكرين تسيري عند أخوي وتخبريه بشي واحد.. ولا والله.. لا يستوي شي ما توقعتيه مني..


مقلت عيونها.. ورفعت حايب ونزلت حايب:
لاه..؟!!
حد قالك أني وحده من عيالك؟؟ أنا حرمتك.. يعني لازم.. تحترم شوري شرات محترم شورك.. وأنت في البداية والنهاية الله يهديك.. يالس ترمس عن مستقبل عيالنا..


طالعت عليها..ونظرتها بنظره وعقب صديت للصوب الثاني


سمعتها تتنهد وهي تقول:
يمكن مالك خلق تتناقش
أنا بظهر عنك اللحين.. بس فكر باللي بقوله لك زين..

إذا أنت.. اليوم موجود.. وبعدها نورة ماستوت حرمة محمد.. وشوف شو صار.. عيل.. لاخذها بكره.. وأنت عقب عمر طويل شنهو اللي بيستوي..؟!!
أنت تريد حكايتك ويا أخوك سالم تنعاد..؟!!
أنا ما اريد أذكرك بالماضي.. لكني أريدك تفهم..بتخرب وبتهد اللي بنيناه..
لحق..قبل لا تهد البيت على روسنا..
وأنت غافل..


واللحين برخصتك..


********************************************

(( سالم ))


أول ما ظهرت أمي وصكت الباب من وراها.. اتجهت صوب الطاولة.. وأخذت أمد إيدي.. على كل شي أروم اوصله.. وبديت..اكسر..هذا وأفر.. ذاك..

وعقب طاحت عيني على ساعة محمد اللي حاطنها فوق الطاولة.. مسكتها.. وأخذت أطالع فيها..

سكت.. ومشيت صوب الشبرية.. ويلست على الطرف.. وأنا اتنهد.. والعبرة خانقتني..
وطالعت عليها كأن محمد واقف جدامي :
ليش..؟!!
مالقيت غير نورة يا محمد..؟!!
شنهو اللي سويته فيك..؟!!
والله يا محمد.. لو قلت أنك تحب نورة .. كنت خزت من دربك.. لكن تغدر فيني..؟!! هذا اللي يذبحني..
لكن اللحين.. صج.. لو تموت ما خليك تآخذ نورة.. لو كانت حتى هي الدوى اللي بتشفيك لا احرمك منها..
تغدرني..؟!! أنا يا محمد..؟!! والله لا اراويك.. والله لا راااااااااااااااويك..
صدمتني.. والله حسااااااافة عليك..


وفريت الساعة على اليدار.. ولما شفتها متكسرة جدامي.. طالعت عليها :
لكسر قلبك شرات ما كسرت قلبي يا محمد..

إذا ما خليتك تندم..؟!! لا تسميني سالم..

**********************************************

(( أبو نورة ))


عقب ما شفت الجو متوتر.. ظهرت من المطبخ.. ورحت عند نورة لغرفتها.. وطقيت الباب ودشيت..


وصكيت الباب من وراي.. لقيتها.. يالسه على الشبرية تصيح..


اقتربت منها ويلست حذاها.. وهي تصيح.. حطيت إيدي عليها وأنا اقول:
شو فيج يا بنتي..؟!! شو اللي استوى بهالبيت..؟!!
أول الضحكة ما تفارج هالبيت.. واللحين.. يا اسمع هواش..؟!! أو اشوف دموع..؟!!
شو فيج يا بنتي..؟!! شنهو اللي استوى وياج..؟!!



كانت تصيح وترفض ترفع راسها.. وبصعوبة قالت وهي مغطية ويها باللحاف وهي تصيح:
أريد أرد البيت يا يُبه..



استغربت من اللي سمعته.. وقلت لها على طول:
أنزين هذا بيتج



رفعت راسها والدموع مغطية ويها.. وكأن الدم كله تيمع بويها.. قالت بكلمات متضاربة ويا العبرة:
د..د..دخيـ..لك..
أبي اروح بيتنا.. هذا مو بيتنا.. دخيلك.. آآآآه..يا يُــبه.. ردني البيت.. ردني..




استغربت من اللي يالسة تقوله.. هزيت راسي وأخذتها بحظني وكنت أحاول أهديها:
خلاص يا بنتي.. كله ولا أنتي.. ريحي نفسج اللحين عقب بنسير البيت..أنزين خبريني.. حد قالج شي..؟!!


كانت ترتجف.. وهي تصيح.. ومغطية ويها بحظني:
ردني بيتنا وبس..دخيلك..



رفعت إيدي وبديت أمسح على راسها:
ولا يهمج.. بنسير بس ريحي.. هدي اعصابج.. ولمي اغراضج وبنسير عقب الغدى..



خوزت نفسها من حظني وطالعت علي:
لالا.. اللحين.. دخيلك.. ماااروم.. ما اتحمل لحظة وحدة.. ايلس اهني.. دخيلك..



مقلت عيوني وأنا اقول:
اللحين..؟!
زادت ببكاها وهي تقول بحاله هستيرية كلام مو مفهوم:
أنا مب جذيه..هذا مب طبعي ..مابي ايلس اهني ولا بستخف..ردني اللحين..اللحين..يا يبه..
احس عمري مخنوقه..متضايجة..


قمت.. وأنا أأشر:
خلاص يا بنتي..هدي اعصابج.. إذا هذا بيريحج.. سيري لمي اغراضج.. وزهبي عمرج.. وأن شاء الله... بنسير عقب شوي..



وأول ما كنت بسير.. يودت إيدي وهي تقول:
على وين..؟!!


طالعتها باستغراب:
بسير علشان.. الم اغراضي وأخبر عمج..



قالت بترجي:
دخيلك..دخيلك..لا تخليه..يقنعك نيلس.. أنزين؟!!

بموووووووت لو يلست دقيقة زيادة.. دخيلك..



قلت وأنا حاس أن الموضوع شايد:
خلاص.. ولا يهمج.. بس اللحين زهبي اغراضج.. وأن شاء الله بنسير البيت.. اليوم وعقب شوي ..



وظهرت من الغرفة..



واتجهت صوب غرفتي.. وخذيت الشنطة من فوق الخزانة..
وحطيت فيها كل اغراضي..
وعقب ما خلصت.. خذيت الشنطة.. وحطيتها في الصالة.. وطقيت على باب نورة.. اللي لقيتها زاهبة.. ولابسة العباية ومتشيلة وتغشت بعد..
قلت لها:
بس تري شوي.. بسير عند أخوي وبعطيه خبر..


هزت راسها.. أنزين..



صكيت باب غرفتها..
ولقيت حارب في الصالة.. أشرت صوبه: تعال حبيبي روح.. خبر ابوك أني اريده في الميلس.. أنزين..؟!!



راح ركض صوب ابوه في الغرفة.. ورحت اترياه في الميلس..


****************************************

(( حسن ))

ياني حروب عقب ما طق الباب.. وقال:
أحوك ثالم تآل يثتناك في المذلث.. لا تتأحل..

وراح وهو تارك الباب مبطل.. طالعت بعيوني عالمسافة.. حسيت نفسي مهموم..

قمت من مكاني..وظهرت عقب ما صكيت الباب من وراي.. واتجهت صوب الميلس..

وأول ما دشيت.. وقف أخوي سالم.. أشرت بإيدي وأنا أقوله:
ايلس ياخوي..ليش وقفت..؟!


لقيت ويهه متغير.. كل مرة يطالع على شي.. اقتربت منه ويلست.. رفعت راسي لقيته بعده واقف..في مكانه..


وقفت وقلت :
شو بلاك واقف..؟!! ايلس


نزل عينه للأرض عقبها طالع علي:
اسمع ياخوي.. ييت اخبرك أني بظهر أنا وبنتي نورة وبنرد بيتنا..


حسيت نفسي صغير جدام أخوي.. قلت بارتباك:
خبرني يا خوي.. لايكون زعلت من الهواش اللي استوى اليوم.. ترى عيالي..هم عيالك..



رفع ايده يأشر:
لالا ياحسن.. مو هذا هو السبب..


( ارتبكت وقلت بخاطري أكيد سمع شي.. لكن لو طلع سامع شي.. وعلشان جذيه بيظهر ما بيستوي خير فيهم هم الاثنين.. )
قلت :
يا خوي أنت سامع شي..؟!! حد ضايجك..؟!! خبرني.. والله لا اكسر راس اللي..



قاطعني وهو ييود إيدي:
لالا ياخوي.. والله ماقصرتوا.. لكن نورة نفسيتها تعبانة شوي.. قلت نرد البيت حتى تهدأ نفسيتها قبل يوم الخميس ومثل منت شايف.. الجو واشلون مستوي..
المهم ياخوي.. خلنا نسير حتى يوم الملشة.. وحتى تهدأ الأمور عقبها بنرد.. ولا تحاتي..


قلت بسرعة:
لكن ياخوي.. هالبيت بيتك.. وتراجع عن اللي براسك ومالك طلعة من البيت..



أخذ يقنع فيني ويتحايل :
يا خوي.. مثل منت شايف البنت مستحية.... واقول.. خلنا نسير.. أقل ما فيها ترتب أمورها.. وتتجهز للملشة..وصدقني.. شرات ما قلتلك قبل..عقب الملشة.. بيلس عندك ولا لي ظهره من البيت..
ولو عني ما كنت ظهرت ..بس مثل منت شايف..
البنت مستحية من عيال عمها..خلها تاخذ وقتها..وعقب خير أن شاء الله...



تغيرت ملامحي..واحمر ويهي..يودت إيده:
أفا ياخوي..ما تظهر من البيت منقود..تظهر من بيت أخوك..شو تبا الناس يقولوا عني راغ أخوه..؟!!


بدأ..أخوي سالم..يبرر الموقف..اللي اتخذ فيه قرار الخرجة من البيت..وقال:
والله ياخوي مابيك تزعل..بس البنت نفسيتها تعبانه..
وأنا مب ظاهر بلا رده..؟
بظهر كمن يوم..حتى حزة الملشة..وبس..عقب كل شي بيرد شرات قبل وأحسن...


( قفط ويهي تمنيت الأرض تنشق وتبلعني.. أكيد من سالم ومحمد.. ماعليه شغلكم معاي عقب..)
طالعت عليه.. وابتسمت:
ماعليه ياخوي.. ما بضغط عليك اللحين.. المهم.. وحطها براسك زين.. وافقت علشان البنت يمكن تستحي تشوف ولد عمها.. لما نخلص من الملشة.. تراك ما بتظهر من البيت..لا أنت ولا نورة..


طالع علي..وقال:
عيل استأذن منك..اني بظهر اللحين..


مقلت عيوني..:
أفا..اللحين..انزين انطر الغدا..وشلون تظهر ...؟


استحى في البداية يرد علي..لكن..عقب هالسكوت قال:
والله ياخوي..البنت ملزمة إلا نظهر اللحين..وأنت ما شفتها وشلون متكدر مزاجها...طوف هالمرة علشاني..
وعقب لكل حادثٍ حديث..


(كانت الأفكار تتضارب ابراسي..على هالصباح..واللحين يريد يظهر وأنا مب متأكد إذا كان سامع شي من سالفة العرس..
بس الله يستر..)
ابتسمت ابتسامه هاديه وقلت:
خلاص.ياخوي على كيفك..سوي اللي يريحك..
لكن عقب بترد البيت..اهني عندي...سمعت..؟!!



هز راسه.. وهو يبتسم.. خير أن شاء الله..



مشى أخوي سالم .. للصالة.. وكنت وياه.. وراح صوب غرفة نورة.. اللي أول ما ظهرت شافتني أنا وأم سالم بالصالة.. سلمت علينا وهي متغشية..


وحلفت عليهم إلا أني اوصلهم بنفسي..

*****************************************




(( العم علي ))

مر يومين على هالوضع.. محمد حابس عمره بالغرفة لا يظهر ولا شي.. ورافض يدخل وياي بأي نقاش..
حاولت أفهم لكن بدون أي فايدة..


صممت أني افهم شنو اللي مستوي.. اتجهت صوب غرفة محمد وطقيت الباب .. واستأذنت ودشيت..


أول ما دشيت لقيته منسدح على الشبرية.. ساكت مهموم..
اقتربت منه ويلست احذاه وابتسمت..


طالع علي بنظره ذابلة وقال:
شو بلاك.. ؟!!



ضحكت وقلت : تسألني أنا شو بلاني..؟!! عيل أنا شو اقول..؟!!


غمض عينه.. وصد عقب للصوب الثاني..

مديت ايدي على شعره.. وسمحت لأصابعي تغوص بين خصلات شعره الكثيفة والناعمة..
بكل حنية.. وقلت:
شو بلاك يا ولدي..؟!! طمن قلب ابوك..
ولا تقول مافيك شي.. محمد.. إذا كنت صج تعزني.. خبرني شنهو اللي مستوي وياك..
طالع عمرك وشلون صاير..؟!! شوف ويهك وشلون مستوي.. ذبلان..
يالله اللحين بتنش.. وبتتسبح.. وأنا بنطرك في الصالة وبسوي خوش عصير يبرد الأعصاب.. وبسويلك لقمة تاكلها ..



طالع علي .. بصمت عقب سمح لكلماته أنها تظهر:
مالي خلق..لشي.. دخيلك..


قمت من مكاني وتوجهت صوب الباب وقبل لا اظهر وقفت ودرت لوين ما محمد منسدح وقلت:
اعتبرني ما سمعت اللي قلته.. واللحين نش واترك عنك الكسل.. وبترياك في الصالة..
والله يا محمد إذا ماسويت اللي قلته باخذ بخاطري منك..وبعرف أن مالي معزة عندك..أن كنت تعزني اثبتلي.. وبتلاقيني في الصالة..
وظهرت بدون ما اتريا منه يرد علي..


******************************************

(( محمد ))

لما ظهر عمي علي من الغرفة.. يلست بصمت لفترة بسيطة عقب.. قمت من على الشبرية..
ورحت أتسبح..ولما خلصت.. وغيرت ملابسي..
توجهت صوب عمي علي في الصالة.. كنت أحس خطواتي ثجيلة بدال ما تشيلني أنا اللي اشيلها..


اقتربت من عمي وفريت عمري على الكنبة اللي حذاه.. وبدون ما أطالع عليه:
السلام عليكم..


رد علي السلام:
وعليكم السلام ورحمة الله وبركاته
هيه جذيه ابيك.. وأنا ابوك.. ترى الهم يقصف بالعمر..يالله..اللحين قول بسم الله.. ومد ايدك وكل..



سندت ظهري على الكنبة.. وطالعت على الأكل..عقب عليه:
الحمدلله شبعان..


ضحك ومد أيده على الأكل وبدأ يلقمني ويأكلني غصب عني وهو يقول:
أكيد شبعان هم ونكد..


وبدون ما كان يسمع توسلاتي أني مابي آكل.. كان يأكلني لقمة ورى الثانية.. وهو يضحك ويقول:
كل بلا هذربة..يالله عاد..



ويالله بالعافية إلين ما خلصت اللي بالصحن.. شربت كوب العصير..
وعقبها..
سند عمي علي ظهره على الكنبة اللي تقابلني بسكوت..
لما حسيت.. أن عيون عمي تراقبني..سرقت نظره وتصادفت عيني بعيونه..

كان حاط إيده على خده.. ومركز علي.. باهتمام..


غصب عني.. زاد ضيجي..نزلت راسي..


قام من مكانه ويلس حذاي وهو يقول:
أفا.. أفا يا محمد.. مو أنت اللي تنزل راسك.. شو فيك يا قطعت فؤاد ابوك.. خبرني.. قاسمني الهم..


حسيت العبرة تخنقني.. هذا عمي علي يقول اللي المفروض ابوي اللي أنا من لحمه ودمه..يقوله لي..

رفع عمي علي راسي بإيده.. وقال:
حط عينك بعيني وقول يا ولدي شو بلاك..؟!! إذا ما تعرف ترى قلبي يتعب لما يشوفك بهالحالة.. خبرني ياولدي..شنهو اللي خلا حبيبي تضيج بعيونه الدنيا..؟!!


حظنت عمي علي.. وكنت ماسك اعصابي بالحيييييييل..
عقب خزت عنه.. وأنا اقول:
كل شي مقطوط على راس هالمحمد ولا حد حاس..
ابوي يريد يرضي عمي سالم على حسابي أنا وسالم..وياليت المشكلة واقفة لهني كنت قلت مو مشكلة..
لكن اللي زاد فوق الطين بلة .. أن..
أنـ..


سكتت.. ونزلت عيني على الأرض..


حط ايده على إيدي :
كمل يا محمد اسمعك..


تنهدت.. وبدون ما أطالع عليه:
حتى سالم فاهم الموضوع غلط.. يظن أني اريد نورة..واليوم اللي شفتني بذاك الشكل..كنت متهاوش ويا سالم.. لأنه دش المطبخ وكنت أنا ونورة هناك..وسمعني اقول كلام لنورة.. لكني ما قلت اللي قلته..إلا لأنها..استفزتني..وعصبتني وااايد..
وسكت
(شو اقولك أنها كبت كوب الماي علي..؟!! ما عليه.. بكون احسن عنج يانورة وما بشوه صورتج بعيون عمي علي..)


وهذا اللي استوى..


بدأ عمي علي يعرض علي مساعدته وبعض الحلول لكن اسهل حل اصعب تنفيذ..
ولما شافني عمي بهالشكل..وأن الحلول..صعبة..ونفسيتي متأزمة.. رد يقول:
ما عليه يا ولدي.. أبدأ بحل المشكلة.. ويا سالم..

طالعت عليه وأنا شابك يديني ببعضهم:
شو.؟!! سالم..؟!!
قلتلك عن اللي مستوي وياي أنا وسالم..وفوق هذا كله تباني ارمسه..؟!! واشلون..؟!!
أنت ما تعرفه زين..مابيرمسني ..والله لو كنت متأكد انه بيرمسني..
كنت..اتصلت من زمان وتفاهمت وياه.. لكن شو أقول..؟!! غير الله يسامحه..



سكت..لفترة يفكر عقب طالعني بابتسامة:
لقيتها..


جدمت بجسمي لجدام شوي وركزت عيني باهتمام على عيونه:
خير..؟!! شنهو اللي لقيتها..؟!!



رفع سماعة التيلفون وهو يقول:
تريا وبتشوف عمك علي شو بيسوي.. على بالك أنت وحدك شباب..واللي تفكر بافكار نااادرة..؟!!



وبدأ..يضغط بالأرقام.. يتصل.. لكن بمنو..؟!!


كنت اراقب عمي علي.. واترياه يرمس.. وشوي.. سمعته يقول:
سالم وينك..؟!!
تعااالي بأسرع ما يمكن..واترك اللي بإيدك..
الحق محمد..تعبااااااان..ما اعرف شو فيه..ما يتحرك..
وما اعرف على منو اتصل..بسرررعة..ويهه مصفر.. وجسمه بااارد..
يالله اترياك..
يالله..بسرعة..



وسكر التيلفون.. وهو يطالع علي.. وقال:
واللحين دش غرفتك..بسرعة ولا تظهر منها..إلين ما ازقرك..


كنت مستغرب.. على هالحركة... طالعت عليه.. وهو يحاول يخليني اقوم من على الكنبه..وقلت:
شنو هذا اللي سويته..؟!!


ابتسم :
الذيب ما يهرول عبث وأنا ابوك.. تريا وأن شاء الله اللي براسي يصير..


قمت من مكاني وتوجهت صوب غرفتي وأنا اقول:
صجك.. الذيب ما يهرول عبث..



وترييت في غرفتي لفترة.. وفجأة..سمعت صوت عمي علي يزقرني..
وظهرت من الغرفة..
متجه للصالة..



********************************************

(( سالم ))


كنت متضايج حيييييييل على اللي مستوي وياي.. والصدمة صج جارحتني..
والأكثر من جذيه.. نورة تركت البيت وراحت..


كنت في سيارتي.. صاف من البعيد..قرب بيت عمي سالم..
وفجأة..
لقيت جوالي يدق
مديت إيدي عليه.. شفت رقم عمي علي..ترددت أرد..خفت يكون محمد.. وأنا مااالي خلق اسمع صوته..


عقب تردد..رديت عليه:
السلام عليكم ورحمة الله وبركاته..



لكن تفاجأت.. صوت عمي علي مرتبك وخايف وهو يقول:
سالم وينك..؟!!


( كنت ارد عليه ببرودة أعصاب.. وعيني متعلقة على باب بيت عمي سالم..) :
هني .. خير أن شاء الله شي في خاطرك..؟!!



سمعت يقول بنبرة ما عهدتها عليه بيوم:

تعااالي بأسرع ما يمكن..واترك اللي بإيدك..
هني تروعت من قلبي.. عدلت يلستي.. وشغلة السيارة وأنا اقول:
خير.. حد مستوي به شي..؟!!





رد بخوووف وبصوت عالي بنفس الوقت:

الحق محمد..تعبااااااان..ما اعرف شو فيه..ما يتحرك..
وما اعرف على منو اتصل..بسرررعة..ويهه مصفر.. وجسمه بااارد..
يالله اترياك.. يالله..بسرعة..


( أول ما سمعته يقول جذيه.. قلبي قفز من صدري.. حسيت بخوف.. فضيع..)
رديت عليه:
ثواااني وأكون عندك..


وصكيت التيلفون..


ولأني كنت متواجد عند بيت عمي سالم.. سهل علي الدرب..ثواني إلا وصلت بيت عمي علي.. صفيت السيارة بسرعة.. ودشيت مثل المينون..


وأول ما دشيت.. لقيت عمي علي بويهي في الصالة.. طالعت عليه وقلت بخوف:
وين أخوي..؟!!


تفاجأت.. أنه نش من مكانه.. واتجه صوب باب الصالة.. وصك الباب بالمفتاح وحطه بمخباه..
بصمت..


طبعاً تفاجأت على هالحركة.. وما فهمتها ..طالعت عليه وأنا زايغ بالقو:
أخوي وينه..؟!!



وقف في نص الصالة وصرخ بعالي الصوت:
محمد..يااااااااااااااااااااا محمد..


وشوي ظهر محمد من الغرفة..وأول ما شافني.. وجه عيونه صوب عمي علي.. أما أنا..

عقدت حيابيني.. وطالعت على عمي علي..وقلت وأنا أأشر صوب محمد:
هذا اللي تقول عنه تعبااان وما يتحرك..؟!!
عيل منو هاللي واقف جدااامك يدي ..؟!!


صرخ عمي علي بويهي بطريقة ما سمعتها بالمرة:
اسكت.. واسمع.. ترى محمد ما يعرف أني زقرتك..هي نعم..
هذا اللي واقف جدااامك تعبااان..
واللحين تحلون اللي من بينكم.. ومالك مفرة يا سالم..


وطالع على محمد وقاله:
تفضل..هذا أخوك..جدامك.. واللي يابه لهني يثبت أنه يحبك ويعزك.. وقول اللي عندك..

صرخت بمحمد:
أي أحبه..؟!! وأي أعزه...........؟!!
هذا ما يستحق لا معزة ولا حب ولا احترام بعد..
والله ثم والله ثم والله اللي يابني هني غريزة الأخوة.. ولا يروح بالك مكان ثاني..



وأنت.. ( وأشرت صوب عمي علي ).. ليش تقص علي وتيبني على ملا ويهي علشان شنو..؟!!
علشان اتفاهم ويا هالخايس..؟!!


طالع علي عمي علي.. وعقبها طالع على محمد وقال.. وهو يتجه لغرفته:
اللحين انتوا برااايكم.. سوا اللي تسووونه.. تتناقشون..؟!! تتذابحون..؟!! تاكلون بعضكم..؟!!
يسلق كل واحد الثاني..؟!!
برااااااااااايكم.. وعليكم بالعافية.. أما أنا.. بسير وبريح شوي.. ولا تسون أي ازعاج لأني اريد ارقد..
وأحب اطمنكم.. لما تخلصون من بعضكم.. وتتذابحون.. طقوا علي الباب علشان الفايز.. ابطله باب الصالة.. ويروم ينحاااش..

واللحين برخصتكم..



راح وبدون ما يلتفت.. ودش غرفته.. وصك الباب شرات ما قاله لنا..
كنت مستغرب..وممقل عيوني بنفس الوقت..
وفهمت أن عمي صك باب الصالة علشان ما اهد محمد وما نتفاهم..


لقيت الصالة.. عمت بالهدوء.. والسكون.. فجأة.. من عقب هالحوار..
حسيت أني أنا ومحمد.. متفاجئين.. ومستغربين بنفس الوقت باللي سواه عمي..


المكان..بارد..عيوني ترفض تلتقي بعيون محمد.. الغضب ممتلكني.. لكن الغريب.. أني حاس بهداوة واستغراب من الحركة اللي انصدرت قبل شوي من عمي علي..

وعقب تردد.. وسكوت مسيطر على الصالة..تجدمت...
ويلست على الكنبة.. بدون ما أطالع على محمد..


*******************************************